Plattdeutsche Nachrichten Plattdüütsche Narichten vun'n 9. Juni 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 9. Juni 2023

  • EU-Staaten kamen op en Brett in den Asylstriet
  • Trump wegen Dokumenten-Schandaal anklaagt
  • Börgers in Woot wählen Frakschoonsvörsitter
  • Gefohr, dat de Wald anfangt to brennen in Bremen un Neddersassen stiegt an
  • Internet in un üm Wilhelmshaben geiht wedder
  • Dat Weer
Bild: Radio Bremen

Informationen zum Audio

EU-Staaten kamen op en Brett in den Asylstriet

Luxemborg. De EU-Länner sünd an´n Avend in dat Asylverfohren op en Brett kamen. Grund sünd de velen illegalen Migranten, de in´n Ogenblick faken över dat Middelmeer in de EU kamen. Se överlasten besünners Grekenland un Italien. Dorna schöölt de Migranten mit wenig Schangsen op Opnahm in Tokunft en Gauverfohren direktemang an den EU-Butengrenzen dörlopen. Bavento schöölt de Towannerer beter op de Staaten vun de EU verdeelt weern. Butenministersch Faeser nöömt dat Övereenkamen histoorsch. Pro Asyl snack vun en Utverkoop vun de Minschenrechte.

Trump wegen Dokumenten-Schandaal anklaagt

Miami. De fröher US-Präsident Trump mutt wedder vör´t Brett. Dütmal vör en Bunnsgericht in Miami in den Bunnsstaat Florida. Dat is dat eerste mal dat en Ex-Präsident vör en Bunnsgericht anklaagt wurr. Achtergrund is de, as dat nöömt warrt, Dokumente-Schandaal. In´n Middelpunkt stahn dorbi mehr as hunnert Geheemdokumente, de he na sien Amtstiet behollen harr. De Lüüd, de den Schandaal ünnersöökt menen, dat weer gegen dat Gesetz. De Akten weern in Trump sien Privathuus Mar-a-Lago in Florida ut´n Verkehr trocken wurren.

Börgers in Woot wählen Frakschoonsvörsitter

Bremen. Na SPD, Grönen, Linken un FDP stellt sick in Ogenblick ok de neje Frakschoon „Börgers in Woot“ in de Bremschen Börgerschaft nee op. De Mann, de „Börgers in Woot“ opleggt hett, Timke, hett sick as Frakschoonsbaas opstellen laten. Sien Stellvertreder warrt wohrschienlich Piet Leidreiter. De beiden sünd de eenzigen de sick in dat Parlament utkennen. De Verenigung vun de Wählers treckt mit Afornten in de Börgerschaft in.

Gefohr, dat de Woold anfangt to brennen in Bremen un Neddersassen stiegt an

Bremen. De Gefohr, dat de Woold anfangt to brennen stiegt an. In en poor Gegenden vun Neddersassen gellt vun hüüt an de Kategorie fief op de Wohrschaulist. Dat is de höchste Punkt op de List. Se wiest op en bannig grode Gefohr, dat de Woold anfangen kann to brennen un gellt in Celle, Bargen un Lüchow. In noch mehr Gegenden wohrschaut de Düütsche Weerdeenst mit Kategorie veer op de Wohrschaulist för Wooldbrandgefohr. Ünner annern in Bremen, Rodenborg Wümm un Soltau. An´n Sünndag komen, as de Weerdeenst vermellt, ünner annern Worpsweed, Bremführ, Bassen un Deefholt dorto.

Internet in und üm Wilhelmshaben geiht wedder

Wilhelmshaben. Na mehr as een Dag lopen dat Internet un Telefons wedder. De Maleschen kunnen in de Nacht kloor kregen weern. Dat vermellt de Kommunikaschoonskonzern EWE hüüt morgen. Güstern weern de Verbinnens in Wilhelmshaben, Freesland un in de Gemeend Butja´land in´n Kreis Wesermarsch in wieden Delen ünnerbroken. In Schortens harr en Bagger en wichtig Glasfaserstrang döörtrennt. Mehrere Hunnert Anslüss weern dorvun bedrapen.

Dat Weer

Un nu noch en Blick op dat Weer: in Hooksiel 16, in Bremen-Mitt 22, in Bremerhaben 19 un in Demorst sünd dat opstunns 23 Graad. Hüüt fangt dat överall mit Sünnschien or viellicht mal lockeren or dünnen Wulken an. Den Rest vun den Dag lacht de Sünn vun baven. Hier un dor sünd opstiegen Wulken dorbi. An´n Namiddag un Avend gifft dat hier un dor en Schuer or Blitz un Donnerslag. De Wind weiht en beten bit in Maten vun de nordoosten Kant. 25 bit 28 Graad stahn denn op dat Thermometer. An de Nordsee 19 bit 24 Graad. In de Nacht sünd en poor Wulken an´n Heven or man kann de Sterns dor baven funkeln sehn. Man dat blifft drög bi thein bit 14 Graad. Morn lacht de Sünn wieder vun´n Heven. En poor dünne Wulken sünd ok dorbi. De Temperaturen kladdern op 27 bit 30 Graad. An de Waterkant 22 bit 26 Graad. Sünndag: Düchtig Sünnschien bi 28 bit 31 Graad. An de Küst 22 bit 27 Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Markus Weise.

Bremen Eins Livestream & aktuelle Sendung.

Der Morgen

Jetzt läuft:

Backstreet Boys I Want It That Way
  • Jetzt läuft:

    Backstreet Boys I Want It That Way