Plattdeutsche Nachrichten Plattdüütsche Narichten vun'n 6. Juni 2023

Grodet Wehr in de Ukraine woll swar versehrt

Cherson – In dat Flach in de Südukraine, dat vun Russland besett is, is een grodet Wehr in de Nöögde vun de Front swar versehrt worrn. Darbi is ok een Waterwark rungeneert worrn. Nu sünd se bang, dat dat in dat Flach Hoochwater geven ward. De Ukraine smiet Russland vör, dat se dat Wehr sprengt hebbt – de Russen seggt dargegen, dat weern de Ukrainer. De ukrainsche Präsident Selenskyj hett den Sekerheitsraat vun’t Land tohoopropen.

Mike Pence will US-Präsident weern

Washington – De ehemalig Viez-Präsident vun de USA, Pence, will nu nee’er Präsident weern. Dat hett de 63-jöhrige ankünnigt. För de Wahlen in’n tokamen Johr hebbt sik darmit bi den Republikanern all een paar Kandidaten opstellt. Blangen den Gouverneur vun Florida, De Santis, hett ok de ehemalig Präsident Trump ankünnigt, dat he wedder in dat Amt will.

Pistorius will duller mit Indien tohooparbeiden

Nee-Delhi – De Bunnesminister för Verdeffenderen, Pistorius, will militärisch duller mit Indien tohooparbeiden. Pistorius sä in de ARD, dat Land weer een vun de wichtigst för Dütschland in’n südasiatischen Ruum. Darüm wüllt se dat Tohooparbeiden mit Indien op faste Been stellen. Pistorius is nu in Nee-Delhi mit Vertredern vun de dütsche Rüstenindustrie. Se hoopt, dat de Minister jem för nee’e Opdrääg ünner de Arms griept.

Hackerangrepen op Boo-Ünnernehmen Matthäi

Veern – De nee’e Hauptgeldgever vun Football-Bunnesligist Werder Bremen, dat Boo-Ünnernehmen Matthäi, is vun Hackern ut Russland angrepen worrn. Darbi sünd woll persönlich Daten to Kunnen un Arbeidern vun’t Ünnernehmen klaut worrn, as ok Booplaans un Reknungen. Düsse sünd to’n Deel all in’t Darknet opdükert. Dat Angrepen is all in’n März passeert. Matthäi harr dat aflehnt, op dat Foddern vun Loskoopgeld intogahn.

Hamburger SV blifft in de tweete Liga

Hamborg – De Hamborger Sportvereen speelt ok in de tokamen Saison in de tweete Bunnesliga. De Mannschupp vun Trainer Tim Walter hett an’n Abend dat Gegenspeel in de Relegatschon tohuus gegen den VfB Stuttgart mit 1 to 3 verloorn. De Hamborger harrn all dat erste Speel in de verleden Week mit 0 to 3 verloorn. De HSV geiht darmit in sien sößte Speeltiet in de Tweete Liga.

Dat Weer

Un nu een Blick op dat Weer: op Wangerooge 12, in Bremerhaven 16 un in Bremen un Deefholt sünd dat opstunns 18 Graad. Hüüt gifft dat meist veel Sünnschien, af un an treckt een paar Wulken dör bi 20 bit 26 Graad. An de Küst köhlt de Seewind de Luft af - op blots 14 bit 19 Graad. Tokamen Nacht ward dat wulkig in‘t südliche Binnenland, anners blifft dat licht wulkig un klar, dar köönt an de Nordsee Nevel un hoger Nevel optrecken. Dat Thermometer sackt op 11 bit 7 Graad. Morrn hollt sik an de Nordsee Wulkenfeller, de blots sinnig aftreckt. Meist överall anners schient aver faken de Sünn un blots een paar Wulken treckt dör. In’n Süden vun Bremen sünd mehr Wulken ünnerwegens un dar köönt an’n Namiddag un Abend ok mal Schuers daalgahn – bi 19 bit 24 Graad. An de See bi 14 bit 18 Graad. Dat weern de Narichten op Platt. Michael Kück hett se tohoopstellt. Op platt trechtmaakt un vörleest hett se Heidi Jürgens.