Plattdeutsche Nachrichten Plattdüütsche Narichten vun'n 26. September 2023

Tominnst 20 Minschen dood na Exploschoon vun Brennstofflage in Barg-Karabach

Stepanakert: Tominnst 20 Minschen sünd güstern Avend doodbleven bi en Exploschoon vun en Brennstofflager in de Region Barg-Karabach, wo veel schaten ward. Wietere 290 Minschen sünd versehrt in Krankenhüüs bröcht worrn. Dat hebbt de Behörden vun de Region in’n Süüdkaukasus vermellt. Betto is noch nich klaar, wo dat to düsse Exploschoon kamen is.  

Bunnsverfatensgericht snackt över gesetzlich Vadderschaft

Karlsroh: Dat Bunnsverfatensgericht snackt opstünns över dat Anerkennen un dat Anfechten vun en gesetzlich Vadderschaft. De richtige Vadder hett sik an dat Gericht wennt, dormit he ok as rechtlichen Vadder anerkennt ward. Opstünns is so de nee’e Levenspartner vun de Mudder indragen.

Bunnspolizei geiht gegen Schleuserbande vör

Bremen: In fief Bunnslänner hett de Bunnspolizei an’n Morgen Hüüs un Wahnungen dörsöcht, ünner annern in Bremen, in Staad in Neddersassen un in’n Kreis Nienborg. All tohoop weern mehr as 350 Beamte togangen. Grund för düsse Razzia is dat Ünnersöken vun en Koppel vun Lüüd, de womööglich gegen dat Gesetz Minschen över de Grenz bringt.

Bremen will an Grunderwerbsstüer fasthollen

Bremen: De Senaat will an de Grunderwerbsstüer fasthollen. Anners würrn Innahmen in dreestelliger Millionenhööchde fehlen. Bunnsfinanzminister Lindner un’n poor Bunnslänner hebbt vörslaan, de Stüer daaltosetten oder wegtostrieken, dormit de Immobilienmarkt wedder op de Been kummt.  

Bremer Senaat stimmt över Klinikum Links de Werser af

Bremen: De Senaat will över de Tokunft vun dat Klinikum Links de Werser afstimmen. De Geno will dat Krankenhuus dichtmaken. Na Utkunft vun de Senaatsvörlaag, de „buten un binnen“ vörliggt, is dat vun all veer Bremer Krankenhüüs bi dütt an’n nödigsten, dat wedder op Schick to bringen. Dat Hart-Zentrum, dat dor mit binnen is, schall in dat Klinikum Mitt ümtrecken, darna ok de Palliativmedizin.

Dat Weer

Un nu en Blick op dat Weer: In Deefholt un Möppen 11, in Bremen un Bremerhaben 12, un in Demhorst un Emmen sünd dat opstünns 13 Graad. Hüüt gifft dat en dröög Gemengsel ut Sünnschien un lockere oder dünne Wulkenfeller, de woll eerst an’n Avend vun de Nedderlannen her to’n Deel dichter ward. Dat blifft dröög bi 20 bet 23 Graad. In de Nacht treckt eerst’n poor lockere Wulkenfeller dör. Darna funkelt för längere Tiet de Steerns an’n Heben, un Wulkenfeller gifft dat later hööchstens noch in’t Emsland un Oostfreesland. To’n Morgen hen kann sik Daak billen. Dat blifft dröög bi Temperaturen vun 15 bet 10 Graad. Morgen löst sik de enkelten Feller mit Daak op, denn ward dat fründlich mit veel Sünnschien un lockere Wulkenfeller. ‘N beten dichter köönt de Wulken af un an in’t Emsland un an de Noordsee ween, aver dat blifft dröög bi 20 bet 24 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.