Plattdeutsche Nachrichten Plattdüütsche Narichten vun'n 24. April 2023

Mehr as 300 Düütsche ut den Sudan utlflagen

Berlin: De eerste Militärfleeger vun de Bunnswehr mit Düütschen de ut den Sudan rett wurrn, is hüüt morgen in Berlin lannt. In den Fleeger weren, na dat utwärtige Amt, 101 Düütsche, ehre Familien un Liddmaaten vun annern Partnerlännern. Siet güstern Avend hett de Bunnswehr dormit mehr as 300 Minschen ut den Sudan utflagen. Siet rund ene Week gaht Minschen böös openanner dahl, vunwegen de böversten twee Generals vun dat Land an de Macht wüllt.

Utgaven för dat Militär kladdert op de ganzen Welt op Rekordhöchde

Stockholm: As dat Freedensforscher-Institut Sipri in Stockholm künnig maakt, sünd in dat verleden Johr, de Militärutgaven op de ganzen Welt, üm 3,7 Perzent op goot twee Billioon Euro na baven kladdert. Soveel is weltwiet betnu noch nich för dat Militär utgeven worrn. Dormit is dat de gröttste Anstieg siet de koole Krieg toenn gung, see dat Institut. As Hööftgrund warrt de Krieg in de Ukraine nöömt. Alleen de Rüstutgaven in Europa sünd dorna in dat verleden Johr üm 13 Perzent anstegen.

ADFC stellt Fohrradklima-Test för

Berlin: Verkehrsminister Wissing stellt an Middag, tohoop mit den allgemeen Fohrrad-Club för, wat bi den Fohrrad-Klimatest, as se dat nöömt, rutsuert is. Vör dree Johren weer Bremen an böverster Steed vun all Städer bi de Ümfraag. Na Informatschoon vun buten un binnen, is Bremen düt Johr woll ok op een vun de vördersten Plätz lannt. De Fohrrad-Klimatest vun den ADFC wiest, wo tofreden de Radfohrer in den verscheeden Städer un Gemenen sünd. In de Hauptsaak geiht dat dorüm, wo seker sik de Deelnehmers op de Straaten föhlt, wo de Tostand vun Radweeg is un of dat Maleschen mit annern Verkehrsdeelnehmers gifft.

Toppdrepen snackt över Noordsee-Windkraft

Oostenn. Bi dat Toppdrepen in dat belgsch Oostenn wüllt Bunnskanzler Scholz, as ok de Staats- un Regeernsbaas ut acht wiedere europäsch Länner över den Utbo vun de Offshore-Windenergie snacken. In de Nordsee schall, na belgsch Angaven, dat gröttste grööne Kraftwark vun Europa wassen. Mit Hölp vun de Windkraft wüllt de Deelnehmerlänner dat Ziel tofaatkriegen, klimaneutral un dormit ok unafhängig vun Russland warrn. Binah een Johr is dat nu her, dat Düütschland, Belgien, Nedderlann un Dänemark sik eenig weern, ehre gemeensame Offshore-Leisten bet to dat Johr twee-dusend-foftig teihn mal hööger to setten.

Maleschen in den Wersertunnel

Bremerhaben: Autofohrer mööt sik vun hüüt af an bet Freedag an den Wersertunnel in de Nöögde vun Bremerhaben op Maleschen instellen. De Tunnelröhr warrt överhalt, dorüm sünd de nachts to´n Deel sparrt. Vun Donnersdag op Freedag sünd all beid Fohrtrichten vun avends Klock 7 bet morgens Klock 5 heel un deel dicht. De Werserfähr Brake-Sandstedt maakt denn extra Fohrten.

Dat Weer

Un nu kiekt wi op dat Weer: In Möppen un Emm hebbt wi 9 Graad, in Bremerhaben un Bremen sünd dat opstunns 11 Graad. Hüüt seht wi veel Wulken an Heven. An Vörmiddag blifft dat meist dröög, vun Middag af an un an Namiddag fallt jümmer wedder Regen. Af un an ok mal mit Blitz un Dunnerslag. De Wind weiht in Maaten, an de Küst vun Tiet to Tiet frisch vun de süüdwesten bet westen Kant, hier ok mit starken un stievigen Böen. Dat Thermometer wiest us 11 bet 13 Graad. In de Nacht wiederhen Wulken un af un an pladdert dat. Man hier un dor is dat mööglich kort mal de Steerns to sehn un dat bi 6 bet 4 Graad. Morgen sünd wedder Wulken an Heven, man hier un dor is ok mal blau mang de Wulken, liekers kann dat pladdern. Eerst an Namiddag hett den ok mal de Sünn de Nees vörn un de Regen warrt weniger. Dat Thermometer schafft dat dorbi man blots op 8 bet 10 Graad.

Dat weren de Plattdüütschen Narichten. Tohoopstellt vun Jörn Haarmann. Op Platt trechtmaakt un vörleest vun Martina Brünjes.