Plattdeutsche Nachrichten Plattdüütsche Narichten vun'n 21. Mai 2024

Bunnsregeern kritiseert Haftbefehl gegen Netanjahu

Berlin: De Bunnsregeern hett den Haftbefehl-Andrag gegen den israeelschen Regerungsbaas Netanjahu dör den Chefankläger vun’n Internatschonalen Gerichtshoff kritiseert. Datt to glieke Tiet Vertreders vun Israel un dree Hamas-Föhrers anklaagt warrn schüllt, lett meist so as wenn se glieksett ward, as dat Buten-Amt vermellt. De Chefankläger vun’n Gerichtshoff gifft as Grund för sien Andrag Kriegsverbreken vun beide Konfliktparteien an.

Butenministersche Baerbock to Besöök in Kiew

Kiew: Butenministersche Baerbock is an’n Morgen in de ukrainschen Hauptstadt Kiew ankamen. Den Termin hebbt se tovör ut Sekerheitsgrünnen geheemhollen. An’n Anfang vun ehren Besöök hett Baerbock mehr internatschonale Stütt för de Ukraine bi’t Verdeffendeern in de Luft verlangt. De ukrainsche Präsident Selenskyj hett in de verleden Daag mehrmals üm dat Levern vun twee wietere Flegerafwehrsysteme vun’n Typ Patriot beden.

Tweter Perzess gegen Rieksbörger hett anfungen

Frankfort: In Frankfort an’n Main hett jüst de twete Perzess gegen de Rieksbörgergrupp üm Prinz Reuß anfungen. De 72-Johrige is as een vun mehrere möögliche Anföhrers anklaagt. All tohoop staht negen Froens- un Mannslüüd för’t Brett. Jem ward vörsmeten, datt se as Liddmaten vun en terroristischen Verenigung dat Ümsmieten vun den politischen Opbo in Düütschland mit Gewalt plaant hebbt. Enn April hett in Stuttgart al dat Verhanneln gegen den so nöömten militäärschen Arm vun de Grupp anfungen.

THW ut Bremen un Neddersassen bi’t Oprümen in’t Saarland

Saarbrüchen: Na den sworen Regen un dat Hoochwater in’t Saarland un in Rheinland-Pfalz sünd de Hölpslüüd wieter mit de Oprüümarbeiden togangen. Nee’er Regen kann dorbi ok hüüt för Maleschen sorgen. Middewiel is en wieterer Trupp vun dat Technische Hölpswark ut Neddersassen un Bremen in Rheinland-Pfalz ankamen. De THW-Lüüd sünd Fachlüüd för Waterschaden un köönt mit Grootpumpen un Generatoren ümgahn.

Spitt för nee’e Stroomleitung twüschen Düütschland un Grootbritannien

Willemshaben: In Willemshaben fangt hüüt offiziell dat Verleggen vun en Ünnerwaterstroomkabel in de Noordsee an. Dat Kabel is 725 Kilometer lang un schall in Tokunft de Energienetten vun Düütschland un Grootbritannien verbinnen. To’n Spitt in Willemshaben rekent se hüüt ok mit Wirtschaftsminister Habeck.

Dat Weer

Un nu en Blick op dat Weer: In Cuxhaben 15, in Bremen un Bremerhaben 16, un in Nienborg sünd dat opstünns 18 Graad. Hüüt schient meisttiets de Sünn, nadat sik de dichteren Wulkenfeller oplöst hebbt. Vun Middag an kaamt’n poor lockere Wulken dorto, de sik to’n Avend hen wedder oplöst. Hier un dor treckt’n poor hoge dünne Wulken vörbi, de an’n Avend vun’t Ollenborger Münsterland dichter ward. Dat blifft meisttiets dröög bi 20 bet 26 Graad. In de Nacht is de Heben toeerst noch licht wulkig, vun’t Emsland un Ollenborger Münsterland ward de Wulken mehr un dichter. An’n fröhen Morgen kummt vun’n Süüdwesten her Regen op. De Nacht ward lau bi 17 bet 14 Graad. Morgen gifft dat bi dichte Wulken jümmer wedder Regenschuers, de över Dag stärker ward. Vun Middag an sünd ok Gewidder mööglich. Hier un dor kann dat ok starken Regen geven. An’n Avend ward de Regen weniger. Dat ward bruttig bi 18 bet 23 Graad.

Dat weern de Narichten op platt. Tohoopstellt hett se Katrin Martens. Op Platt trechtmaakt un vörleest vun Marc Gelhart.