Plattdeutsche Nachrichten Plattdüütsche Narichten vun'n 01. Oktober 2024

Ne´er Baas bi de Nato

Brüssel: De Ex-Regerungsbaas vun de Nedderlann Mark Rutte is de nee´e Generalsekretär vun de Nato. He hett dat Amt vun Jens Stoltenberg övernahmen. De Norweger Stoltenberg weer de verleden teihn Johr Baas vun de Nato, nu schall he na Medienberichten woll Baas vun de Müncher Sekerheitskunferenz warrn.

Israelsche Boddenangreep in den Libanon

Beirut: Israel hett verleden Nacht den Boddenangreep gegen de Hisbollah-Miliz in den Libanon anfungen. Dat isrealsche Militär see, dat sünd extra Insätz gegen Posten un Infrastruktur vun de Hisbollah in Dörpen dichtbi de Grenz. Düsse Steeden sünd en unmiddelbore Gefohr för de Gemeenden in Noordisrael. Betnu harr Israel de Hisbollah meist ut de Luft angrepen.

Biden reist na Warvelstorm in dat Katastrophenrebeet

Washington: US-Präsident Joe Biden will sik sülvst en Bild dorvun maken, wat de Hurrikan „Helene“ in den Süüdoosten de USA anricht hett. Dorto reist Biden in de Katastrophenrebeete na North Carolina, Florida un Georgia. De Warvelstorm hett ganze Landstreken verwööst, mehr as 120 Minschen sünd betnu sturven, wiedere 600 Minschen gellen na Angaav vun dat Witte Huus opstunns noch as misst.

Tempo 30-Zoon in Ollenborg

Ollenborg: Op de Hauptverkehrsass in de Stadt draff bold blots noch Tempo dartig föhrt warrn. Dat hett güstern Avend de Raat besluten. Düsse Tempo-30-Zoon sünd en Deel vun den Larmakschoonsplaan, bi den Ollenborg den Larmpegel op de Hauptstraaten daalsetten will. Gellen schüllt de 30er-Zoonen aver eerst Enn tokamen Johr – wenn de nee´e Fohrplaan vun de Verkehrsbedriev VWG in Kraft tridd.

Tarifverhanneln bi Bremerhoben Bus

Bremerhoben: De Tarifverhanneln för de Arbeiders vun Bremerhoben Bus geiht hüüt in de drüdde Runn. De Gewarkschop Verdi verlangt för jedeen Arbeider tominns 400 Euro mehr Geld, dorto en eenmalig Inflatschoonsutglieksprämie vun 1200 Euro. Ok Minschen in Utbildung schüllt düsse Prämie kriegen, dorto 200 Euro mehr in Maand. De Verhanneln in Juli un August weren vergeevens.

Dat Weer

Un nu kiekt wi op dat Weer: In Bremerhoben sünd dat ölben Graad, in Bremen un Möppen twolf Graad un in Emm hebbt wi opstunns darteihn Graad. Hüüt wesseln sik mal mehr mal weniger Wulken af, jümmer wedder gifft dat Schuer un ok Gewidder sünd mööglich. Rund umto dat Emsland un dat Ollenborger Münsterland kann sik de Regen an Namiddag fastsetten. Dat Thermometer wiest us twolf bet fofteihn Graad. In de Nacht wiederhen Wulken un Regen, twuschen Bremen un Nordsee warrt de Regen weniger bi twolf bet negen Graad. Middeweken fangt mit dicken Wulken an, af un an kann dat Regen geven. An Namiddag warrn de Wulken vun de Küst her weniger, de Sünn schafft dat ok mal vörbi to kieken un dat blifft meist dröög. In süüden Bremen blifft dat wulkig bi twolf bet fofteihn Graad.

Dat weren de Plattdüütschen Narichten. Tohoopstellt vun Birgit Sagemann. Op Platt trechtmaakt un vörleest vun Martina Brünjes.