Plattdeutsche Nachrichten Plattdüütsche Narichten vun'n 2. Juni 2023

Bi de Bahn hebt se woll bi de Streiks den Dreih kriegt

Berlin. In den Tarifstriet bi de Düütschen Bahn rögt sick dat wedder. De Bahn hett en Vörslag to´n Snacken vun de Iesenbahn- un Verkehrsgewarkschop EVG an´n Avend annohmen. De EVG harr ehrgüstern ok dat letzte Angebott vun de Bahn aflehnt un mit nejen Warnstreiks drauht.

US-Regerung kann in Tokunft betahlen

Washington. Bi de US-Regerung hett sick dat andrauht, dat se kien Geld mehr utbetahlen köönt. Dor hebbt se nu den Dreih kriegt. Na dat Aforntenhuus hett nu ok de Senat en Gesetzvörslag  tostimmt. Bi dat Gesetz schall de böverste Grenz för Schulden in Staatshand eerstmal en Paus maken. Ohn düssen Schritt weer de US-Regerung viellicht in en poor Dag dat Geld utgahn.

AFD kriegt na Ümfraag tweetmeisten Stimmen

Berlin. In den ARD-Düütschlandtrend vun infratest dimap kummt de AfD op en nejen Rekord-Weert vun 18 Perzent. Dormit kriegt de Partei tosamen mit den Sozialdemokraten de tweetmeisten Stimmen in Düütschland, wenn an´n Sünndag Bunnsdagswahl weer. De mehrsten Stimmen kriegt na de Ümfraag de Union mit 29 Perzent.

Koalitschoonsverhanneln in Bremerhaben fangen an

Bremerhaben. An´n Namiddag fangen SPD, CDU un FDP ehr Koalitschoonsverhanneln an, üm noch mal wedder ehr Koalitschoon wieder to föhren. As de SPD vermellt geiht dat to´n Optakt vör all üm organisatoorsch Fragen un de Laag nu vun dat Geld. Teel is, dat bit Enn Juni de neje Stadtregerung steiht.

Bovenschulte makt Welt-Arv-Dag op

Bremen. In en Halve Stünn makt Börgermeister Bovenshulte op den Marktplatz de Bremer Welt-Arv-Dag 2023 op. Bit Sünndag gifft dat verscheden Veranstalten ünner annern vun den veer UNESCO-Projektscholen in´t Land Bremen. In dat Bremer Raathuus gifft dat en Utstellen to de Geschicht un den UNESCO-Schutz vun dat Raathuus un den Roland.

Dat Weer

Un nu noch en Blick op dat Weer: in Meppen 12, in Bremen-Mitt 16, in Bremerhaben 14 un in Aithe sünd dat opstunns 15 Graad. Hüüt stellt sick överall en fründlichen Mengsel ut Sünnschien un lockeren Wulken in. An´n Namiddag könen de Wulken ok mal wat dichter ween. Regen gifft dat aver nich. De Wind weiht en beten. An de Küst in Maten vun de Noord- bit Noordoosten Kant. Dat Thermometer wiest 20 bit 22 Graad. An de Küst 16 bit 19 Graad. In de Nacht lösen sick de Wulken op un man kann de Sterns an´n Heven sehn. Söven bit 12 Graad stahn denn op dat Thermometer. Morn tövt veel Sünnschien op us. Över den Dag komen en poor lockere, mal wat dichtere, Wulken dorto. Dat blifft aver dröög bi 20 bit 23 Graad. An dat Wattenmeer 17 bit 19 Graad. Sünndag: En drögen Wessel ut Sünnschien un lockeren Wulken bi 18 bit 22 Graad. An de Küst 15 bit 17 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Markus Weise.