Plattdeutsche Nachrichten Plattdüütsche Narichten vun'n 21. September 2023

Polen stoppt Wapenlevern an Ukraine

Warschau: Polen will woll keen Wapen mehr an de Ukraine levern. Dat see Ministerpräsident Morawiecki in en Feernsehbefragen. Dorför warrt man sik nu op dat Bewapnen vun eegen Suldaten konzentreern. De Sekerheit vun de Ukraine warrt aver nich op´t Speel sett, see Morawiecki wieder. Opletzt hett dat twuschen den beiden Lännern Striet över ukrainsche Kornutfohren geven.

Scholz will Ukraine wiederhen Stütt geven

Nee York: Bunnskanzler Scholz hett den ukrainschen Präsidenten Selenskyj bi dat Drepen in Nee York wiederhen Stütt bi den Krieg gegen Russland toseggt. De Twee hebbt sik blangenbi de UN-Vullversammeln 30 Minuuten tosamen sett. Ehrder de Snackeree hebbt Scholz un Selenskyj je een Reed vör den UN-Sekerheitsraat hoolt. Selenskyj weer in sien Reed dorför, dat Düütschland en Stohl op Duer in den Sekerheitsraat kriegen schall.

Düütschland ünnerschrifft Hoochsee-Schutzafkamen

Nee York: Düütschland hett as een vun de eersten Staaten dat internatschonaale Hoochsee-Schutzafkamen ünnerschrieven. Bi den Festakt weren ok Umweltministersche Lemke un Butenministersche Baerbock dorbi. Dat internatschonaale Afkamen süht to´n eersten Mal Schutzrebete buten de allennigen Weertschopszonen vun enkelten Lännern vör.

 Bovenschulte verdeffendeert Dichtmaken vun dat Krankenhuus Links vun de Werser

Bremen: Börgermeister Bovenschulte hett de Plaans, dat Krankenhuus Links vun de Werser dicht to maaken verdeffendeert. Bi en Snack-Runn in den Stadtdeel Obervieland hebbt sik blangenbi Bovenschulte ok Gesundheitssenatorsche Bernhard un Finanzsenator Fecker den Fragen un den Gegenwind vun Börgerslüüd un Birööd vun den Bremer Süüden stellt. Dorbi hebbt se jümmer wedder ünnerstreken, dat dat nöödig weer de Krankenhuusgrupp Gesundheit Noord to saneren.

Straat „Am Wall“ för Boarbeiden dicht

Bremen: In de Bremer Binnenstadt mööt Autofohrer vun hüüt af an wedder mit Maleschen reken. Dor achter sticken Arbeiden an den Wallring för den Radpremiumweg. Dorför warrt de Wall twuschen de Krüzung Bürgermeister-Smidt-Straat, bet hen na de Wallmöhl för Autos ganz un gor dicht maakt un duert bummelig ene Week.

Dat Weer

Un nu kiekt wi op dat Weer: In Bremerhaben un Rottenborg hebbt wi 18 Graad, in Bremen un Emm sünd dat opstunns 19 Graad. Hüüt warnn övern Vörmiddag un Middag de Wulken vun dat Werser-Ems-Rebeet her dichter un dat kann jümmer wedder pladdern. In de Hauptsaak an Avend warrt dat överall deegt regnen, ok enkelte Gewidder sünd dorbi un dat denn bi 21 Graad op Wangerooge un 23 bet 25 Graad in´t Binnenland. In de Nacht sünd wiederhen dicke Wulken un Regen ünnerwegens. In de tweeten Nachthälvt warrn de Wulken in dat Werser-Ems-Rebeet weniger un dor kann dat Daak geven, an de Noordsee verenkelte Schuer. Dat Thermometer wiest us 15 Graad an de Küst un 14 bet 12 Graad in´t Binnenland. Achterna de Daak an Freedag weg is, wesseln sik Sünn un Wulken af. Hier un dor kann dat ok wedder pladdern un dat denn bi 17 Graad op de Eilannen un 19 bet 20 Graad in´t Binnenland.

Dat weren de Plattdüütschen Narichten. Tohoopstellt vun Katrin Martens. Op Platt trechtmaakt un vörleest vun Martina Brünjes.