Plattdeutsche Nachrichten Plattdüütsche Narichten vun'n 06. Februar 2024

Bremer Senaat is froh achterna de Fördertosaag för Bremer Staahlwark

Bremen: De Senaat is froh achterna dat Verspreken vun de Bunnsregeern, dat Bremer Stahlwark för en klimaneutralen Ümboe Stütt to geven. Börgermeister Bovenschulte meent, dat is en grooden Dag för Bremen. Bunnswertschopsminister Habeck hett düsse Naricht güstern bi en Besöök in de Hütt künnig maakt. All tohoop gifft dat rund 840 Millioon Euro, dat Land Bremen övernimmt rund 250 Millioon dorvun.

Grootbritanniens König Charles hett Kreeft

London: Güstern Avend hett dat britsche Königshuus künnig maakt, dat König Charles Kreeft hett. Blangenbi Premiere Sunak, US-Präsident Biden un de franzöösch Präsident Macron, hebbt Politikers op de ganzen Welt König Charles goode Wünsche un dat em dat bold beter geiht, mit op den Weg geven. Üm wat för een Form vun Kreeft sik dat hannelt, is nich kloor.

Europääsch Afordnete stimmen över EU-wiede Wegnahm vun den Föhrerschien af

Straßborg: Dat EU-Parlament stimmt hüüt Middag doröver af, of de Wegnahm vun den Föhrerschien in Tokunft in de ganze Europääsche Union gellen schall. Opstunns gellt dat Fohrverbott man blots in dat Land wo dat utspraken wurr. Stimmt dat Parlament den Plaan to, dörvt düütsche Autofohrers achterna en Fohrverbott, to´n Bispill in Italien or Frankriek, man ok in Düütschland nich mehr fohren – un annersrüm.

DLRG: Tahl vun Liddmaten op Rekord-Niveau – bet op Bremen

Bad Nenndorf: In ganz Düütschland is de Tahl vun Liddmaten de DLRG verleden Johr kladdert – bet op Bremen. In ganz Düütschland tellt de Vereen Enn 2023 na eegen Angaven mehr as 607.000 Liddmaten. De neddersässche Lannsverband blifft bi knapp 100.000 de gröttste in Düütschland. Man blots in dat Land Bremen sünd de Liddmatentahlen licht na ünnen gahn mit en beten mehr as 3000.

Staus op neddersässchen Feernstraaten sünd länger wurrn

Hannober:De Tahl an Staus op Autobahnen un Feernstraaten hett verleden Johr tonahmen, maakt de ADAC künnig. Tellt man all Staus tosamen, is dat en Längde vun binah 85.000 Kilometers. Dat sünd um un bi 30 Perzent mehr als verleden Johr. De mehrsten Staus wurrn op de A30 bi Ossenbrügge tellt. Op de A1 weer dat meist de Streck twuschen Neenkarken/Vörden un Broamschke.

Dat Weer

Un nu kiekt wi op dat Weer: In Bremen un Bremerhoben hebbt wi negen Graad, in Ollenborg un Emm sünd dat opstunns teihn Graad. Hüüt hangt de Heven full Wulken, af un an pladdert dat, na´n Avend hen an de See mehr, de Regen treckt wieder in Richten Süüden. De Wind weiht frisch mit störmschen Böen in´t Binnenland, an de See puust de Wind stark un ok dor sünd störmsche Böen mööglich vun de südwesten Kant. Dat Thermometer wiest us negen bet twolf Graad. In de Nacht wiederhen dicke Wulken un dat pladdert eerst kräftig, an Morgen warrt de Regen vun de Küst her weniger, bi söss bet veer Graad. Morgen treckt de Regen na´n süüden hen af un wi kriggt en Mix ut dicken Wulken, af un an mal en beten blau an Heven, hier un dor schafft de Sünn dat ok mal twuschen de Wulken dör to plinkern. Un dat denn bi fief bet acht Graad.

Dat weren de Plattdüütschen Narichten. Tohoopstellt vun Michael Kück. Op Platt trechtmaakt un vörleest vun Martina Brünjes.