Plattdeutsche Nachrichten Plattdüütsche Narichten vun'n 12. September 2023

Runner Disch hollt Raat över Long Covid

Berlin – De Bunnesregeern will Minschen, de Long Covid hebbt, beter ünnerstützen. Bunnesgesundheitsminister Lauterbach hett för hüüt to een Runnen Disch darto inladen, üm Minschen to hölpen, de na een Corona-Infektschon wieter darünnen lieden doot. Se wüllt Facklüüd un Kranke tohoopbringen un wat utklamüstern, wat se beter as Hölp anbeden köönt.

Kim Jong Un dreept sik mit Putin

Moskau – De nordkoreansche Machthebber Kim Jong Un is in Russland ankomen, üm mit Putin to snacken. He is mit sien Privattog anreist. Kremlspreker Peskow hett gegenöver de staatlich Narichtenagentur Interfax seggt, jo, dat stimmt. Kim un Putin ward sik in’n Oosten vun Russland to een gemeensam Abendeten drepen un se ward ok alleen miteenanner snacken.

Moordkommischon ermiddelt na Dod vun 17-Jöhriger

Deefholt – De Polizei un de Staatsanwaltschupp ermiddelt, nadenn se een Dode in Barenburg funnen hebbt. De 17-Jöhrige weer in een Graven blangen een Straat funnen worrn. Bi de Ünnersöken is rutkamen, dat de Froo mit Gewalt to Dod kamen is, sä een Spreker vun de Polizei. Wokeen dat maakt hett, darvun hebbt se noch keen Ahnung.

Runner Disch snackt över Bremer Binnenstadt

Bremen – De Hannelskamer will an’n Namiddag mit Vertredern ut Politik, Hannel un Gastronomie över de Sekerheit vun de Binnenstadt snacken un wo püük dat dar is. As Radio Bremen to weten kregen hett, sünd bi den Runnen Disch ok söß Senatorinnen un Senatoren darbi. De Bremer Wertschupp, heet dat vun Sieten de Hannelskamer, will, dat Politik un Verwaltung wat gegen Drogenmissbruuk un Verbreken doot un Lüüt ahn Dack övern Kopp hölpt.

Lüüd köönt Henwies geven na Angriepen op Footballfans

Demorst – Na dat Angriepen op Footballfans vun’n SV Atlas hett de Polizei een Portal för Henwies praat stellt. Daröver schüllt Tügen Fotos un Videos vun den Vörfall hoochladen können, ahn Naam darbi. Verleden Sünnabend harrn 20 bit 30 vermummte Lüüd Fans ut Demorst angrepen, de jüst vun een Utwärtsspeel kemen. Söben Minschen sünd versehrt worrn, een paar vun jem swar.

Dat Weer

Un nu een Blick op dat Weer: op Wangerooge un in Deefholt 19 un in Bremen un Bremerhaben sünd dat opstunns 20 Graad. Vundaag is dat na den Schuern erst gries, later kiekt ok mal de Sünn rut. An’n Namiddag un Avend kummt wedder Schuers un Grummelschuers op, de hier un dar ok dull utfallt – bi 21 bit 25 Graad. Tokamen Nacht sünd bi meist dullen Wulken wedder Regenschuers ünnerwegens, kann ok Blitz un Donner darbi ween – dat Thermometer sackt op 17 bit 14 Graad. Morrn treckt letzte Schuers un Grummelschuers gau över Elv un Aller af un darachter stellt sik vun Ems un Nordsee her een Mix ut een beten Sünn un een paar Wulken in. De Namiddag ward fründlicher mit Sünnschien un blots noch een paar Wulken – bi 18 bit 20 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.