Plattdeutsche Nachrichten Plattdüütsche Narichten vun'n 15. Mai 2023

SPD hett de Nees bi de Börgerschopswahl in Bremen vörn

Bremen: De SPD hett de Nees bi de Börgerschopswahl vörn. Na dat, wat vun infratest dimap utrekent wurr, kaamt de Sozialdemokraten op binah 30 Perzent – un liggen dormit rund veer Perzent vör de CDU. Bremens Börgermeister Bovenschulte hett künnig maakt, dat he mit all demokraatschen Parteien snacken will. En mööglichen Partner künnt de CDU ween – jümehr Toppkandidaat Imhoff maakt kloor, dat sien Partei praat steiht för en groote Koalitschoon. En wiedere Mööglichkeit is in de root-gröön-roden Regeern wieder to maken.  

In de Türkei mutt woll en Prickwahl her, üm den nee´en Staatsbaas fasttoleggen

Ankara: Bi de Präsidentenwahl in de Türkei warrt dat woll op en Prickwahl rutlopen. Achteran all Stimmen uttellt wurrn kummt Erdogan, de bet nu in dat Amt weer, op um un bi 49 Perzent un hett dormit nich afsluut de mehrsten Stimmen. Sien Wedderpart Kilicdaroglu hett 45 Stimmen. Dat weer dat eeste Maal, dat een Prickwahl nödig weer, siet de Präsident 2014 direktemang wählt wurr. De Prickwahl schall an 28. Mai stattfinnen.

Selenskyi besöcht ok London

London: De ukrainsche Präsident Selenskyi maakt wieder mit sien Europa-Reis. Sülvst se he, dat he hüüt na Grootbritannien flüggt. In London will he den Premierminister Sunak drapen. Achteran he güstern in Düütschland to Besöök weer, is de ukrainsche Präsident na Paris reist. Dor hett he Frankrieks Staatsbaas Macron drapen, he hett de Ukraine toseggt, wieder Stütt to geven un wiedere Wapenfrachten to levern.

Bahn föhrt meist wedder normaal

Bremen: Achteran de Warnstreik vun de Iesenbahn- un Verkehrsgewarkschop (EVG) afseggt wurr, schüllt an Maandag doch düütlich mehr Töög na wiet weg föhren as betnu annahmen. De Bahnbedriev is woll an Morgen „meist na Plaan lopen“, so dat rund 90 Perzent vun de normal plaanten Töög an Maandag föhrt, see de Düütsche Bahn. Dingsdag warrt all Töög de plaant sünd ok praat stahn. Man ok de Noordwestbahn un de Metronom föhrt al hüüt meist na Plaan.

Motorradfohrer starvt bi Sandbahnrennen

Rottenborg: En 70-Johr old Motorradfohrer is bi en Sandbahnrennen sturven. De Polizei vermellt, dat de Mann vun de Bahn rünner keem un denn mehr as eenmal över Kopp gahn is. Dat Renn wurr vun en Motorspoortklub utricht. Wo dat to düssen Unfall keem, warrt nu nip un nau ankeken.

Dat Weer

Un nu kiekt wi op dat Weer: In Emm hebbt wi 10 Graad, in Bremen un Bremerhaben 13 Graad un in Rottenborg sünd dat opstunns 15 Graad. Hüüt fangt de Dag mit lachen Sünnenschien an, hier un dor is ok mal en Wulk an Heven. Över Vörmiddag warrn de Wulken mehr, an Namiddag kann dat pladdern or gewiddern. Vun Flach to Flach kaamt dor ok Gewaltschuer or Hagel vun baven. De Sünn is aver liekers dorbi. De Wind weiht eerst flau vun de noordwesten Kant, an de Küst frisch. An Namiddag sünd starke, man ok stievige Böen dorbi. Dat Thermometer krabbelt op 17 bet 21 Graad, an de Küst op 13 bet 16 Graad. In de Nacht seht wi eerst de Steerns blinkern, denn trecken aver vun dat Emsland her dicke Wulken op, de ok mal Natts vun baven smieten un dat denn bi 10 bet 7 Graad. Morgen wesseln sik Sünn un Wulken af, övern Dag sünd ok Schuers mööglich. In de Hauptsaak an de Küst un de Ems. In Vergliek to de verleden Daag warrt dat köhlig bi 12 bet 14 Graad.

Dat weren de Plattdüütschen Narichten. Tohoopstellt vun Gabriele Intemann. Op Platt trechtmaakt un vörleest vun Martina Brünjes.