Plattdeutsche Nachrichten Plattdüütsche Narichten vun'n 27. September 2023

Bunnskabinett leggt Grundsekerung för Kinner fast

Berlin: Dat Bunnskabinett will hüüt Vörmiddag de Grundsekerung för Kinner op den Weg bringen. So wüllt se vun 2025 op an en Reeg Staatsleistungen för Kinner tohoopfaten. Dat schall eenfacher warrn, en Andrag to stellen un Geld to kriegen. Denn kunnen mehr Menschen an dat Geld rankamen, dat jem tosteiht.

Bunnsbinnenministerium sett „Artgemeinschaft“ en P vör

Bremen: Vunmorgen hett dat Bunnsbinnenministerium anfungen, gegen den rassistisch-völkischen Vereen „Artgemeinschaft“ vörtogahn. De rechtsextreme Verenigung hebbt se verbaden un oplööst. De Polizei kickt sik överall in Düütschland 26 Wahnungen an – ok in Neddersassen. De „Artgemeinschaft“ harr sowat 300 Liddmaten. Dat Binnenministerium seggt: De Vereen harr versöcht, Kinner un junge Lüüd so ümtodreihen, dat se sik gegen de Verfaten stellt.

Minschen spoort an Stroom

Berlin: De Minschen in Düütschland hebbt verleden Johr bi’t Heizen veel inspoort. Dat is jüst bi den „Wärmemonitor“ rutkamen, den dat Düütsche Institut för Wirtschapsforschung rutgeven hett. Dor steiht to lesen: In de Hüüs un Wahnungen sünd fief Perzent weniger an Gas, Ööl un Stroom bruukt worrn. Den warmen Winter hebbt se dor al bi rutrekent. Wat dor achter stickt: Energie weer en Barg dürer worrn wegen den Krieg in de Ukraine. Un dat seeg so ut, as kunn dat Gas knapp warrn, wo se Russland de Hahn dichtdreiht harrn.

Raat op Wangeroog will sik an dat faste Land ansluten

Wangeroog: De Raat vun de Insel hett güstern Avend dorför stimmt, dat se mit en Gemeend an’t faste Land tohoopgaht. Mit 6 gegen 3 Stimmen hebbt se fastleggt: Se wüllt sik dat nipp un nau ankieken. Wo dat kniepen deit, is Geld un Personal. Ehr se dat fastleggt, wüllt se aver eerst noch de Börgerslüüd fragen. Ok is noch nich kloor, an wat för en Gemeend op’t faste Land sik Wangeroog ansluten kunn. 1883 weer Wangeroog to en sülvststännige Gemeend worrn.

Staatsanwaltschap verlangt hoge Geldstrafen för „Letzte Generatschoon“

Ollenborg: In den Perzess vör dat Amtsgericht gegen Lüüd, de bi de „Letzte Generatschoon“ mitmaakt hebbt, hett de Staatsanwaltschap hoge Geldstrafen verlangt. Se smiet de Klimaaktivisten vör, se harrn anner Lüüd to wat dwingen wullt. Verleden Johr harr de Koppel dree mal Hauptstraten un Affohrten vun Autobahnen dicht maakt. Nu verlangt de Staatsanwaltschap bet 90 mal den Satz för een Dag. De Lüüd, de vör’t Brett staht, verlangt, dat se freespaken warrt. In de tokamen Weken will dat Gericht sien Ordeel bekannt maken.

Dat Weer

Un woans süht dat mit dat Weer umto ut? Opstunns hebbt wi in Bremen un Nienborg 14 Graad, in Friesaythe sünd dat 15 un in Bremerhaven 16 Graad. Vundaag: Veel Sunnschien mit blots ganz poor Wulken dorbi. An de See un in’t Emsland köönt de Wulken ok wat dichter tohoopkrupen. Dat blifft aver dröög. Dat Thermometer krabbelt op 21 bet 24 Graad, an de See bet 20. De Wind dorto weiht flau vun de süden bet süüdwesten Kant, an’n Namiddag un Avend dreiht he op Süüdoost bet Oost. Tokamen Nacht: Faken gor kene Wulken, blots in’t Emsland un Oostfreesland ok Wulkenfeller. De loopt wieder na Oosten, man dat blifft dröög. Bi 17 bet 16 Graad an de Küst un op de Inseln, anners 15 bet 13 Graad. Morgen: Mal hell mit Sunnschien, mal dichtere Wulken. Dröög bi 20 Graad an de See un 21 bet 24 Graad in’t Binnenland. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Gabriele Intemann.