Plattdeutsche Nachrichten Plattdüütsche Narichten vun'n 25. Mai 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 25. Mai 2023

  • Bremer SPD will mit Gröönen un Linken över Koalitschoon verhannneln
  • Tina Turner is doot
  • Ron DeSantis will US-Präsident warrn
  •  Bahn un EVG verhanneln wieder
  • Dat Bremer Krankenhuus Links vun de Werser warrt mööglicherwies dicht maakt
  • Dat Weer
Bild: Radio Bremen

Informationen zum Audio

Bremer SPD will mit Gröönen un Linken över Koalitschoon verhannneln

Bremen: De Bremer SPD will in de tokamen Johren wedder mit de Gröönen un de Linken regeern. Dat hett de Lannsvörstand vun de Partei an Avend eenstimmig beslaten. Wüllt de Gröönen un de Linken dat ok, schüllt in de tokamen Week dat Verhanneln över en Koalitschoon los gahn. Bremens Börgermeister Bovenschulte see, bi de Inhoolte vun den Partein is de Snittmengde grötter as bi de CDU. De Bremer Christdemokraaten beduern de Afsaag.

Tina Turner is doot

Zürich: US-Singersche Tina Turner is doot. Güstern is se na lange Krankheit in en öller vun 83 Johren, in ehr Huus, in de Nöögde vun Zürich, sturven. Turner weer en vun de Pop-Künstler de över veele Johren weltwied wat kloorkregen hett. In ehre Karrieer hett se över 180 Millioon Platten verköfft. Weltwied is de Musikbranchen in Truer. Vör dat Huus vun Tina Turner hebbt Fans al in de Nacht Bloomen afleggt un Lichten opstellt.

Ron DeSantis will US-Präsident warrn

Miami: De Gouverneur vun den US-Bunnsstaat Florida, Ron DeSantis, hett sik för de Wahl för den US-Präsidenten opstellen laten. De Republikaner is totiets de Wedderpart mit de besten Schangsen in sien egen Partei, in den Wettstriet üm dat Präsidentenamt, blangenbi den Ex-US-Präsidenten Trump. Wer för de republikanische Partei bi de Wahlen in dat tokamen Johr in´t Rennen geiht, warrt sik al bi de Vörwahlen rutstellen.

 Bahn un EVG verhanneln wieder

Berlin: De Düütsche Bahn un de Gewarkschop EVG verhanneln wieder över nee´e Tarifverdrääg. De Verhannelnsbasen sitten eerstmal bet vundaag an een Disch. Of reisen Lüüd wedder mit Streiks un Utfallen bi de Iesenbahn reken mööt, hangt dorvun af, wat bi de Snackeree rutsuert. Mööglich is denn ok, dat de Mitarbeiders för en unbestimmte Tiet ophöört to arbeiden. Över Inhoolden vun de Gespräken is betnu nix künnig wurrn.

Dat Bremer Krankenhuus Links vun de Werser warrt mööglicherwies dicht maakt

Bremen: Dat Krankenhuus Links vun de Werser warrt mööglicherwies ganz dicht maakt, mellt de Werser Kurier. Dorachter stickt de Plaan, dat de Hartmedizin, de betnu as wichtigst Afdeelen för dat Krankenhuus gellt, an den Standoort Bremen-Mitt verleegt warrn schall. De Gesundheit Noord as Dackverband wüllt betnu noch nich seggen of dat all stimmt. In dat Krankenhuus arbeiden rund 1000 Mitarbeiders. De Bedrievsraat plaant för hüüt en Demonstratschoon.

Dat Weer

Un nu kiekt wi op dat Weer: In Bremerhaben hebbt wi 12 Graad, in Bremen, Möppen un Emm sünd dat överall 13 Graad. Hüüt eerst dicke Wulken, hier un door is dat daakig un dat kann ok mal dröppeln. Meist blifft dat aver dröög. An de Küst lacht de Sünn al an Morgen, över Middag rieten de Wulken överall op un de Sünn hett jümmer mehr de Nees vörn. De Wind weiht en beten bet in Maaten mit frischen an de Küst ok mit starken Böen vun de noorden Kant. Dat Thermometer wiest us 12 Graad an de Küst un 15 bet 18 Graad in´t Binnenland. In de Nacht seht wi de Steerns blinkern, blots twuschen Ems un Werser is villicht mal en lütte Wulk an Heven. Man överall is dat dröög. Dat warrt frisch an de Küst mit 10 Graad, in´t Binnenland mit 9 bet köhlige 3 Graad. Morgen lacht den ganzen Dag de Sünn. Af un an treckt mal en Wulk vörbi, liekers blifft dat överall dröög un dat denn bi 12 Graad op de Eilannen un 14 bet 19 Graad in´t Binnenland.

Dat weren de Plattdüütschen Narichten. Tohoopstellt vun Michael Kück. Op Platt trechtmaakt un vörleest vun Martina Brünjes.

Bremen Eins Livestream & aktuelle Sendung.

Der Morgen

Jetzt läuft:

Vanessa Paradis Joe Le Taxi
  • Jetzt läuft:

    Vanessa Paradis Joe Le Taxi