Plattdeutsche Nachrichten Plattdüütsche Narichten vun'n 30. Juni 2023

EU-Topdrapen geiht mit Thema China wieter

Brüssel: Dat Top-Drapen vun de EU-Staats- un Regerungsböversten geiht wieter. An’n tweten Dag vun dat Drapen geiht dat besünners üm de China-Politik vun de EU. Se wüllt dat trecht kriegen, datt de wirtschaftlichen Gefohren un de Afhängigkeiten daalsett ward. An‘n eersten Dag vun’n Gipfel sünd se utnanner gahn, ahn datt se sik in’n Asylstriet enig worrn sünd. Dat hebbt Polen un Ungarn verhinnert. Doröver wüllt se hüüt wieter verhanneln.     

Frankriek beleevt de drütte Nacht in de Reeg mit Krawalle

Paris: In Frankriek hett dat in de drütten Nacht in de Reeg Krawalle in mehrere Städer geven. Na Utkunft vun dat Binnenministerium sünd 400 Minschen fastnahmen worrn. 40.000 Polizisten weern dorbi togangen. Dorachter stickt de Dood vun en 17-Johrigen in’n Pariser Vöroort Nanterre. He is vun en Schandarm bi en Verkehrskontroll doot schaten worrn. De Mann sitt nu in Ünnersökenshaft.

Bunnsagentur för Arbeit leggt Tallen för Juni vör

Bremen: De Tall vun Lüüd ahn Arbeit is in’n Juni blots licht hoochgahn. All tohoop weern in’t Land Bremen in’n Juni meist 38.000 Minschen ahn Arbeit. Dat sünd meist 230 mehr as in’n Mai. De Quoot liggt dormit nu bi 10,6 Perzent. Mehr hett sik op den Utbildungsmarkt daan, aver ok een Maand vör den Utbildungsstart an’n 1. August sünd jümmer noch meist 1.300 vun de free’en Steden nich besett.

Füerwehr löscht Grootfüer in Porzellaanfabrik in Varel

Varel: In en Porzellaanfabrik in’n Kreis Freesland is an’n Avend en Grootfüer utbraken. Mehrere Hallen stünnen heel un deel in Flammen. Meist 200 Füerwehrlüüd un mehr as 200 Hölpslüüd weern dorbi togangen. Se hebbt verhinnern kunnt, datt dat Füer op en Hallendeel mit nee’e Maschinen övergrippt. Na Utkunft vun de Füerwehr is nümms versehrt worrn. Wo dat to dat Füer kamen is, is betto noch nich klaar.     

Habeck weiht Prüfstand för Rotorflünken in Bremerhaben in

Bremerhaben: Bremerhaben kriggt en Prüfstand för Rotorflünken vun Windkraftanlagen. To dat Inwiehen rekent se mit Bunnswirtschaftsminister Habeck, Bremens Börgermeister Bovenschulte un Wetenschaftssenatersche Schilling. Dat Fraunhofer-Institut för Windkraftsysteme will in düsse Anlaag in Tokunft Rotorflünken testen un de Ergevnisse praat stellen, dormit de Flünken zertifizeert warrn köönt.

Dat Weer

Un nu en Blick op dat Weer: In Möppen un Bassum 16, in Bremen un Bremerhaben 17, un in Achim un Cuxhaben sünd dat opstünns 18 Graad. Hüüt Vörmiddag treckt de Regenschuers to’n gröttsten Deel na Süüdoosten över de Lünborger Heid af. Darna blifft dat bi Sünn un Wulken meisttiets dröög bi 19 bet 23 Graad. In de Nacht fallt de opstiegen Wulken blots langsam tosamen, dorför blifft dat för’t Eerste dröög. Later treckt vun’t Emsland her dichte Wulken op. Eerste Schuers gifft dat aver eerst an’n Morgen besünners an de Küst. Dat Thermometer fallt op 16 bet 13 Graad. Morgen is dat eerst dröög, un hier un dor lockert dat op. Vun de Noordsee un Oostfreesland her breedt sik denn aver fakener Regenschuers ut. An’n Avend blifft dat vun’t Emsland her wedder fakener dröög. Dorbi blifft dat in Maten warm bi 18 bet 21 Graad. An’n Sünndag mal mehr, mal weniger wulkig, af un an mit Schuers. In’t Binnenland blifft dat an’n Namiddag meisttiets dröög. Bi starken Böen ut Westen gifft dat 18 bet 22 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.