Plattdeutsche Nachrichten Plattdüütsche Narichten vun'n 29. Oktober 2024

Gewarkschaft fordert to Streik in Metall- un Elektroindustrie op

Noornham: Liddmaten vun de IG Metall hebbt üm Middernacht bunnswiet mit Lawais för Wohrschau anfungen. Bedrieven in Bremen un Bremerhaben sünd eerstmal nich to’n Streik opropen, aver de Mitarbeiders in Neddersassen, to’n Bispill bi Airbus in Varel un in Noornham. Ok in Willemshaben un Cuxhaben geev dat Streiks. De IG Metall will so mehr Druck bi dat Tarifverhanneln in de Metall- un Elektroindustrie maken.

Bunnsregeern beklaagt Henrichten in’n Iraan

Teheran: Düütsche Politikers hebbt dat Henrichten vun den Düütsch-Iraaner Jamshid Sharmahd in’n Iraan kritiseert. Sharmahd weer siet 2020 achter de Trallen. Nu hett de iraansche Machtapparaat dat Henrichten künnig maakt. Bunnskanzler Scholz nöömt dat en Schandaal. Butenministersche Baerbock säe, datt dat wiest, wo minschenverachtend dat Regime in Teheran is.

Scholz un FDP laad to Wirtschafts-Topdrapen in

Berlin: Bunnskanzler Scholz kummt hüüt mit Vertreders vun Industrieverbännen, Gewarkschaften un grode Ünnernehmen tosamen. Se wüllt över Weeg ut de Wirtschaftsflaute snacken. Wat dorbi rutsuert, wüllt se vertroolich behanneln. Wietere Drapen sünd al plaant. De FDP vun Finanzminister Lindner maakt hüüt en egen Wirtschafts-Topdrapen.

Misshanneln vun Deerten op Slachthoff in’n Noordwesten

Braak: Op en Slachthoff in de Wersermarsch sünd woll Schaap un Rinner quält worrn. Dat vermellt de Deertenrechtsorganisatschoon Aninova, wat fröher dat Düütsche Deertenschutzbüro weer. Op Videoopnahmen is to sehn, wo de Deerten peddt, slaan un jümmer wedder mit Elektroschockern andreven ward. Dat Veterinääramt in Braak hett den Bedriev vun den Slachthoff eerstmal verbaden. De Bedriever hett dat falsche Benehmen to’n Deel togeven.

Groot Füer in Schüün in Rablinghusen

Bremen: In Rablinghusen is en Schüün afbrennt, de leer stünn un mehr as 200 Johr oolt weer. De Füerwehr weer bet to’n Morgen mit en Barg Lüüd in’n Insatz. Wo dat to dat Füer kamen is, is betto noch nich klaar. Versehrt worrn is nümms.

Dat Weer

Un nu en Blick op dat Weer: In Bremen, Bremerhaben un Cloppenborg 13, un in Demorst un Dörveern sünd dat opstünns 14 Graad. Hüüt blifft de Wulkendeek den heelen Dag dicht, un de Sünn wiest sik meist gor nich. Dorto gifft dat jümmer wedder lichten Regen oder Spütterregen. Af un an blifft dat ok mal dröög bi 14 bet 16 Graad. In de Nacht blifft dat dicht wulkig, un hier un dor gifft dat noch’n beten Regen. De ward aver later weniger, un de Wulken lockert sik vun Oostfreesland her mal kort op. Denn gifft ok glieks wedder Daak. Dat Thermometer sackt daal op 13 bet 11 Graad. Morgen is dat eerst för längere Tiet dakig. Över Dag lockert dat to’n Deel op, aver bald treckt nee’e Wulken vun de Noordsee her op. Ok wenige Druppen oder lichten Regen kann dat geven. De Sünn hett meist keen Schangsen bi 14 bet 16 Graad.

Dat weern de Narichten op platt. Tohoopstellt hett se Sven Kuhnen. Op Platt trechtmaakt un vörleest vun Marc Gelhart.