Plattdeutsche Nachrichten Plattdüütsche Narichten vun'n 1. März 2024

BSAG-Mitarbeiters gahn för en beteren un sozial gerechten Vehrkehr vun dichtbi op de Straat

Bremen. Bunnswiet hett de Gewarkschop Verdi Mitarbeiters bi de Busse un Bahnen to en Warnstreik opropen. In Bremen fohren dorüm vundag kien Busse un Bahnen vun de BSAG. Siet Klock thein gifft dat in de Binnenstadt bavento en Demonstratschoon för en sozial gerechte Wenn bi de Mobilität. Dorto hebbt de Gewarkschop verdi un de Klimaschutzkoppel Fridays for Future opropen. Se verlangen betere Grundlagen un Rahmen för de Arbeit un mehr Geld för Busse un Bahnen.

Grusen un Gräsen na Doden bi Ankamen vun Hölpsworen in Gaza-Stadt

Gaza. De Berichten över den Dood vun vele Palästinensern bi dat Ankamen vun Hölpsworen in den Gaza-Striepen hebbt internatschonal Grusen utlöst. De EU-Butenbeopdragte Borrell sprook vun en „Bloodbaad“. De franzöösch Präsident Macron weer in Raasch över de Biller ut Gaza-Stadt, wo Börgerslüüd vun israelisch Suldaten op den Kieker nohmen wurrn sünd. In de Nacht weer de UN-Sekerheitsrat wegen de Saak to en Extra-Drapen tosamenkamen.

Kremel-Kritiker Nawalny warrt to Graff brocht

Moskau. An´n Middag schall de dode Kreml-Kritiker Alexey Nawalny to Graff brocht weern. De Trupp vun Nawalny harr na egen Angaven Maleschen, en Oort för den Truergottesdeenst to finnen. Nu schall de in en Kark in den Süüdoosten vun de Hauptstadt ween. De Liek schall achteran op en Karkoff to Graff brocht weern. As de Nawalny-Trupp vermellt, lehnden aver en poor Gräffnisünnernehmen af, de Liek to fohren. Nawalny weer vör twee Weeken in en Straafkolonie in de Arktis sturven. Dat weet se nich, an wat he dootbleven weer.

Grootinsatz vun de Polizei na Schööt in den Kreis Rodenborg

Scheeßel. In de Nacht geev dat en Scheteree in den Kreis Rodenborg. De Polizei snackt vun twee Steden, wo dat passeert weer. De eersten Schööt fullen dorna in de verleden Nacht gegen Klock half veer in en Eenfamilienhuus in Westervees, de to de Samtgemeend Scheeßel tohört. En beten later geev dat wedder Schööt, düttmal in de Gemeend Bothel. Noch mehr Angaven gifft dat betto noch nich. Nich to de Tall un to den Tostand vun de Versehrten noch to de Achtergrünnen vun de Saak. De Schütt, vun den se meent, dat he dat daan hebben schall, wurr fastnahmen. De Keerl hett sick sülfst stellt, see en Spreker vun de Polizei op Nafraag vun buten un binnen.  

Twölf Verletzte na Verkehrsunfall op de A27

Cuxhaben. Bi en Unfall op de A27 in den Kreis Cuxhaben hebbt güstern Avend twölf Minschen wat afkregen. Veer dorvun böös. Na Angaven vun de Polizei weern twüschen de Opfohrten Hagen un Stotel veer Autos inenanner fohren. Na eersten Ünnersöken vun de Polizei weer toeerst en Auto to gau op en vör em fohren Auto vun en Fro ut Bremen opfohren. De Fohrer vun noch en Auto fohr in den vör em fohren Wagen, as de dull in de Iesen gung. De A27 weer bit so gegen Klock twee in de Nacht in Richtung Cuxhaben dicht.

Dat Weer

Un nu noch en Blick op dat Weer: In Dörbern un in Bremen-Mitt söss, in Bremerhaben söven un in Meppen sünd dat opstunns acht Graad. Hüüt gifft dat en Mischmasch ut dichten Wulkenfellern un mennigmal kann dat ok mal Blau mang de Wulken weern. Dorbi lacht denn ok de Sünn dör de Wulkenlöcker. Dat blifft meist dröög, blots hier un dör kaamt dat natt vun baven. De Wind weiht en beten bit in Maten vun de Süüd- bit Süüdwesten Kant. De Temperaturen liggen bi thein bit darthein Graad. In de Nacht sünd blots en poor Wulken an´n Heven. Twüschen Ems un Weser kann man ok de Sterns funkeln sehn. Dat Thermometer wiest dree bit söss Graad. Morn gifft das en drögen Mischmasch ut Sünnschien un Wulken. Af Middag schient mehr un mehr de Sünn. Twüschen Weser un Ems sünd man mehr Wulken an´n Heven. Elven bit veerthein Graad wiest dat Thermometer. Sünndag: Eerstmal Daak, in den Dagsverlop Sünnschien un Wulken un meist dröög bi elven bit foffthein Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.