Plattdeutsche Nachrichten Plattdüütsche Narichten vun'n 26. Mai 2023

Karstadt-Filiaal in Bremen blifft

Bremen. De Karstadt-Filiaal in de Obernstraat warrt doch nich dicht makt. Doröver sünd dat Ünnernehmen Galeria Karstadt-Kaufhof un de Huus-Egneer, de Zech-Stiftung, op en gemesam Poppier övereens kamen. All Kündigungen, de al utspraken weern, schöölt wedder trüchnahmen weern. Dat see en Bedrievsratsprekersch to buten un binnen. Man de Platz to´n verköpen schall lütter makt weern.

Bunnsdag bringt Pleegreform op´n Weg

Berlin. De Bunnsdag hett en Pleegreform op´n Weg broch. Dat Gesetz süht Verlichtens för Lüüd, de Tohuus or in Heimen pleegt weern mööt, vun dat tokamen Johr an vör. Dat is wegen de toletzt bannig stark anstiegen Kosten. För dat Geld schöllt de Bidrääg för de Pleegversekerung al to´n eersten Juli stiegen. Bet op bi Familien mit en poor Kinnern, de wat lütter sünd.

Linke stimmen in Bremen för Koalitschoonsverhanneln mit SPD un Grönen

Bremen. De Linke hett op en Parteidag mit den allermeisten Stimmen för Koalitschoonsverhanneln mit SPD un Grönen för en neje Lannsregerung stimmt. De SPD hett al Middeweken för en Wiedergahn vun de Koalitschoon, de dat bit nu gifft, stimmt. De Grönen willt morgen doröver afstimmen. Wenn de ok dorför sünd, könen de Drapen al an´n Dingsdag anfangen.

Museumsschipp „Elv 3“ warrt in Bremerhaben wedder trecht makt

Bremerhaben. Dat Museumsschipp „Elv dree“ warrt op de Bredo-Warft wedder trecht makt. Nu is dat Schipp in de Warft ankamen. Dat 115 Johr old Füerschipp weer siet den fröhen Morgen ut den Museumshaven in den Fischereehaven sleppt wurren. De Överfohrt leep bi kloren Weer, binah ohn Wind, see en Sprekersch vun dat düütsche Museum för Schipp-Törns to buten un binnen. Dat weer nödig, dormit dat Schipp dör vele enge Dörchfohrten un vele Slüsen fohren kunn. Op de Warft warrt de „Elv dree“ op Schick broch. Dorna geiht dat trüüch in den Museumshaven. Dor schall dat fröher Füerschipp to´n Utstellens- un Veranstaltensschipp umbot weern.

Scholen in Bremen geven bald ümsünst Tampons un Binnen ut

Bremen. All Scholen in de Stadt Bremen dörven in Tokunft ümsünst Tampons un Binnen utgeven. Dat hett dat Bildungsressort entscheden un wiest op dat Resultaat vun en Testloop. Bi dat harrn acht Scholen in de Stadt mitmakt. De Kosten vun üm un bi dartig Euro in´n Maand för de Menstruatschoons-Artikels övernimmt de Behöörd. Warrt seggt, dat ok dat Opstellen vun en Automat vun eenmal 200 Euro per School betahlt warrt.

Dat Weer

Un nu noch en Blick op dat Weer: in Nienborg ölven in Bremen-Mitt thein, in Bremerhaben ölven un in Worpsweed sünd dat opstunns negen Graad. Hüüt schient mal neven lockeren, mal neven dichten Wulken de Sünn. De Luft is wiederhen köhl för de Johrstied. De Wind weiht en beten bit in Maten mit frischen, enkelten ok starken Böen vun de noorden Kant. 12 bit 19 Graad stahn denn op dat Thermometer. In de Nacht sünd blots en poor Wulken an´n Heven. De Steerns kann man ok funkeln sehn. An´n Morgen kann sick hier un dor Nevel bilden. Dat Thermometer wiest dree bit negen Graad. Morn fangt de Dag to´n Deel gries, mit Nevel or mit Sünnschien an. Af Vörmiddag un Middag lacht blots noch düchtig de Sünn vun baven. Dat schall 17 bit 22 Graad weern. An de Küst man blots 13 bit 16 Graad. Pingstsünndag: Neven Sünnschien en poor lockere or dünne Wulken. Meisttiets dröög. Hier un dor is en Schuer möglich. Dat Thermometer wiest 18 bit 21 Graad. An de Küst 13 bit 17 Graad.

Dat weern de Narichten op platt. Tohoopstellt hett Gabriele Intemann. Op Platt trechtmaakt un vörleest vun Markus Weise.