Plattdeutsche Nachrichten Plattdüütsche Narichten vun'n 5. Mai 2023

Wahlümfraag süht SPD bi Bremer Börgerschopswahl vörn

Bremen. Goot ene Week vör de bremsche Börgerschopswahl, liggt de SPD vörn. Dat is bi en Ümfraag vun Infratest dimap in den Opdrag vun Radio Bremen rutsuert. De Sozialdemokraten kaamt dorna op 30 Perzent, de CDU op 27 Perzent un de Linken liggen bi 10 Perzent. De FDP liggt bi 6 Perzent, se un würrn dormit wedder in dat Lannsparlament intrecken. De Grönen sünd torüchfullen bi ehre Wählers un würrn in Momang blots op 13 Perzent kamen. De rechtskonservative Partei „Börgers in Brast“ würrn, na de Ümfraag, op 9 Perzent kamen – dat weer en Rekordresultat.

Wedder Dode na Schööt in Serbien

Belgrad: Twee mal binnen twee Daag hett dat in Serbien en Angreep mit Schöötwapen geven. En Mann hett süüden de Hauptstadt Belgrad op en Grupp vun Minschen schaten, tominns acht sünd dorbi sturven. Wiedere darthein Lüüd sünd an Liev to Schaden kamen. Al Middeweken hett en 13-johriger an ene School in Belgrad acht Kinner un en Wachmann dootschaten.

ARD-Düütschlandtrend: De Mehrsten in Düütschland sünd mit de Arbeit vun de Bunnsregeern nich tofreden

Köln: Mehr as tweedrüttel vun de Düütschen sünd opstunns mit de Arbeit vun de Bunnsregeern nich tofreden. Dat is bi den aktuellen ARD-Düütschlandtrend vun Infratest dimap rutkamen. In düsse Ümfraag wurrn man ok Fraagen to dat Thema Towannern stellt. Dorna stütten binah 80 Perzent dat Verlangen vun Bunnsbinnenministersch Faeser, Asylverfohren in Tokunft an de Butengrenz vun de EU to maken.

Ünnersöken achter en Brand mit Doden in Flensburg

Flensburg. Achteran dat groote Füer in en Mehrfamilienhuus in Flensburg, löppt dat Sööken, woso dat brennt hett. Bi dat Füer sünd güstern, na aktuellen Informatschoon, en Kind un en utwussen Minsch sturven. Wiedere negen Minschen sünd an Liev to Schaden kamen. De Füerwehr bekriddelt, dat se dör neeschierige Lüüd bi ehre Arbeit böös bremst wurrn.

Boostart för den tweeten Afsnitt vun den Fohrrad-Premium-Weg

Bremen: Hüüt fangt in de Bremer Binnenstadt de Bo vun den tweeten Afsnitt för den Fohrrad-Premium-Weg an. Plaant is en dörchgahns Weg, wo Radfohrers gau vun hier na dor kaamt, vun Bremen-Nord bet na Mahndorf. Woll bet Mitt Juni mööt för den Bo en Deel vun de Straat „Am Wall“ un en Deel vun de Bremer Binnenstadt dicht maakt warrn. Rund üm de Bosteed umto mutt man mit Staus reken.

Dat Weer

Un nu kiekt wi op dat Weer: In Emm hebbt wi negen Graad, in Bremen, Bremerhaben un Möppen sünd dat opstunns ölben Graad. An Vörmiddag versteckt sik de Sünn achter dicke Wulken, hier un dor schuert dat. An Namiddag treckt de Regen kort af un de Sünn wiest sik. Liekers bringt de Avend wedder kräftige Schuers un Gewidder. Hier un dor kann dat rusig Weer mit Starkregen un ok Waatersnööd geven. Evenso Grisselgrussel un starke Böen. De Wind weiht twuschen Elv un Nordsee in Maaten bet frisch vun de osten bet süüdoosten Kant mit starken, op de Eilannen ok mit stievigen Böen. Dat Thermometer wiest us dorbi 16 bet 19 Graad, an de Küst blots 14 bet 15 Graad. In de Nacht regent dat eerst, laater süht man ok mal Steerns twuschen de Wulken un dat bi 9 bet 7 Graad. Sünnavend mehr Wulken as Sünn, man ok Schuers sünd wedder dorbi, liekers is dat meist dröög bi 15 bet 20 Graad. De Sünndag wiest sik mit wenig Sünn, veel Wulken, meist för korte Tiet kräftige Schuers un Starkregen un dat bi 14 bet 16 Graad an de Küst un 17 bet 19 Graad in´t Binnenland.

Dat weren de Plattdüütschen Narichten. Tohoopstellt vun Michael Kück. Op Platt trechtmaakt un vörleest vun Martina Brünjes.