Plattdeutsche Nachrichten Plattdüütsche Narichten vun'n 28. Februar 2024

Fregatt „Hessen“ wehrt eersten Huthi-Angreep af

Berlin: Verscheeden Narichtenagenturen mellen, dat de Fregatt „Hessen“ kort achtern´anner twee Drohnen afschaten hett. Dormit hett de düütsche Marine den eersten Angreep vun de jeminitschen Huthi-Miliz afwehrt. Siet verleden Freedag sünd rund 250 Suldaaten bi de EU-Militärmisschoon „Aspides“ dorbi. Se schüllt de Hannelsschippfohrt in dat Rode Meer afsekern. Düsse Insatz gellt as de gefährlichst in de Geschicht vun de Bunnswehr.

Biden un Trump hebbt Vörwahlen in Michigan wunnen

Lansing: Bi de Vörwahlen vun de Republikaner in den Bunnsstaat Michigan hett Donald Trump wedder gegen Nikki Haley, Ex-UN-Botschaftersche, wunnen. Bi eerste Resultaten hett de Ex-Präsident de Nees düütlich vörn. Michigan gellt as en vun den Slöötelstaaten för de Prasidentschopswahl, en Stickwahl twuschen Präsident Biden un Trump is dor in November mööglich. Man ok Biden hett de Vörwahl vun de Demokraten in Michigan wunnen.

Söök na RAF-Terroristen vun Fröher löppt wieder

Veern: De Minsch de blangenbi de RAF-Terroristin Daniela Klette fastsett wurr, is wedder free. Dat Lannskriminalamt in Hannober mellt, dat de Mann nich Burkhard Garweg or Ernst-Volker Staub is. De Polizei söcht wiederhen na de mööglichen RAF-Terroristen. Maandag wurr Daniela Klette, achterna se rund 30 Johr op de Flucht weer, in Berlin snappt un sitt nu Vechta in Ünnersökenshaft.

Ver.di röppt Technikpersonaal vun de Lufthansa to´n Streik op

Frankfurt: Ver.di hett vun hüüt af an de Arbeiders vun dat Floogtraining un dat Technikpersonaal vun de Lufthansa opropen de Arbeit liggen to laaten. De Streik duert dree Daag. Groote Maleschen schall dat för reisen Lüüd woll nich geven, mellt Ver.di. De Warnstreik vun Verdi finnt ok bi Bus un Bahn in Neddersassen statt. An Freedag is man ok Bremen dorbi. Vun Morgens klock dree bet Sünnavendmorgen föhrt denn keen Bus or Bahn in Bremen.

Kommischoon beklaagt: Ümsetten vun Bremer Klimazielen löppt langsam

Bremen: De Vörsitter vun de Bremer Klimaa-Enquetekommischoon, Martin Michalik, verlangt mehr Tempo bi dat Ümsetten vun de Klimaschuulstrategie 2038. Betnu wurr de Saneerensquoot vun Hüüs, de Raatslag vun de Kommischoon liggt bi 3,2 Perzent per Johr, düütlich verfehlt. Üm dat Teel to schaffen, mööt dree- bet veermal so veel Hüüs energetsch saneert warrn. Michalik snackt vun een „Saneerstau“ un seggt, dat is ok de Schuld vun de Lannsregeern.

Dat Weer

Un nu kiekt wi op dat Weer: In Bremen hebbt wi null Graad, in Rottenborg  un Bremerhoben twee Graad un in Willemshaven sünd dat opstunns dree Graad. Hüüt wesseln sik Sünn un Wulken af, hier un dor kann dat en beten Spütterregen geven. De Wind weiht flau, an de See ok mal in Maaten vun de süüd- bet süüdwesten Kant. Dat Thermometer wiest us söven bet negen Graad. In den Nacht mal mehr mal weniger Wulken, af un an kann dat wedder en beten Regen geven, meist blifft dat aver dröög un dat bi söss bet twee Graad. Morgen sünd wedder Wulken an Heven, an de Küst kann dat ok mal en beten Regen geven, de Sünn schafft dat ok mal in Richten Lüneborger Heid un Aller an de Wulken vörbi un dat denn bi 11 bet 13 Graad.

Dat weren de Plattdüütschen Narichten. Tohoopstellt vun Anja Guse. Op Platt trechtmaakt un vörleest vun Martina Brünjes.