Plattdeutsche Nachrichten Plattdüütsche Narichten vun'n 9. April 2024

Bunnsbinnenministersch leggt Kriminalstatitik vör

Berlin: Bunnsbinnenministersch Faeser leggt in en Halvstunnstiet de Tallen vun de Polizei för 2023 vör. An’t Wekenenn weer al rutkamen: Gegen dat Vörjohr hebbt se 5,5 Perzent mehr an Straafdelikten in Düütschland tellt. De „Welt an’n Sünndag“ hett to weten kregen: Gewaltsaken sünd kloor mehr worrn. Mehr Verdächtige hebbt se ok bi de Minschen tellt, de keen düütschen Pass hebbt.

Gerichtshoff för de Minschenrechten: Ordelen wegen Klimaschutz

Straßburg: An den Europääschen Gerichtshoff för de Minschenrechten rekent se vunmorgen mit wichtige Ordelen wegen den Klimaschutz. Bavenan steiht de Fraag: Hoolt Staaten de Minschenrechten nich in, wenn se nich noog gegen den Klimawannel doot? Vör’t Gericht gahn weren junge Lüüd ut Portugal, mehrere Froenslüüd ut de Schweiz un en franzööschen Börgermester. Schullen se Recht kriegen, kunn de Gerichtshoff vun de Regerungen in de EU-Staaten verlangen: Se mööt strengere Klimaziele fastleggen un de ok inholen.

Galerie geiht woll an amerikaanschen Geldgever

Berlin: Dat Hen un Her dorum, wokeen de Koophüüs vun Galeria Karstadt Kaufhoff övernehmen kann, is woll to Enn. Dat Hannelsblatt vermellt: De US-Geldgever NRDC hett dat Rennen maakt. He schall de restlichen 92 Koophüüs övernehmen. Dat harr de Insolvenzverwalter güstern Avend den Utschuss vun de Gläubiger vertellt. Galeria harr Anfang vun’t Johr dat drüdde Mal en Andrag op Insolvenz stellt. In de letzte Tiet weer dat Unnernehmen wegen Geldmaleschen vun den Mudderkunzern Signa in Legerwall kamen.

Weniger Minschen in den Oosten un mehr in den Süden

Berlin: Wo vele Minschen in Düütschland leevt, dat wannelt sik bet 2040 woll vun Gegend to Gegend ünnerscheedlich. Dat hett de Bertelsmann-Stiftung utrekent. In de oostdüütschen Bunnslänner wahnt denn weniger Lüüd – in Bayern, Baden-Württembarg un in de Stadtstaaaten sünd dat denn aver mehr. In’t Land Bremen rekent se mit 1,1 Perzent mehr Minschen.

Vele för Petischoon gegen Hannel mit junge Hunnen

Bremen: Bet nu hebbt sowat 3000 Lüüd en Petitschoon unnerschreven för mehr Deertenschutz in’t Land Bremen. Se verlangt mehr Personaal in de Behörden un dat de sik mehr dorför insett, dat mit junge Hunnen nich vörbi an Recht un Gesetz hannelt warrn. In Gang sett harr de Petitschoon de Deertenschutzvereen Bremerhaven, de dat Deertenheim vun de Stadt föhrt. Utgahn weer de Saak vun en böös maltreteerten Hund. De Petitschoon löppt noch twee Weken. Achteran snackt dor en Utschuss över.

Dat Weer

Un woans süht dat mit dat Weer umto ut? Opstunns hebbt wi in Emm 13 Graad, in Bremerhaven sünd dat 14 un in Bremen un Weyerbarg 15 Graad. Vundaag: Vör allen dichte Wulken, wenig Sunnschien, un jümmers wedder pladdert dat. Gegen Middag treckt de Regen över de Elv af, dat warrt dröger, man de Sunn waagt sik nich mehr recht rut. Dat Thermometer krabbelt op 13 bet 17 Graad an’n Vörmiddag, achteran fallt dat wedder en lütt beten. De Wind dorto weiht in Maten bet frisch, he dreiht vun Süüd op Süüdwest. In’t Binnenland deegte, an de See ok störmsche Böen. Tokamen Nacht: Eerst lockere Wulken un dröög. Na Middernacht kaamt vun de Ems her dichte Wulken rin, de ok en beten Natts vun baven smiet, vör allen an de Küst. Bi 9 bet 7 Graad. Morgen: Wenn de Regen na Oosten aftrocken is, warrt dat hell un dröög mit mal Sunnschien, mal mehr, mal weniger Wulken. Blots noch 11 bet 16 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.