Plattdeutsche Nachrichten Plattdüütsche Narichten vun'n 18. März 2024

Russlands Präsident fiert sik achterna Wahlsieg

Moskau: Dat Resultat weer vun Anfang an kloor: Wladimir Putin wurr bi de russche Präsidentenwahl för wiedere söss Johr wählt. Na de Wahlkommischon hebbt rund 88 Perzent vun de Wähler för den Kremelbaas stimmt. Gegenkandidaten weren för internatschonaale Opsichtslüüd man blots Moskaus Marionetten, annere dörven sik gor nich eerst opstellen laten or sitten achter Trallen.

Israelsche Armee kämpt wedder in´t Schifa-Krankenhuus in den Gazastriepen

Gaza: De israelsche Armee maakt künnig, dat se wedder op dat Flach vun dat Al-Schifa-Krankenhuus in Insatt is. Dat Krankenhuus is dat gröttste in den Gazastriepen. Dat gifft woll Informatschoon, dat ranghoge Liddmaten vun de islamistsche Hamas dat Krankenhuus för den terroristschen Bedriev bruken. Bi den Insatt wurrn israelsche Suldaaten vun Terroristen angrepen, mellt de Armee.

Tahl vun Gewaltdaten an Schoolen stiggt

Hannober: Dat gifft jümmer mehr Gewaltdaten an Schoolen in Neddersassen un Bremen. De Tahl vun Vorfäll, de bi de Polizei mellt wurrn, is verleden Johr in beid Bunnslänner na baven kladdert. De Samttahl vun Versehrten verleden Johr leeg in Neddersassen na Angaven vun dat neddersässche Lannskriminalamt bi knapp
3.300 – un dormit üm mehr as 600 hööger as in dat Vörjohr. In Bremen steeg de Tahl vun Polizeiinsatten an Schoolen vun rund 700 op 750.

Ostfreesche Eilannen kriegen Stütt för nee´e Stränn

Hannober: Achterna en unbannig Stormflootsaison an de Nordseeküst hett de neddersässche Lannsregerung den Ostfreessche Eilannen Stütt bi den Wedderopboe vun wegspöölden Baadestränn toseggt. Dorför staht bet to 700.000 Euro praat, heet dat ut dat Weertschopsministerium. Op Norderney fehlen teihndusende Kubikmeters Sand an den Stränn. Man ok Wangeroog un Baltrum hett dat böös tofaatkregen. Mitt Februar hebbt de Eilannen üm Stütt vun´t Land beden.

Dusende Minschen demonstreeren gegen Rechtsextremismus

Bremen: In Bremen sünd verleden Sünndag rund 5.000 Minschen gegen Rechtsextremismus op de Straat gahn, mellt de Polizei. De Utrichter, dat Bündnis „Luut gegen Rechts“ snackt sogor vun 15.000 Deelnehmers. As de Polizei see, geev dat bi de Demonstratschoon twuschen Osterdiek un Domshof in de Bremer Binnenstadt „keen sünnermaten Maleschen“.

Dat Weer

Un nu kiekt wi op dat Weer: In Bremen un Rottenborg hebbt wi 5 Graad, in Bremerhoben un Emm sünd dat opstunns 6 Graad. Övern Dag seht wi meist Wulken an Heven, af un an pladdert dat, in Richtung Avend schafft de Sünn dat mal in´t süüdliche Emsland an de Wulken vörbi. De Wind weiht flau un licht böig vun de süüdoosten Kant, an de Küst un op de Eilannen weiht de Wind ut süüdoosten in Maaten un in Böen frisch bet stark. Dat Thermometer wiest us 8 bet 13 Graad. In de Nacht wulkig, to´n Deel ok dakig hier un dor mal en poor Druppen bi 5 bet 2 Graad. Morgen dicke Wulken, man de Sünn schafft dat liekers sik af un an sehen to laaten, hier un dor fallt en beten Regen. Över Middag un an Namiddag blifft dat ok mal dröög un dat denn bi 11 bet 12 Graad op de Eilannen un 13 bet 16 Graad in´t Binnenland.

Dat weren de Plattdüütschen Narichten. Tohoopstellt vun Sven Weingärtner. Op Platt trechtmaakt un vörleest vun Martina Brünjes.