Plattdeutsche Nachrichten Plattdüütsche Narichten vun'n 19. Mai 2023

G7-Staaten besinnen sick an de Folgen vun Atombomben-Afsmeet

Hiroshima. De Regerungsböversten vun de G Söven - Staaten hebbt bi ehr Top-Drapen an de gräsigen Folgen vun dat Afsmeten vun Atombomben över Japan in´n August 1945 dacht. Hiroshima weer bi den US-Angreep in´n tweeten Weltkrieg binah heel un deel toschannen makt wurren. In´n Middelpunkt vun dat Drapen steiht de Ümgang vun de Industriestaaten vun de westen Kant mit Russland un China. Bavento schall de Ukraine noch mehr Hölp bi de Afwehr gegen Russland versekert weern.

Autofohrer jaagt in´n Vatikan dör Door bit to Papst-Residenz

Rom. En wohrschienlich bregenklöterigen Mann is mit sien Auto in den Vatikan rinfohren. He hett dordör en Grootalarm utlöst. De Mann joog an´n Avend mit sien Wagen dör en Kontrollpunkt. En Wachmann schoot op den Wagen, kunn em aver nich ophollen, so dat de Fohrer bit vör de Ingangsdöör vun den Apostolschen Palast, dat Huus vun den Papst in de Vatikanstadt, keem. De Mann wurr fastnahmen.

SPD snackt to´n eersten Mal na den Wahlsieg, woans se sik enig warrn kunnen

Bremen. De SPD snackt an´n Vörmiddag to´n eersten Mal na den Wahlsieg mit den Grönen, woans se sik enig warrn kunnen. För den Namiddag is denn en Drapen mit den Linken ankünnigt. Neven en Wiedergahn vun de root-gröön-root Maatschaft is ok en grode Koalitschoon mit de CDU möglich. Mit de CDU will sick de SPD morgen drapen. De Sozialdemokraten hebbt bi de Wahl för de Bremschen Börgerschaft de mehrsten Stimmen kregen.

Neddersassen will ole Bahnstreken wedder in Gang bringen

Hannover. Dat Land Neddersassen hett en nejet Programm anfungen un will ole Bahnstreken wedder in Gang bringen. 27 Streken un Strekenafsnidden wurren vun en poor Kommunen för dat Programm nee anmellt. Dat toständige Wirtschaftsministerium in Hannover prövt nu, welke vun den Linien sick viellicht reken kunnen. Kloor is, dat nich all vun de anmellden Streken wedder in Gang bröcht weern kunnen.

En poor Unfallen mit Alkohol an Himmelfohrt

Ollenborg. An´n Himmelfohrtsdag keem dat in Neddersassen to en poor Insatzen vun de Schandarms. De Polizei Ollenborg vermellt en poor Insatzen, bi den Alkohol en Rull speel. Bi Cloppenborg geev dat en legen Fohrradunfall, bi den en Radfohrer op Leven un Dood to Schaden kamen weer. Un bi en Autounfall op de Bunnsstraat 214 bi Holdrup hebbt twee Minschen böös wat afrkregen, as en Fohrer, de wat drunken harr, mit se ehr Auto tosamenstött. De Polizei-Leitsteden in Bremen un Bremerhaben harrn kien typisch Vadderdag-Insatzen to verteken.

Dat Weer

Un nu noch en Blick op dat Weer: in Demorst 15 in Bremen-Mitt 13, in Bremerhaben 12 un in Hooksiel sünd dat opstunns ölven Graad. Hüüt schient an´n Vörmiddag bi lockeren Wulken överall de Sünn. An´n Namiddag un Avend kamen en poor opstiegen Wulken dorto. Dat blifft dröög. De Wind weiht in Maten mit frischen, an de Küst hier un dor ok starken Böen vun de Nordoosten bit Oosten Kant. Dat Thermometer wiest 14 bit 20 Graad. In de Nacht sünd en poor Wulken an´n Heven. Man de Sterns funkeln ok dor baven. Dat blifft dröög bi söss bit elven Graad. Morn lacht neven en poor Wulken de Sünn vun baven. Af Middag trecken en poor mehr Wulken op. Man dat blifft dröög bi 18 bit 20 Graad. An de Waterkant 15 bit 17 Graad. Sünndag: Eerstmal överall Sünnschien. An´n Namiddag un Avend hier un dor deegte Regenschuer mit Blitz un Donnerslag, vun Dörp to Dörp is ok rusig Weer mit Hagel möglich. 22 bit 25 Graad stahn denn op dat Thermometer.

Dat weern de Narichten op platt. Tohoopstellt hett Sven Weingärtner. Op Platt trechtmaakt un vörleest vun Markus Weise.