Plattdeutsche Nachrichten Plattdüütsche Narichten vun'n 4. März 2024

Se söökt wieter na ehemalig RAF-Terroristen

Berlin – Se söökt wieter na de beiden RAF-Terroristen, de op flüchtige Fööt sünd. An’n Abend hebbt de Ermiddler een Wahnung in Berlin dörsöökt, man dar is woll nix bi rutkamen. Fastnahmen hebbt se nümms. Vördem harr de Polizei in’n sülvigen Berliner Stadtdeel een Dörp ut Wahnwagens vun linksalternativen Lüüd dörsöökt. De Beamten gaht darvun ut, dat een vun de ehemalig Terroristen dar bit vör korten wahnt hett.

Lokföhrer-Gewarkschupp will wat över nee’e Streiks vermellen

Berlin – De Gewarkschupp Dütscher Lokomotivföhrer will in een half Stünn vermellen, woans dat wietergeiht un of se wedder streiken wüllt. Darachter stickt dat Verhanneln över de Tarife mit de Dütsche Bahn. Dat Verhanneln hett nu erstmal nich klappt un darum kann dat ween, dat nu länger streikt ward. Nich klaar is, of GdL-Baas Weselsky all vundaag nipp un nau wat darto seggt.

Snacken över een Ünnersökensutschuss wegen Taurus

Berlin – De SPD hett aflehnt, wat de Union överleggt hett: een Ünnersökensutschuss to den Taurus-Afhöörschandaal intosetten. De Butenpolitiker Stegner sä, een socker Utschuss wees nich nödig, dat Foddern vun de Union wees een Oppositschons Lütt-Lütt. CDU un CSU hebbt buterdem een Sünnerdrepen vun’n Verdeffenderen-Utschuss beandragt. Darachter stickt een Snack vun de Bunneswehr över een mögelk Insatt vun Taurus-Marschfleegbombs vun de Ukraine, dat dör russische Steden afhöört worrn is.

Wesernetz söökt Gaslecks

Bremen – De Nettbedriever Wesernetz maakt in use Region den Röök vun Erdgas duller. Een Week lang schall de normale Dosis dreemal so stark weern, üm so mögelk Gaslecks to finnen. Wesernetz kuntrulleert dat eenmal in’t Johr. Blangen Bremen ward dat ünner annern in Schwanewe’e, Osterholt-Scharmbeck, Leendool un Weyh so maakt.

Werder Bremen verleert in de Football-Bunnesliga

Bremen – Football-Bunnesligist Werder Bremen hett an’n Abend sien Utwärtsspeel verloorn. De Bremer hebbt bi de TSG Hoffenheim blots 1 to 2 speelt un sünd darmit in de Tabell wieter op Platz 8. Un in de dütsche Ieshockey-Liga hett Bremerhaben sien vörletztet Speel vun de Hauptrunn wunnen. De Fischtown Pinguins hebbt gegen de Adler Mannheim 4 to 3 na Verlängerung speelt.

Dat Weer

Un nu een Blick op dat Weer: op Wangerooge 6, in Bremen, Bremerhaben un Deefholt sünd dat opstunns 8 Graad. Vundaag is dat Weer meist gries un ok länger nevelig. Ok an’n Middag un Namiddag hett de Sünn dat swar un kiekt blots af un an mal rut. Darto kann dat jümmer mal een beten Sprütteregen geven, meist blifft dat aver dröög – bi 9 bit 10 Graad op de Eilanden un bit to 14 Graad in’t Binnenland. Tokamen Nacht sünd meist dicke Wulken an’n Heben, darbi fallt verenkelt mal een beten Regen or Sprütteregen. Dat Thermometer sackt op 6 bit 3 Graad. Morrn gifft dat dicke Wulken, in’n Ruum Bremen un in’n Westen vun de Werser kann ok mal Regen daalkamen. In’t Elv-Werser-Dreeeck kiekt an’n ehrsten mal de Sünn rut – bi 6 bit 9 Graad ward dat nich mehr so mild. Dat weern de Narichten op Platt. Michael Kück hett se tohoopstellt. Op platt trechtmaakt un vörleest hett se Heidi Jürgens.