Plattdeutsche Nachrichten Plattdüütsche Narichten vun'n 8. Juni 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 8. Juni 2023

  • EU-Binnenminister snacken över Asylsystem
  • Watersnoot achter den Dammbröök bringt dusende Minschen in Gefohr
  • Vogt wahrschaut, dat Lüüd ut de Luftfohrt ehr Arbeit verleert
  •  Arbeiters in Groot- un Ladenhannel streiken
  • Regio-S-Bahn twuschen Veern un Bremen-Noord kriegt längere Töög
  • Dat Weer
Bild: Radio Bremen

Informationen zum Audio

EU-Binnenminister snacken över Asylsystem

Luxemburg: De EU-Binnenminister snacken just nu över en Reform vun dat europäsch Asylsystem. En Strietpunkt dorbi is, wo Migranten verdeelt warrt. Bunnsbinnenministersch Faeser wohrschaut dorvör, schüllt düsse Drapen fehlslaan, dat de apen Grenzen in de Europääsch Union villicht wegfallt.

Watersnoot achter den Dammbröök bringt dusende Minschen in Gefohr

Cherson: Achterna de Kachowka-Staudamm in de Süüdukraine twei maakt wurr, staht rund 600 Quadraatkilometers Land ünner Water, see de Behöörd. De Regionalgouverneur vun Cherson maakt künnig, dat rund twee Drüttel dorvun an de Kant vun den Dnipro sünd, wat vun Russland besett is. Op de ukrainschen Siet sünd na amtlichen Angaav rund 30 Öörd ünner Waater. Dat düütsche Technische Hölpswark hett wieldess acht Lastwaagen mit Drinkwaterfiltern un Stroommaker op´n Weg brocht, un künnig maakt, dat wiedere Hölpsfrachten nakamen.

Fraktschoon in de Bremschen Börgerschop stellen sik nee op

Bremen: Dree-een-halv Weken achterna de Börgerschopswahl, drepen sik de nee tosamensetten Fraktschoon vun SPD, Gröönen, Linken un FDP an Middag to´n eersten Mal. Dorbi warrt ok de neen Topp-Lüüd in de Fraktschoon wählt. Bi de SPD laat sik Mustafa Güngör opstellen, de betnu ok Fraktschoonsbaas weer. Ok bi de Linken wüllt Sofia Leonidakis un Nelson Janßen jümehr Amt wiedermaken. Bi de FDP lett sik Thore Schäck opstellen. Björn Fecker vun den Gröönen hett bi de Fraktschoon eerstmal wiederhen dat Leit. De Fraktschoon vun CDU un „Börgers in Brast“ warrt eerst in de tokamen Daag dorto kamen.

 Arbeiters in Groot- un Ladenhannel streiken

Hannober: In Bremen un Neddersassen sünd siet hüüt Morgen Streiks in den Groot- un Ladenhannel in Gange. Dor achter stickt, dat de Tarifverhanneln nicht vun de Steed kummt. Mit dorbi sünd ünner annern de Metro-Konzern, H&M, Sportchek un Saturn. Üm Bremen umto hett verdi de Arbeiders vun Edeka in Weyhe, Ikea in Stuhr un Obi in Posthusen to en Streik opropen. In Hannober, wo de Arbeiders all tohoop op de Straat gahn wüllt, töövt de Gewarkschop op rund 300 Deelnehmers ut Bremen. Verdi fordert bi dat Verhanneln 2,50 Euro mehr per Stünn. Lüüd in Utbildung schüllt 250 Euro mehr per Maand kriegen.

Regio-S-Bahn twuschen Veern un Bremen-Noord kriegt längere Töög

Bremen: De Bahnstiegen vun veer Statschoon langs de Regio-S-Bahnstreek twuschen den Bremer Hauptbahnhoff un Bremen-Noord warrt länger maakt. De Bahn un dat Land Bremen geven dorvör rund 2,5 Millioon Euro ut, dormit längere Töög de Statschoonen vun de RS-een anfohren köönt. Dat gellt ok för den Stadtdeelbahnhoff Oslebshusen, Borg, Lesum un Schönebeck. Düsse Haltesteeden warrn vun veelen Pendlers bruukt. De Arbeiden fangt in de tokamen Week an un duern bet in den Harvst rin.

Dat Weer

Un nu kiekt wi op dat Weer: In Bremerhaben sünd dat 14 Graad, in Em un Grootenkneten hebbt wi 15 Graad un in Bremen sünd dat opstunns 16 Graad. Hüüt fangt de Dag grau mit hogen Daak an, övern Vörmittag treckt sik de Daak över de Nordsee torüch un de Sünn schient. Vun de Wümmeniederung un de Veerner Heid bet hen na dat Ossenbrügger Land trecken opstiegen Wulken op, de denn verenkelte Schuer or Gewidder bringen. Hier un dor ok mit starken Regen, Hagel un starken Böen, anners blifft dat dröög. Dat Thermometer wiest us dorbi 15 Graad op Wangeroog, 19 Graad an de Küst un 22 bet 27 Graad in´t Binnenland. In de Nacht lösen sik de Schuers or Gewidders op. In den Norden köönt wi de Steerns funkeln sehn, in´t Binnenland sünd hier un dor en poor Wulken an Heven. Na´n morgen hen is wedder Daak ünnerwegens. Bi 13 bet 7 Graad. Freedag fangt mit lachen Sünnenschien an, wenn överhaupt sünd mal en poor lütte Wulken to sehn. Twuschen Aller, Hunte und Haas trecken opstiegen Wulken op, liekers blifft dat meist dröög, af un an kaamt mal en lütten Schuer or Gewidder rünner un dat denn bi 25 bet 30 Graad in´t Binnenland, an de Küst twuschen 19 un 24 Graad.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.

Bremen Eins Livestream & aktuelle Sendung.

Die Nacht

Die Nacht

Jetzt läuft:

Nick Straker Band A Walk In The Park
  • Jetzt läuft:

    Nick Straker Band A Walk In The Park