Plattdeutsche Nachrichten Plattdüütsche Narichten vun'n 28. September 2023

Na IT-Maleschen: Bi VW löppt wedder allens

Wolfsborg: De gewaltigen IT-Maleschen bi VW sünd vun’n Disch. Dat hett de Kunzern vunmorgen anseggt. De Maschinen sünd wedder anlopen. Se hebbt nich arbeiden kunnt in Wolfsborg, Emm un Ossenbrügge. De IT-Maleschen harrn vun güstern Namiddag op an dorför sorgt, dat in de Warkshallen nix mehr lopen is. De Kunzern hett en Krisengrupp insett. Wat genau dor achter stickt, is noch nich kloor. VW seggt: Dat süht nich so ut, as wenn Hackers den Bedriev angrepen harrn.

EU-Binnenministers snackt över Asylreform

Brüssel: De EU-Binnenministers snackt hüüt Vörmiddag över dat, wat se sik as Asylreform vörnahmen hebbt. Mit op dat Tapee staht de Krisenregeln. Dor wüllt se rinschrieven, wat maakt warrt, wenn afsünnerlich vele Lüüd na de EU rinwüllt. De enkelten Staaten köönt de denn länger in Lager an de Butengrenz fasthollen. Düütschland harr dat bet nu aflehnt. Vör allen de Grönen weren dor nich mit inverstahn. Medien hebbt to weten kregen: Kanzler Scholz harr kloor anseggt: Düütschland dröff de Regelung nich länger in’n Weg stahn.

Düütschland will Raketenafwehr Arrows 3 köpen

Berlin: Düütschland un Israel ünnerschrievt an’n Middag en Kuntrakt, in den steiht: Düütschland warrt de Raketenafwehr Arrow 3 vun Israel köpen. Dat hett dat Bunnsverteidigungsministerium künnig maakt. Arrow 3 schall dorför sorgen, dat sik Düütschland un siene Navers in sowat twee Johr beter gegen Attacken mit Raketen wohren köönt. Um un bi 3 Milliarden Euro hebbt se dorför inplaant. Dat Geld wüllt se ut den 100-Milliarden-Extra-Putt för de Bunnswehr nehmen.

Oppositschoon in Bremen: Soko för Roovöverfäll langt nich

Bremen: Wat Binnensenater Mäurer as Extra-Kommischoon för Roovöveräll in Bremen plaant, kummt nich överall goot an. De Oppositschoon seggt: Dat is hööchst nödig – man dat langt vörn un achtern nich. All dree Oppositschoons-Parteien verlangt: Wo in Bremen in de letzte Tiet so veel mehr klaut worrn is, gifft dat för Asylanten, de dat Recht nich inhollt, blots een Weg: Se mööt afschaven warrn.

Stahlarbeiders in Bremen gaht för Industrie-Stroompries op de Straat

Bremen: De Stahlfabrikant Arcelor Mittal un de Gewarkschap IG Metall hebbt opropen: Se wüllt hüüt Middag tohoop in Bremen op de Straat gahn. Se verlangt: Wat as Industrie-Stroompries plaant is, schall gau kamen. Se kunnen de Anlagen blots denn op klimaverdrääglichen Bedriev umstellen, wenn kloor is, wat de Energie kösten deit. Ok Bremens Börgermester Bovenschulte sett sik dorför in. He warrt bi de Versammlung mit bi ween.

Dat Weer

Un woans süht dat mit dat Weer umto ut? Opstunns hebbt wi in Achem 17 Graad, in Bremen un Bremerhaven sünd dat 18 un in Demorst 20 Graad. Vundaag: Wenn de Wulken na Oosten över de Elv un de Lümborger Heid aftrocken sünd, lacht us de Sünn. An’n Namiddag kaamt vun Westen her dichtere Wulken op. Man dat blifft dröög. Dat Thermometer krabbelt op 21 bet 24 Graad, an de See bet 20. De Wind dorto weiht in Maten vun de süüdwesten Kant, op de Inseln ok frisch un mit deegte Böen. Tokamen Nacht: Wulken, man ok de Steerns kriegt wi to sehn. Vun de Noordsee ballt sik gegen Morgen de Wulken tohoop, un in’t Emsland kann dat ok en beten pladdern. Bi 15 Graad op de Inseln un 15 bet 12 Graad in’t Binnenland. Morgen: Mal Wulken, mal en beten Sunnschien. Hier un dor kann’t ok regen oder schuern. Dat warrt köhliger mit 18 bet 19 Graad an de See un 20 bet 22 Graad in’t Binnenland. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Anja Guse.