Plattdeutsche Nachrichten Plattdüütsche Narichten vun'n 25. September 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 25. September 2023

  • Top-Drepen för Bo vun Wahnungen in´t Kanzleramt
  • Faeser lehnt böverste Grenz för Flüchtlinge af
  • Attack op ukrain`sche Habenstadt Odessa
  • AfD-Kandidat vergeigt Prickwahl to´n Overbörgermeester in Nordhusen
  • Umbo vun de Martinistraat geiht los
  • Dat Weer
Bild: Radio Bremen

Informationen zum Audio

Top-Drepen för Bo vun Wahnungen in´t Kanzleramt

Berlin: Kanzler Scholz un Minister för Bo Geywitz kummt hütt Nomdag in´t Kanzleramt mit Vertreder vun de Wahnungs-Wirtschaft tohoop. Bi dat Top-Drepen willt se besnacken, wat se nipp un nau maken willt, dormit man mehr Wahnungen boen kann. Vörweg harr Geywitz nee`e Staatshölp in milliarde Hööchde ankünnigt.

Faeser lehnt böverste Grenz för Flüchtlinge af

Berlin: Bunnsbinnenministerin Faeser lehnt eene böverste Grenz för Minschen op de Flucht af. Dat kann man nich mit europä`schet un internationalet Recht afmaken, seggt Faeser in de ARD. Düütschland is ok an de Genfer Flüchtlingskonvention un de Europä`sche Minschenrechtskonvention bunnen. De Ministerpräsident Söder ut Bayern harr eene Integrationsgrenz för de Opnahme vun Flüchtlinge, vun rund 200 000 Minschen op den Disch brocht.

Attack op ukrain`sche Habenstadt Odessa

Kiew: De ukrains`sche Habenstadt Odessa hebbt se in de Nacht wedder böös beschaten. Dorbi hebbt se dat Üm- un- Bi vun den Haben düchtig angrepen. Dat hett de Gouverneur vun de Stadt kund dahn. Luut de Medien hebbt se een groot Huus an de Küst dropen un in Brand sett. Wat Minschen to Schaden kamen sünd is noch nich bekannt. In de ganzen Ukraine is hüüt Nacht Luftalarm wesen.

AfD-Kandidat vergeigt Prickwahl to´n Overbörgermeester in Nordhusen

Nordhusen: De AfD-Kandidat Prophet hett de Prickwahl to´n Overbörgermeester in dat thüring`sche Nordhusen unvermodens vergeigt. Wunnen hett de parteilose Buschmann, de dat Amt nu ok all hett, mit 55 Perzent vun de Wählers. In den eersten Wahlgang, vör twee Weeken, harr de AfD-Kandidat noch düütlich vörn legen.

Umbo vun de Martinistraat geiht los

Bremen: In de Bremer Binnenstadt geiht dat hütt mit dat Vörbereiden vun den Umbo vun de Martinistraat los. Bit to´n Enn vun de Week maakt se de Poller un Baken weg. In de kamen Week geiht dat denn richtig mit de Boarbeiden los. Dor willt se eenen Weg för Radfohrer boen, de sik düütlich vun de Autospoor afgrenzt. Dorför is de Martinistraat denn af un an komplett för Autos sperrt.

Dat Weer

Un nu een Blick op dat Weer: in Nienborg, in Bremen un in Defhold 10, un in Bremerhaben sünd dat opstünns 12 Graad. Hütt schient den ganzen Dag för us de Sünn, ok wenn dor vele lichte Wulken an´t Heven sünd. Vun Ostfreesland her kummt to´n Avend hen mehr Wulken op, man dat blifft fründlich un dröge, bi 19 bit 22 Graad. Tokamen Nacht hebbt wi vun´t Emsland bit na Ostfreesland vele Wulken, man annerswo is dat klar un blifft dröge. To´n Morrn kann sik hier un dor Nevel billen, bi 14 bit 6 Graad. Morrn löst sik de Nevelfeller denn op, un denn gifft dat eenen Mix ut Sünn un lichte Wulken. Dor kummt nix vun baven rünner. De Temperaturen liggt bi 21 bit 24 Graad. Middeweeken geiht dat mit de Sünn un lichte Wulken so wieter. An´t Nomdag kummt vun de Nedderlannen her mehr Wulken op, man dat blifft dröge, bi 20 bit 24 Graad. Dat weren de Narichten op Platt. Tohoopstellt hett se Katrin Martens. Trechtmaakt un vörleest vun Antje Kruppa.

Bremen Eins Livestream & aktuelle Sendung.

Grüße und Musik mit Michelle Brückner

Grüße und Musik

Jetzt läuft:

Kings Of Leon Use Somebody
  • Jetzt läuft:

    Kings Of Leon Use Somebody