Plattdeutsche Nachrichten Plattdüütsche Narichten vun'n 16. Mai 2023

Henrichten vun Minschen is mehr worrn

Berlin – De Tall vun Minschen, de henricht worrn sünd, is dütlich na baben kladdert. Dat vermellt Amnesty International. In ehrn Bericht to de Dodesstraaf op de hele Welt schrievt de Minschenrechtsorganisatschon wat vun tominnst 883 Fällen, wo dat Henrichten in’t verleden Johr in 20 Lännern vun Gerichten anordnet worrn weer. Vör allens liggt dat an de Laag in’n Oosten Blangenbi un in Nordafrika. Darto kummt dusende Fälle vun Henrichten in China, de aver ünner de Deek hollen ward, weet Amnesty.

Toveel Gewalt vun de Polizei ward meist nich ünnersöökt

Frankfurt an’n Main – Wenn dat toveel Gewalt vun de Polizei geven hett, ward dat meist nich nochmal ünnersöökt un ankeken. Dat is bi een Studie vun de Goethe-Universität in Frankfurt an’n Main rutsuert. De Forscher hebbt mehr as 3.300 Minschen befraagt, de vun toveel Gewalt bedrapen weern. Düsse Fälle ward meist nich bi de Polizei mellt. Blots 14 Perzent vun de Lüüd, de bedrapen weern, seen, dat dat in ehrn Fall een Straafverfohren geven hett. To mehr as 90 Perzent hebbt de Staatsanwaltschaften düsse Verfohren denn instellt.

SPD söökt een Koalitschonspartner

Bremen – De Bremer SPD will na ehrn Wahlsieg bi de Börgerschaftswahl noch in düsse Week mit annern Parteien snacken. De Sotschaldemokraten köönt sik utsöken, of se de Koalitschon mit den Grönen un Linken wieterföhrn wüllt or of dat to een Grode Koalitschon mit de CDU kummt. Man darna süht dat nich ut. För de SPD wees dat wichtig, mit wen se mehr vun ehr eegen Themen dörsetten kann, sä SPD-Baas Wetjen.

Stimmen in Bremerhaben sünd uttellt

Bremerhaben – In de Seestadt sünd de Stimmen vun de Börgerschaftswahl all uttellt. Dat Ergevnis vun Amts wegen liggt nu vör: de SPD is de stärkste Kraft mit 29 Perzent. Op Platz 2 sünd de Börger in Brass mit 22,7 Perzent. In een paar Stadtdeelen hebbt se de mehrsten Stimmen kregen. De rechtskonservative Wählerbund will in den nöchsten Weken mit de Partei Bündnis Dütschland tohoopgahn. De CDU hett licht verloorn un liggt op Platz 3. De Grönen hebbt dütlich verloorn, Linkspartei un FDP treckt wedder in’t Parlament in.

Steken vun Teken draut ok in Gaarns or Parks

Hannober – Dat Lannesgesundheitsamt vun Neddersassen wahrschaut vör dat Steken vun Teken ok in’n Stadtpark or in’n Gaarn tohuus. De Gefohr draut nich blots in‘n Woold or an’n Feldrand. To‘n Beginn vun de Holtbuck-Tied, wo dat warmer ward un ok bruttig ween kann, sünd de Parasiten veel ünnerwegens. In Neddersassen gellt de Landkreis Emsland as Risikorebeet för de gefährlich Krankheit FSME.

Dat Weer

Un nu een Blick op dat Weer: op Wangerooge 9, in Bremen, Bremerhaven un in Deefholt sünd dat opstunns 11 Graad. Vundaag sünd mal lockere, mal dickere Wulken an’n Heben un dat kann ok mal schuern. Dat ward dütlich köhler mit 12 bit 15 Graad. Tokamen Nacht is dat mal klaar, mal dick wulkig. Dat kann erst noch natt vun baben kamen, besünners an de Küst. Meist blifft de Nacht aver dröög. Dat Thermometer sackt op 8 bit 5 Graad. Morrn geiht dat wieter mit‘n Wessel vun Sünnschien un Wulken, aver faken dröög bi 9 bit 14 Graad. Donnerdag blangen een beten Sünn wedder Wulken, aver meist blots af un an mal Regen – bi 11 bit 16 Graad. Dat weern de Narichten op Platt. Sven Weingärtner hett se tohoopstellt. Op platt trechtmaakt un vörleest hett se Heidi Jürgens.