Plattdeutsche Nachrichten Plattdüütsche Narichten vun'n 30. Mai 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 30. Mai 2023

  • Se snackt in de Ampel wedder över dat Energiegesett för Hüüs
  • Moskau mellt Angrepen mit Drohnen
  • Dree Dode dör Füer in Krankenhuus in Österriek
  • Koalitschonsverhanneln in Bremen geiht loos
  • Togverkehr twüschen Bremen un Bremerhaben löppt nich rund
  • Dat Weer
Bild: Radio Bremen

Informationen zum Audio

Se snackt in de Ampel wedder över dat Energiegesett för Hüüs

Berlin – De Ampelkoalitschon befaat sik hüüt nochmol mit dat Heizungsgesett, över dat nich all een Meen sünd. Bunneswertschuppsminister Habeck will mit SPD, Grönen un FDP rutfinnen, an wecken Stäen dat Energiegesett för Hüüs geännert weern kann. Mag ween un se ännert wat bi den Termin, wann dat loosgeiht, bi Heizungen, de in Tokunft noch verlöövt sünd un bi de staatlichen Hölpsgeller. Se wüllt den Plaan vun dat Gesett noch vör de Sommerpaus in den Bunnesdag bringen. De FDP blockeert dat bitnu.

Moskau mellt Angrepen mit Drohnen

Moskau – Russland smiet de Ukraine vör, dat se de Haupstadt Moskau an’n fröhen Morrn mit Drohnen angrepen hett. Dar is woll nümms versehrt worrn, man een paar Hüüs sünd kaputt - dat russische Ministerium för Verdeffenderen snackt vun een Terrorakt. Tohoopnahmen harrn se acht fernlenkte Drohnen tweimaakt. Bewiesen hett Russland dat man nich, wat se de Ukraine vörsmiet. Ok de ukrainsche Hauptstadt Kiew is in de Nacht wedder orrig vun russischen Drohnen bombadeert worrn, dat vermellt Börgermeister Klitschko. Darbi is woll tominnst een Minsch üm’t Leven kamen.

Dree Dode dör Füer in Krankenhuus in Österriek

Wien – Dör een Füer in een Krankenhuus in Mödling in Österriek sünd in de verleden Nacht dree Minschen üm’t Leven kamen. Bi de Doden hannelt sik dat üm Patschenten, ward vermellt. 90 annere Patschenten harrn se wegen dat Füer verleggen möten. Woso dat brennt hett, weet se noch nich. Dat Füer is woll in een Kamer op de Statschon för innere Medzin utbroken. Middewiel is dat Füer ut.

Koalitschonsverhanneln in Bremen geiht los

Bremen – Goot twee Weken na de Börgerschaftswahl in Bremen fangt SPD, Gröne un Linkspartei vundaag mit dat Koalitschonsverhanneln an. Se wüllt sik an’n Namiddag tohoopsetten, üm fasttoleggen, wat se in ehr Regeernarbeit babenan stellen wüllt un woans de wietere Fohrplan bi dat Verhanneln utsütt. Bremens Börgermeister Bovenschulte meent, dat dat bi de Flachs Verkehr, Kinneroppassen, Binnen-Sekerheit un Börgerservice beter weern schall. Bit Anfang Juli schall de nee’e Koalitschonsverdrag fardig sien.

Togverkehr twüschen Bremen un Bremerhaben löppt nich rund

Bremen – Booarbeiten behinnert vun hüüt an den Togverkehr twüschen Bremen un Bremerhaben. Een Maand lang mööt sik Pendler un Lüüd, de mit de Bahn reist, darop instellen, dat Töög utfallt un to laat kummt. Ünner annern sett de Nordwestbahn een paar Verbinnungen af. All siet twee Weken fallt ok Töög vun de Dütsche Bahn ut. Mehr darto köönt Se op butenunbinnen.de nalesen.

Dat Weer

Un nu een Blick op dat Weer: op Wangerooge 11, in Bremen, Bremerhaven un Deefholt sünd dat opstunns 12 Graad. Hüüt breedt sik vun de Nordsee her erstmal faken dicke Wulken na Süden hen ut. Bit op een paar Druppen or een beten Niesel blifft dat aver dröög. An’n Namiddag un Abend lockert de Wulken vun’t Elv-Werser-Dreeeck her wedder sinnig op un de Sünn kann mal rutkieken – bi 13 Graad op de Eilanden un 15 bit 18 Graad in’t Binnenland. Tokamen Nacht wannert de letzten Wulken to de Nedderlannen hen af. Darachter klaart dat op or is blots licht wulkig. Dat Thermometer sackt op 12 bit 10 Graad an’t Wattenmeer un 8 bit 6 Graad in’t Binnenland. Morrn ward dat Weer ganz anners: de Sünn schient meisttiets bi blots een paar Wulken, Regen fallt nich – bi 14 bit 15 Graad op Langeoog, 17 Graad in Bremerhaben, 22 in Bremen un 23 Graad in Nienborg. Dat weern de Narichten op Platt. Jörn Haarmann hett se tohoopstellt. Op platt trechtmaakt un vörleest hett se Heidi Jürgens.

Bremen Eins Livestream & aktuelle Sendung.

Der Abend mit Norbert Kuntze

Der Abend

Jetzt läuft:

Bryan Adams Summer Of '69
  • Jetzt läuft:

    Bryan Adams Summer Of '69