Plattdeutsche Nachrichten Plattdüütsche Narichten vun'n 13. August 2024

SPD is för US-Wapen in Dütschland

Berlin – Dat SPD-Leit is darför, dat US-Wapen, de wiet weg reckt, in Dütschland staht. Dat steiht in een Papeer, dat dat Präsidium besluten hett. De Parteiböversten gifft darmit Stütt för den Kurs vun Bunneskanzler Scholz. De USA wüllt vun 2026 an in Dütschland wedder Wapensysteme opstellen, de wiet bit na Russland reckt.

Internatschonale Hölp för Grekenland

Athen – Mehrere Länner ünnerstützt Grekenland in’n Kampf gegen de bösen Woldbränne. Se hebbt Füerwehrlüüd, Löschtöög as ok Löschfleger un Helikopter op’n Weg schickt. Dat geiht to’n Bispill üm de Füers buten vör Athen. De Flamms weern woll twüschendör mal blots noch olben Kilometer vun’t Stadtzentrum weg. Buterdem ward de erste Dode vermellt: de Liek vun een Froo is in een utbrannt Fabrikflach funnen worrn.

USA un Europa roopt den Iran op

Washington – De USA un veer EU-Staaten hebbt den Iran opropen, Israel nich mehr to bedrauen. Dat is bi Beraden vun Dütschland, Frankriek, Italien un Grootbritannien rutsuert. De Staaten, de Siet an Siet staht, hoopt woll wieter darop, dat Donnerdag över een Wapenroh in’n Gazastriepen snackt ward.

Bremer Krankenhuussellschupp foddert mehr Geld

Bremen – De Bremer Krankenhüüs foddert mehr Geld vun’t Land Bremen. De Krankenhuussellschupp bekrittelt in een Papeer, dat de Geller in Höögde vun 50 Millionen Euro, de toseggt worrn sünd, för de nödigen Booarbeiden nich reckt. Se seggt, se bruukt mehr as duppelt so veel – üm un bi 112 Millionen Euro. Dat Gesundheitsressort rüümt in, dat 22 Millionen Euro mehr nödig sünd. De Senatorin ward sik bemöhen, düsset Lock in dat Verhanneln üm’n Huusholt 2025 dicht to maken, heet dat op Nafraag vun buten un binnen.

Bremer Kinner hebbt slechte Tähn

Bremen – Jümmer mehr Kinner in’t Land Bremen hebbt slechte Tähn, vermellt de School-Tähndoktors vun Bremen un Bremerhaben. Dat heet, dat bi bold jeden tweeten Schoolanfänger in’t Schooljohr 22/23 de Tähn een Doktor nödig harrn. Dat Gesundheitsressort meent, de högeren Tallen vun de verleden Johren liggt an de Corona-Pandemie un an de Gesundheit vun de Tähn vun Towannerer-Kinnern.

Dat Weer

Un nu een Blick op dat Weer: op Wangerooge 21, in Bremerhaben 24, in Bremen 25 un in Deefholt  sünd dat opstunns 26 Graad. Vundaag schient erst meist överall de Sünn. Later  kummt aver mehr Wulken op un dat gifft vör allens twüschen Ems un Werser verenkelt Grummelschuers. Dar kann in korter Tiet orrig wat daalkamen. Dat ward bruttig bi 29 bit 33, an de Nordsee bi 26 bit 28 Graad. Tokamen Nacht gifft dat mal mehr, mal weniger Wulken un dat schuert or grummelschuert hier un dar. To’n Deel kummt wedder veel Water runner un dar kann ok Nevel optrecken. Dat Thermometer sackt op 20 bit 18 Graad. Morrn kann de Dag dunstig anfangen. Bi Sünn un dicken Wulken kann dat dulle Schuers geven, buterdem Blitz un Donner mit rusig Weer, vör allens dör dullen Regen – bi 25 bit 29, an de See bi 22 bit 24 Graad.  Dat weern de Narichten op Platt. Katrin Martens hett se tohoopstellt. Op platt trechtmaakt un vörleest hett se Heidi Jürgens.