Plattdeutsche Nachrichten Plattdüütsche Narichten vun'n 29. September 2023

CDU-Baas vun Bremen kann sick Tosamenarbeit mit de AfD vörstellen

Bremen. De Lannsvörsitter vun de CDU, Meyer-Heder, hollt dat för falsch, en Tosamenarbeit mit de AfD op kommunal Rang uttosluten. Dat geiht üm de Inhalten, see de Noch-CDU-Baas in en Snack mit buten-un-binnen. Wenn sick de CDU un AfD in´n Groten un Ganzen enig sünd, woso schall man denn nich tosamenarbeiten. Ok in de egen Partei geev dat dorop orntlich Wind vun vörn. En poor CDU-Afornte grenzen sick vun ehrn Parteibaas af. Meyer-Heder is siet 2019 Lannsvörsitter. An´n Anfang vun´n Maand hett he ankünnigt, dat he den Posten in´t tokamen Föhrjohr afgeven warrt.

Bovenschulte bekrittelt dat, wat bi de Jobcenter wohrschienlich wegstreken warrt

Berlin. De Börgermeister vun Bremen, Bovenschulte, hett in den Bunnsrat bekrittelt, dat bi de Versorgen vun Lüüd ohn Arbeit, wohrschienlich wat wegstreken warrt. Ok wenn de Arbeitsmarkt wat afkann, is dat Slamassel noch nich ut de Welt, see Bovenschulte. Man steiht vör groden Opgaven, üm Minschen för den Arbeitsmarkt fit to maken, see Bovenschulte wieder. De Bunnsrat snackt vundag över den Huusholt vun de Bunnsregerung för dat tokamen Johr. Vörsehn sünd ünner annern 700 Millionen Euro weniger för de Jobcenter.

Arbeitslosentall geiht licht torüch

Bremen. De Tall vun de Lüüd ohn Arbeit is in Bremen un Neddersassen licht na ünnen gahn. In´n Verglick to´n Maand vörher is de Quoot in´t Land Bremen üm 0,3 Perzentpunkte op 10,7 Perzent sunken. Vör allen vele junge Minschen harrn en Utbildung or en Studium anfungen. De Arbeitslosigkeit liggt dormit jümmer noch höger as in verleden´t Johr. De Agentur för Arbeit föhrt dat ünner annern op de nalaten Konjunktur torüch. In Neddersassen sunk de Arbeitslosigkeit vun 0,2 Punkte op 5,7 Perzent. Se liggt dormit akkerat in´n Bunnssnitt.

Düütsche Bahn makt ehr Angebott grötter

Berlin. Twüschen Hannover un Berlin schüllt in Tokunft fakener ICE-Töög fohrn. De Düütsche Bahn hett ankünnigt, dat se ehr Fernverkehrsangebott in Neddersassen un Bremen grötter maken warrt. Mit den nejen Fohrplan af den theinten Dezember schall dat twee Verbindungen in de Stünn twüschen Hannover und Berlin geven. Nee is ok, dat dat in Tokunft söven Fohrten an´n Dag twüschen Berlin un Amsterdam över Hannover un Ossenbrügge geven warrt. Bremen schall bavento fakener mit ICE-Töög an Hamborg un an dat Rheinland anbunnen weern.

Kramermarkt in´n Ollenborg fang an

Ollenborg. An´n Middag fang de Kramermarkt an. De Veranstalter hopen op bit to 1,5 Millionen Besökers. Op dat Festgrundstück an de Weser-Ems-Hall stahn 250 Korussells  un Buden. To den goden olen Festumtog warrt morgen mit rund 100 Festwagen un Footkoppeln rekend.

Dat Weer

Un nu noch en Blick op dat Weer: in Rodenborg (Wümm) 17, in Bremen-Mitt  un in Bremerhaben 18 un in Demorst sünd dat opstunns 19 Graad. Hüüt is de Heven vull vun Wulken. Af un an kann de Sünn dör dat en or annere Wulkenlock kieken. An´n Mittag un Namiddag kaamt dat natt vun baven. De Wind weiht en beten bit in Maten vun de süüdwesten Kant. Dat Thermometer wiest Temperaturen vun 20 bit 24 Graad. Op de Eilannen 18 bit 19 Graad. In de Nacht gifft dat in´t Emsland un an de Nordsee gröttere Wulkenlöcker. Man dat blifft dröög. Annerswo sünd enkelte Schuer möglich. In de tweeten Nachthälft kann man ok de Sterns an´n Heven sehn. Negen bit 15 Graad stahn denn op dat Thermometer. Morn gift dat en fründlichen Mischmasch ut Sünnschien un lockereren Wulken. De Dag geiht dröög to Enn. 18 bit 20 Graad stahn op dat Thermometer. Sünndag: Sünnschien, Wulken un Regen bi 18 bit 21 Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.