Plattdeutsche Nachrichten Plattdüütsche Narichten vun'n 20. September 2023

Scholz verlangt Enn vun Ukraine-Krieg vör de UN

Nee York: Bunnskanzler Scholz hett bi sien Reed vör de Vereenten Natschoon Russland wedder opföddert, den Krieg in de Ukraine to stoppen. In sien Reed freit he sik doröver, dat vele Staaten sik för den Freeden insetten. To glieke Tiet wohrschaut he aver vör en Schienlösen: Freeden ahn Freeheit bedütt Ünnerdrücken. Dat mutt Russland nu ok endlich begriepen, see Scholz. He verlangt evenso en Reform vun den Weltsekerheitsraat – Afrika, Asien un Lateinamerika schüllt in Tokunft mehr Gewichten kriegen.

Düütsche Städerdag verlangt mehr Geld vun Bund un Länner för Krankenhüüs

Berlin: De Düütsche Städerdag will, dat Krankenhüüs mehr Geld vun Bund un Länner kriegen. De Präsident Lewe wüllt ünner annern en Utgliek för Krankenhüüs vunwegen de hooge Inflatschoon. Hüüt gifft dat in ganz Düütschland en „Krankenhuus-Protestdag“. In verscheeden Städer wüllt in Krankenhüüs anstellte Minschen op de Straat gahn un op ehr Laag opmerksam maaken, man ok in Hannober. Dor wüllt denn rund 300 Mitarbeiders ut de Krankenhüüs in Bremen un Bremerhaben mitmaken.

Diskuschoon üm Konzerten in dat Bremer Werserstadion

Bremen: De Bremer Wertschopsbehöörd will, dat wedder Grootkonzerten in dat Werserstadion stattfinnen. Dat steiht in en Papeer för de Weertschopsdeputatschoon an Freedag. Losgahn schall dat woll, na dat Papeer, in Sommer 2025. Wertschopssenatorsche Vogt hööpt dorbi op extra Innahmen. Football-Bunnsligist Werder Bremen is betnu gegen Konzerten vunwegen den düren Rasen.

Wietere Hölp för Minschen mit wenig Geld bi drauhenden Stopp vun Energie

Bremen: Dat Land will Minschen hölpen, den, vunwegen nich betahlte Reken, dat afdreihen vun Gas, Waater un Stroom drauht. Se köönt vun nu af an Geld ut en Nootfallfond beandragen – ok, wenn de kien Sozschalgeld kriegen. Man liekers gellt en baverste Grenz bi dat Inkamen. En Andrag op dat Geld kann bi de Verbrukerzentraal stellt warrn.

Mehr Verbreken in Bremerhaben

Bremerhaben: De Tahl vun opschrieven Verbreken is, twuschen Januar un Juli in Bremerhaben na baven kladdert. De Polizei vermellt, dat sünd 7% mehr, as in Vergliek to den Tietruum verleden Johr. Man liekers ünnerscheed sik de Johren: Blangenbi de anstiegen Tahlen bi Telefonbedregereen hebbt Brandverbreken üm 50% tonahmen, de Tahl liggt nu bi rund 150 Fäll. In Wahnungen wurr dorgegen weniger inbraken as vörher.

Dat Weer

Un nu kiekt wi op dat Weer: In Bremen, Möppen un Emm hebbt wi överall 17 Graad, in Bremerhaben sünd dat opstunns 18 Graad. Övern Vörmiddag hett vun dat Ollenborger Münsterland her, so langsam de Sünn de Nees vörn. Mit dorbi sünd ok en poor lütte Wulken, man dat blifft överall dröög. Un dat denn bi 21 Graad op Wangeroog un 23 bet 25 Graad in´t Binnenland. In de Nacht sünd wedder dünne Wulken ünnerwegens, liekers kann man ok de Steerns blinkern sehn, un dat blifft wiederhen dröög, bi 18 Graad op Spiekeroog un 17 bet 13 Graad in´n Binnenland. Morgen lacht eerst de Sünn, övern Vörmiddag warrn de Wulken vun dat Werser-Ems-Rebeet mehr un dat kann Regen geven, över Middag is dat ok in Bremen un umto sowiet. Övern Namiddag warrt dat denn överall bruddig-warm mit düchtig Regen, man ok Blitz un Donnerslag sünd dorbi. Dat Thermometer kladdert op 21 Graad op Spiekeroog un 23 bet 26 Graad in´t Binnenland.

Dat weren de Plattdüütschen Narichten. Tohoopstellt vun Michael Kück. Op Platt trechtmaakt un vörleest vun Martina Brünjes.