Plattdeutsche Nachrichten Plattdüütsche Narichten vun'n 17. Juni 2024

Ropen na wegfallen laten vun Börgergeld för Ukrainer warrt luuter

Berlin: Na Unionspolitikern verlangt nu ok FDP-Generalsekretär Djir-Sarai nich so hoge staatliche Stütt för Ukrainer, de op de Flucht sünd. He maakt den Vörslag, dat man jem dat Börgergeld strieken schall. Ok seggt he, dat man se nich besünners behanneln schall, sünnern jüst so as all anner Minschen, de vunwegen Krieg ok op de Flucht sünd. De FDP-Politiker seggt, dat dat eenen Mangel an Arbeiters , to´n Bispeel bi Krögers un Weertslüüd un ok in de Plege, gifft. Dor kunnen ok Flüchtlige arbeiden.

Atommächte entwickelt nee`e Wapensysteme

Stockholm: De Atommächte sett op stark maken vun nuklearet Afschrecken, so dat Fredensforschungsinstitut Sipri. In den aktuellen Bericht för dat Johr seggt se, dat de 9 Atomstaaten nich blots ehre nuklearen Wapenlagers nee un frisch maakt. Einige hebbt in´t verleden Johr ok nee`e Wapensysteme utklamüüstert. Na Sipri gifft dat op de ganze Welt rund 12.000 nukleare Sprengköppe, vun de mehr as 9.500 ok klar för eenen Insatz sünd.

Forschungsstaatssekretärin schall gahn

Berlin: Bunnsforschungsministersche Bettina Stark-Watzinger will ehre Staatssekretärin Sabine Döring eerstmal in den Rohstand setten laten. Dorüm hett se Bunnskanzler Olaf Scholz beten. Döring is, vunwegen ehren Ümgang mit eenen pro-palästinensischen Breef vun Hoochschool-Schoolmestern, in de Kritik. Döring harr nakieken laten, wat man de Forschenden, vunwegen de Kritik, dat Fördergeld strieken laten kann. Dormit will Stark-Watzinger nix to doon hebben.

Streiks in norddüütsche Havens

Bremen: De Gewarkschaft Verdi hett in den Tarifkonflikt, de jüst loppt, to wietere Streiks in de Seehavens Bremen, Hamborg un Neddersassen opropen. De Anstellten willt sik in Hamborg to eenen zentralen Streikdag drepen. Üm Klock 11 versammelt sik all för eenen Demonstration. Je na Haven willt se nich för 24 or 48 Stünnen arbeiden.

Söken na Krabbenfischer instellt

Borkum: Dat Söken in de Nordsee, na den Krabbenfischer, de över Bord gung, hebbt se eerstmaal instellt. De Düütsche Gesellschupp to de Rettung vun Minschen, de Malöör mit`t Schipp hbbt seggt, dat se mit dat Söken wieter maakt, wenn se nee´e Henwies kriegt. De Seemann is güstern Morrn in´t südoosten vun Borkum in de Nordsee fallen. Bi dat grote Söken na em is nix bi rutkamen.

Dat Weer

Un nu een Blick op dat Weer: In Bremerhaven 15, op Borkum, in Bremen un in Neenborg sünd dat opstünns 16 Graad. Hütt hebbt wi vele Wulken an´t Heben un de Sünn kiekt dor af un an mal dör. To´n Nomdag hen treckt vun Südwesten her jümmers wedder Schuers op, ok mit Blitz un Dunnerslag. Hier un dor kann dat mal düchtig gallern mit Hagel un onnig Wind. Meist dröge blifft dat in Ostfresland, bi 19 bit 22 Graad. Tokamen Nacht hört dat mit den Regen eerstmal op. Vun´t Emsland her treckt denn wedder dichte Wulkenfeller op, bi 14 bit 9 Graad. Morrn geiht de Dag fründlich los. De Sünn lacht us ok mal wedder an. Man denn warrt de Wulken vun´t Ollenborger Münsterland her dichter. Na Nordoosten hen treckt hier un dor Schuers op mit Gewidder. Dor kummt ok mal onnig wat vun Baven rünner. So´n beten Hagel ist ok mal mit dorbi.  De Temperaturen liggt bi 18 bit 23 Graad. Middeweken warrt dat fründlicher un de Restschuers treckt af. Dat gifft enen Mix ut Sünn un Wulken, bi 17 bit 20 Graad. Dat weren de Narichten op Platt. Tohoopstellt hett se Sven Kuhnen. Trechtmaakt un vörleest vun Antje Kruppa.