Plattdeutsche Nachrichten Plattdüütsche Narichten vun'n 07. Juni 2023

Staudamm-Schaden: Tonichtmaken warrt slimmer

Kiew: In süüden vun de Ukraine sünd betnu, achteran de Kachowka-Staudamm tweimaakt wurr, tominns 40 Wahnsiedlungen överswemmt. Tominns 16.000 Minschen hebbt keen Dack mehr över´n Kopp. Free Informatschoonen to de Achtergrünn vun dat Tweimaken gifft dat opstunns nich. Bi de Ielsitten vun den UN-Sekerheitsraat hebbt Russland un de Ukraine sik gegensietig de Schuld an dat Kaputtmaken vun den Staudamm geven. Ünnerdes maakt dat Technische Hölpswark Hölpsfrachten torecht. Se wüllt 5.000 Waterfilter för reinet Drinkwater in dat Katasthropenrebeet bringen.

Nee EU-Verornen för Utgliek, wenn de Bahn nich föhrt

Berlin: Wenn de Bahn nich föhrt or to laat kummt, vunwegen besünner Ümstännen, mööt Bahnünnernehmen in de EU reisen Lüüd keen Utgliek mehr betahlen. Dat steiht in en EU-Verorn, de vun hüüt af an gellt. Mögliche Ümstänn sünd to´n Bispill Nootfäll in Töög or Minschen op de Bahnspoor. Betnu kunnen reisen Lüüd  25 Perzent kregen, wenn de Bahn een Stünn to laat kummt, bi twee Stünnen weren dat sogor 50 Perzent vun den Billjetpries.

Scholz un Macron ünnerstrieken bi dat Düütsch-Franzöösch-Drepen de Fründschop

Potsdam: Bunnskanzler Scholz un Frankrieks Präsident Macron hebbt achteran en Arbeitseeten ehre enge Fründschop twuschen den Naberstaaten ünnerstreken. „Tosamen gaht wi de Opgaven vun düsse Tiet an“, maakt de Kanzler över Twitter künnig. Scholz hett för dat Eeten sien Wahnoort Potsdam utsöcht. In de Hauptsaak hebbt de Twee över Afwehr, Energie, Industrie un Klima snackt. Bi dat een or annere Thema weren sik Düütschland un Frankriek verleden Tieten nich jümmers eenig.

 Fallt de Priese för Levensmiddel?

Berlin: De Levensmiddelhannelsverband rekent bold dormit, dat de Priese för Eetwor in den Inkoopslaadens daalgaht. De Hauptgeschäftsbaas vun den Verband, Rausch, see to de Zeitungen vun de Mediengrupp Bayern: „Dat Utspann bi de Anboerpries warrt sik na un na bi de Levensmiddelpriese sichtbor maken.“ En poor Levensmiddelkooplüüd hebbt al künnig maakt, de Priese för Meiereeworen düütlich aftosenken.

Bremer Krankenhuus-Tokunft is Thema bi de Gesundheits-Deputatschoon

Bremen: De Klinikverbund GeNo will de Bremer Krankenhuussellschop en anner Struktur geven. In de Hauptsaak geiht dat dorüm, dat mööglicherwies dat Hartzentrum vun dat Krankenhuus Links vun de Werser in dat Krankenhuus Bremen-Mitt ümtrecken schall. De GeNo hett sik bi en Extra-Drapen vun de Gesundheitsdeputatschoon för den Ümtoog utspraken. Dat weer woll ünner annern weniger düer un gauer to maaken as en Saneren or en Neebo un künnt Kompetenzen an een Steed bünneln. De Stadt Bremen mutt över düsse Plaans bestimmen.

Dat Weer

Un nu kiekt wi op dat Weer: In Cuxhaben un Bremerhaben sünd dat 13 Graad, in Em 15 un in Bremen hebbt wi opstunns 16 Graad. Hüüt is twuschen Ems- un Ostfreesland bet hen na de Elvmünnen Daak in de hoge Luft ünnerwegens, de övern Vörmiddag man blots sinnig de Sünn dörlaaten. Man ok in süüden Bremen schuven sik jümmer wedder dicke Wulken för de Sünn. An Namiddag un Avend wesselns sik Sünn un en poor Schuer af. De Wind weiht flau, an de Küst in Maaten af un an ok böig vun de noorden bet noordwesten Kant. Dat Thermometer krabbelt dorbi an de Nordsee op 15 bet 20 Graad un in´t Binnenland op 21 bet 23 Graad. In de Nacht trecken Wulken in´t süüdliche Binnenland op, anners meist blots en beten Wulken un dor könnt wi denn ok de Steerns funkeln sehn. An de Nordsee kriegt wi wedder hoogen Daak un dat bi 11 bet 7 Graad. Morgen vörmiddag is dat in´t süüdliche Binnenland deelwies wulkig, meist lacht aver de Sünn. An de Küst blifft de hooge Daak dickköppig övern Vörmiddag, man vun Middag af an lacht meist de Sünn. Wieder in´t Binnenland sünd dicke Wulken dorbi, de an Namiddag un Avend Schuers or Gewidder bringen. Dat Thermometer wiest us dorbi 21 bet 26 Graad in´t Binnenland un 15 bet 20 Graad op de Eilannen.

Dat weren de Plattdüütschen Narichten. Tohoopstellt vun Jörn Haarmann. Op Platt trechtmaakt un vörleest vun Martina Brünjes.