Plattdeutsche Nachrichten Plattdüütsche Narichten vun'n 13. März 2024

EU-Parlament will över Gesett för künstlich Intelligenz afstimmen

Straßborg: Dat Europaparlament will an Vörmiddag strengere Regeln för denken Maschien besluten. Dorna mutt in Tokunft kloor tekent warrn, wenn to´n Bispill Texten, Biller or Videos in dat Internet vun KI stütt sünd. Evenso schall dat in knappen Grenzen verlöövt ween, KI-Anwennen as Gesichtskennen to bruken – to´n Bispill bi akute Gefohr vun Terror.

Biden un Trump sünd de Kandidaten för de Präsidentschopswahl

Washington: Bi de Präsidentenwahl in de USA, tokamen November, treden Joe Biden un Donald Trump wedder gegenanner an. Achterna wiedere Vörwahlen hebbt de Demokrat Joe Biden, de den Posten nu hett, un sein Vörgänger vun de Republikaner de nödige Tahl an Delegiertenstimmen üm sik opstellen to laten, seker. Op de Parteidaag warrt Biden un Trump noch offitschell nomineert.

Bahnstreik is toenn, man utfallen bi de Flegeree

Berlin: Achterna de Streik bi de GDL schüllt de Töög vun de Düütschen Bahn hüüt wedder meist normaal ünnerwegens ween, hier un dor fallen aver noch Verbindungen ut. Bi de Flegeree mööt sik reisen Lüüd dorgegen wieder op Utfallen un Tolaatkamen instellen. För vundaag hebbt de Floogmaten vun de Lufthansa Streiks an den Münchner Flegerhaven künnig maakt. Morgen hett Verdi de Luftsekerheitsarbeiders an verscheeden düütschen Flegerhavens to´n Streik opropen.

Verdeenstaffäär is Thema in den neddersässchen Landdag

Hannober: De Verdeenstaffäär bi de SPD in Neddersassen warrt hüüt Middag Thema in den Landdag in Hannober. De CDU-Fraktschoon verlangt en Ünnersökensutschuss. Dorbi geiht dat üm en Mitarbeitersche vun Ministerprädident Stefan Weil. Dör en Ännerverdrag steeg ehr Lohn üm 1.900 Euro per Maand.

Nee´e Kulturpass blots minner bruukt

Berlin: De nee inföhrte Kulturpass warrt in Bremen un Neddersassen woll blots minner bruukt. De Bunnsregerung hett künnig maakt, dat verleden Johr man blots een Drüttel vun utwussen Minschen de em bruken künnt, dat Angebott ok in Anspröök nahmen hebbt. De Kulturpass schall junge Lüüd Moot maken an kulturellen Veranstalten deeltonehmen.

Dat Weer

Un nu kiekt wi op dat Weer: In Bremen hebbt wi söss Graad, in Bremerhoben, Emm un Deefholt sünd dat opstunns söven Graad. Eerst schient noch af un an de Sünn in dat Werser-Elv-Dreeeck, gau maken sik aver Wulken an Heven breet, hier un dor kann dat en beten Regen or Spütterregen geven un dat den bi 10 Graad op de Eilannen un 11 bet darteihn Graad in´t Binnenland. In de Nacht wiederhen dicke Wulken an Heven, mag ween, dat mol en poor Druppen fallen, in de fröhen Morgenstünn lockern de Wulken vun de Noordsee un de Nedderlannen her op. Dat Thermometer wiest us 10 bet 9 Graad. Morgen fangt eerst mit dicke Wulken an, man in´t Werser-Ems-Rebeet lacht al fröh morgens de Sünn. Övern Vörmiddag wesseln sik Sünn un Wulken af un dat blifft dröög bi 16 bet 18 Graad in´t Binnenland un op de Eilannen bi 11 bet 15 Graad.

Dat weren de Plattdüütschen Narichten. Tohoopstellt vun Katrin Martens. Op Platt trechtmaakt un vörleest vun Martina Brünjes.