Plattdeutsche Nachrichten Plattdüütsche Narichten vun'n 9. Mai 2023

EU-Kommischoonspäsidentsch in Kiew ankamen

Kiew: EU-Kommischoonspräsidentsch von der Leyen is an Morgen för en Besöök in Kiew indrapen. Se will dor ünner annern mit den Präsidenten Selenskyj symboolsch den Europadag fiern. Butendem sünd Snacken över de Politik plaant. Dorbi geiht dat ok üm de Fracht vun Monitschoon, üm wiedere finanzielle Stütt un den Plaan dat de Ukraine bi de EU mitmaakt. Von der Leyen weer al fief Mal in de Ukraine, siet de russche Angreepskrieg in de Ukraine losgung.

Dokters vun kommunaalen Krankenhüüs laat de Arbeit liggen

Frankfurt am Main: In ganz Düütschland mööt Patschienten hüüt in kommunalen Krankenhüüs mit Maleschen reken. In den Tarifstriet üm mehr Geld hett de Gewarkschop Marburger Bund Dokters dorto opropen, den ganzen Dag de Arbeit liggen to laaten. Mit dorbi sünd man ok de kommunalen Krankenhüüs in Bremen un Ollenborg. In all Krankenhüüs schall dat en Minnst- un Nootfallversorgen geven. Ut Operatschoon de plaant weern, warrt aver eerstmal nix.

49-Euro-Fohrkort nu al en Renner

Berlin: De 49-Euro-Fohrkort lööpt koort nadeem se in den Verkoop keem allerbest. Rund söven Millioon Minschen hebbt de Maandskort siet den Verkoopstart köfft, see de Branchenverband VDV. Dorbi sünd woll twee Millioon Kunnen, de betnu noch keen Abo för den apen Regionaalverkehr hatt harrn. Dat Düütschland-Billjet is siet den 1. Mai to kregen.

Arbeit in dat Bremer Stahlwark schüllt tokunftsseker warrn

Bremen: Dat Bremer Stahlwark will sien Produktschoon klimafründlich maken, ahn dat Arbeitssteden wegfallt. Dorop hebbt sik de Mudderkonzern ArcelorMittal mit de IG Metall eenigt. De Gewarkschop hett goot twee Millioon Euro Fördergeld ranschafft, üm de binah
3000 Mitarbeiters bi dat Bremer Wark an de neen Anlaagen uttobillen.

Autobahn 27 na en LKW-Unfall för en tietlang dicht

Veern: Op de Autoahn 27 in den Ruum Veern hett dat en bösen Unfall geven. Dorbi sünd de Fohrer vun twee Opliggertöög swoorversehrt worrn. En vun de twee Lastwagen harr Swiensköppe laden, de sik vunwegen den Unfall op de Fohrbahn verdeelt hebbt. För dat Bargen weer de A27 twuschen den Affohrten Veern-Oost un Veern-Noord en tietland dicht.

Dat Weer

Un nu kiekt wi op dat Weer: In Bremen, Bremerhaben un Rottenborg sünd dat 14 Graad un in Emm hebbt wi opstunns 15 Graad. De Dag fangt fründlich an, man de Wulken warrn övern Vörmiddag jümmer mehr, an Namiddag kann dat denn ok pladdern. Hier un dor ok mit Blitz un Donnerslag. In Richten Elv blifft dat bet an Avend dröög. De Wind weiht flau bet in Maaten, wenn dat örntlich pladdert ok stark böig vun de südoosten bet oosten Kant. Dat Thermometer krabbelt op 16 Graad op de Eilannen un op 19 bet 22 Graad in´t Binnenland. In de Nacht blifft de Heven vull Wulken un dat schuert jümmer wedder. An morgen warrt de Regen weniger un dat denn bi 13 bet 11 Graad. Middeweken meist dichte Wulken un to´n deel kräftige Schuers, de aver över vörmiddag in Richten Elv aftrecken. Achterna blifft dat eerstmal dröög un wi seht ok mal blau mang de Wulken. An Namiddag regent dat wedder, hier un dor sünd ok mal Blitz un Dunnerslag dorbi. Dat Thermometer wiest us 14 Graad op Wangeroog un 16 bet 18 Graad in´t Binnenland.

Dat weren de Plattdüütschen Narichten. Tohoopstellt vun Katrin Martens. Op Platt trechtmaakt un vörleest vun Martina Brünjes.