Plattdeutsche Nachrichten Plattdüütsche Narichten vun'n 14. März 2024

Bunnsdag diskereert över Taurus-Levern

Berlin: De Bunnsdag diskereert just nu wedder of Düütschland Taurus-Marschflegers an de Ukraine levern schall. De Union hett den Andrag för düsse Diskuschoon stellt. Se verlangt vun de Bunnsregerung, dat Wapensystem bats op de Steed an de Ukraine aftogeven. Bunnskanzler Scholz aver hett dat just güstern, bi de Kanzlerbefragen, düütlich afwiest. Mag ween, dat ok Afordnete vun de Regerungskoalitschoon för den Andrag vun de Oppositschoon stimmen.

Wohrschaustriek bremsen Floogverkehr an verscheden düütschen Flegerhavens

Hamborg: Floogreisen Lüüd in Düütschland mööt hüüt un morgen mit Utfallen un Tolaatkamen reken. An verscheeden Flegerhaven gifft dat Streiks: De Gewarkschop Verdi hett dat Sekerheitspersonaal vun privaaten Deenstleister opropen, de Arbeit liggen to laten. Kalkulatschoon na warrn dorbi woll 600 Flöög strieken un 90.000 reisen Lüüd mööt ümplanen. Bremen is man blots indirekt drapen.

Buernminister snackt över Tokunft vun Landwirtschop

Erfurt: De Buernminister vun Bund un Länner kamen hüüt to en Fröhjohrsversammeln tosamen. Vörweggahn sünd maandelange Buernproteste, vunwegen wegstrieken vun Subventschoon för Sprit. De Düütsche Buernverband hett vör de Versammeln weniger Papeerkraam för Buern verlangt un Stütt för annere Mööglichkeiten vun Kraftstoffen. Wiederhen warrt över betere Richtlininen, wo man Deerten hollt, snackt.

Union in Bunnsdag will Föhrerschien billiger maken

Berlin: CDU un CSU in den Bunnsdag verlangen en Grenz för de Föhrerschienkosten. De Fraktschoon will dorto hüüt in dat Parlament en Andrag stellen. In Momang kost dat bet to 4.500 Euro, den Föhrerschien to kriegen. Dorüm schüllt ünner annern Fohrsimulaters mööglich maakt warrn, üm Theoriestünn ok Tohuus to maken.

Junger Minsch raast mit 200 Stünnenkilometers dör Ossenbrügge

Ossenbrügge: En 15-Johriger is in de Nacht op Dingsdag vör de Polizei utneiht un mit en Wagen dör de Footgängerzoon raast. De Polizei vermellt, dat se em kontrolleren wüllt, vunwegen he bi dat Afbögen nich blinkt hett. Dorophen hett de junge Minsch Gas geven. In de Footgängerzoon weer he mit 170, op grötter Straaten mit bet to 200 Stunnenkilometer ünnerwegens. To Schaden kamen is dorbi nüms, opletzt is de Fohrt an en Straatenlateern to Enn gahn.

Dat Weer

Un nu kiekt wi op dat Weer: In Emm sünd dat just 10 Graad, in Möppen un Bremerhoben 11 Graad un in Bremen hebbt wi opstunns 12 Graad. Hüüt kummt övern Vörmiddag jümmer mehr de Sünn rut un dat blifft dröög bi 16 bet 18 Graad in´t Binnenland un 12 bet 15 Graad an de Küst. In de Nacht sünd en poor Wulken an Heven, de an fröhen Freedagmorgen in Ostfreesland un in dat Ollenborger Münsterland Regen bringen. Dat Thermometer wiest us dorbi 11 bet 9 Graad. Morgen treckt eerst en Regenstreek över us weg, man al an Vörmiddag ist dat dör, liekers is nee´e Regen nich wiet, an´n Namiddag verenkelt deegt Regen ok mal mit Blitz un Donnerslag. Aver ok de Sünn kriggt wi af un an to sehn un dat denn bi 12 Graad op de Eilannen un 14 bet 16 Graad in´t Binnenland.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.