Plattdeutsche Nachrichten Plattdüütsche Narichten vun'n 15. März 2024

Düütschland op Kurs bi de Arbeit för dat Klima 2030

Berlin. Düütschland kann sien Klimaafsichten för dat Johr 2030 schaffen. Dat wiesen neje Tallen vun dat Umweltbunnsamt. Dorna sünd de Drievhuusgas-Emischonen 2023 üm goot thein Perzent as in dat verleden Johr rünner gahn. Ursaken sünd de anstegen Andeelen vun Energien, de vun alleen jümmers nawassen, en Trüchgahn vun Produktschoon vun Enregien mit Ööl, Gas un Köhlen un en sunken Energie-Nafraag bi Wirtschaft un Verbrukern. Bunnsklimaschutzminister Robert Habeck süht Düütschland op Kurs in de Politik bi de Arbeit för dat Klima.

An´n Flegerhaven warrt streikt

Hannover. De Gewarkschop verdi hett de Mitarbeiters in den Luftsekereheits-Rebeet an en poor düütschen Flegerhaven vundag wedder to´n Warnstreik opropen. Bedrapen is to´n Ferienanfang vundag ok de Flegerhaven in Hannover. Bit Klock twölf an´n Middag warrt hier kien Fleger in de Luft gahn. Dat vermellt de Flegerhaven. Bit dorhin geiht de Warnstreik. En groten Deel vun de bit dorhin planten Flöög sünd afseggt. En Floog na Lanzarote wurr op Klock een an´n Middag verschoven.

Präsidentenwahl in Russland fang an

Moskau. In Russland hett de Präsidentenwahl anfungen. De eersten Wahllokalen maken an´n Avend vun use Tiet in´n Oosten vun dat Land op. De Afstimmung löppt bit Sünndag mitrekend. Dat gellt as seker, dat Präsident Wladimir Putin nochmal för söss Johr in sien Amt wedder wählt warrt. De dree annern Kanidaten sünd politisch op Kremel-Linje. Bewarver vun de Oppositischon wurren nich tolaten.

Swoortransporten dörven ok Sünndaag op de A27 un Ümwegen fohren

Hagen im Breemschen. Groot- un Swoortransporten dörven eerstmal ok Sünndaag un an Fierdaag op de A27 un op de för se utwiesen Ümwegstreken fohren. Dat hebbt de Länner Bremen un Neddersassen fastleggt. Achtergrund is dat Dichtmaken vun en Deelstreek vun de A27 twüschen Hagen un Uthleer. För normaal LKW gellt wieder dat Fohrverbott an Sünndaag un Fierdaag.

Kien Sekerheitslüüd mehr in´n Insatz an School in Bremerhaben

Bremerhaben. An de Wilhelm-Raabe-School in Geestmünn is kien Sekerheitsdeenst mehr in´n Insatz. As de Nordseezeitung vermellt, hett de Stadt mit de Arbeit al Enn Februar Sluss makt. De Sekerheitslüüd hebbt siet dat Enn vun de Harvstferien an de School arbeit. Vörher weern jümmer wedder Schoolfrömde in de School ringahn. Se harrn sick dor ohn Ehr un Ansehn opföhrt un weern wohrschienlich ok Schuld an Schadens an Saken. Siet den Insatz vun de Sekerheitslüüd is de Situatschoon to Roh kamen.

Dat Weer

Un nu noch en Blick op dat Weer: In Cuxhaben un in Bremen-Mitt twölf, in Bremerhaben elven un in Friesaythe sünd dat opstunns twölf Graad. Vundag fangt de Dag mit Wulken un enkelten korten Schuern an. An´n Namiddag un Avend schafft dat de Sünn en beten dör de Wulken to kieken, man vun de Westen Kant trecken deegte Regenschuer mit Blitz un Dunnerslag dör. In´n Oostfreesland blifft dat meist dröög. De Wind weiht in Maten bit frisch in Böen vun de Süüdwesten Kant. Twölf bit sössthein Graad stahn den op dat Thermometer. Af Middernacht kamen vun de Nordsee neje Regenschuer. Bit to´n  Morgen schall dat denn op de Streek Ossenbrügger Land – Bremen un Olet Land  pladdern. Dat Thermometer wiest söven bit thein Graad.  Morn stellt sick en drögen Mischmasch ut Sünnschien un Wulken in. An de Küst sünd kien Wulken an´n Heven. Elven bit twölf Graad wiest dat Thermometer. Op de Eilannen weern dat negen Graad.  Sünndag fangt dat mit Sünnschien an. Af den Namiddag fangt dat an to regen bi negen bit twölf Graad. Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.