Plattdeutsche Nachrichten Plattdüütsche Narichten vun'n 25. September 2024

Tarifverhanneln bi VW fangt an

Hannover: An’n Vörmiddag fangt bi Volkswagen dat Tarifverhanneln an. Wegen den Slamassel bi den Konzern is dat Drapen vörtrucken worrn. De IG Metall will verhinnern, datt Steden afboet ward. De Gewarkschaft will söben Perzent mehr Lohn för de 120.000 Mitarbeiders.

Selenskyj will Russland to’n Freden dwingen

New York: De ukrainsche Präsident Selenskyj hett de Weltgemeenschaft opfordert, Russland to’n Freden to dwingen. Selenskyj hett in New York an en Sitten vun’n UN-Sekerheitsraat deelnahmen. He säe, datt Kremlbaas Putin so veel internatschonale Gesetzen braken hett, datt he woll nich vun alleen dormit ophören ward.

Gewarkschaft vun de Polizei: Grenzkontrollen bringt nix

Berlin: De Gewarkschaft vun de Polizei is betto nich de Menen, datt de grötteren Grenzkontrollen dorbi hölpt, gegen dat Inwandern ahn Paperen antogahn. De Baas vun de Polizei-Gewarkschaft Roßkopf säe to dat Redakschoonsnettwark Düütschland, datt betto blots wenige Minschen dorbi opgrepen worrn sünd. As he wieter säe, ward de Kontrollsteden an de Hauptstraten ümfohren, un de Polizei hett nich noog Utrüstung.

Füerwehr löscht Grootfüer in’t Bremer Ümspannwark

Bremen: In Findörp hett dat an’n Morgen en Grootfüer in en Ümspannwark geven. Een vun dree grode Trafoanlagen un 30.000 Liter Öl hebbt dor brennt. Na meist twee Stünnen weer dat Füer löscht. En grode Rookwulk is na Utkunft vun de Füerwehr to’n Glück över Flachen ahn Hüüs aftrucken. De Füerwehr weer dor mit all tohoop 150 Hölpslüüd. De Stroom is wegen dat Füer aver nargens utfullen.

Veele Stränn mit Mikroplastik verdreckt

Bremerhaben: De mehrsten Stränn an Noord- un Oostsee sünd mit Mikroplastik verdreckt. Dat wiest en Studie, de dat Alfred-Wegener-Institut mit Freewilligen ümsett hett. Hobbyforscher hebbt an Stränn mehr as 1.000 Proven sammelt un an de Wetenschaftlers in Bremerhaben schickt. Dorbi is rutsuert, datt an 52 vun 71 Noord- un Oostseestränn in’n Snitt per Quadratmeter veer gröttere Mikroplastik-Delen funnen worrn sünd.

Dat Weer

Un nu en Blick op dat Weer: In Nordholt 13, in Bremen un Bremerhaben 14, un in Dörveern sünd dat opstünns 15 Graad. Hüüt hebbt de Wulken de Bavenhand, aver bet to’n Namiddag treckt blots af un an mal en Schuer dör. Wenn dat dröög is, lockert dat ok mal för korte Tiet op. An’n Namiddag un Avend breedt sik vun’t Ollenborger Münsterland aver nee’e Regenschuers ut. Dat Thermometer wiest 16 bet 18 Graad. In de Nacht gaht de Regenschuers vun’n Avend in Regen över. De breedt sik vun’t Ollenborger Münsterland bet to de Noordsee ut un ward later in de Nacht degter. De Temperaturen sackt daal op 14 bet 11 Graad. Morgen is dat eerst gries mit degten Regen, de aver gau över Noordsee un Elv aftreckt. Darna lockert dat mal op mit’n beten Sünnschien, mal gifft dat enkelte Schuers. Blots an de Noordsee gifft dat noch fakener Schuers, un an’n Avend treckt vun’t Emsland her noch mehr Regen op bi 16 bet 19 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.