Plattdeutsche Nachrichten Plattdüütsche Narichten vun'n 5. Juni 2023

Baerbock un Heil warvt üm Fachlüüd ut Süüdamerika

Brasilia: Butenministersche Baerbock un Arbeitsminister Heil sünd in Brasilien to en gemeensam Besöök ankamen. Se stüert dorop hen, datt se Utländers mit Utbildung na Düütschland haalt. Opstünns sünd hier üm un bi 1,7 Millionen Steden nich besett. Baerbock un Heil wüllt na egen Angaven besünners Fachlüüd för de Pleeg anwarven. In Brasilien gifft dat in’n Vergliek besünners veel Plegers mit Utbildung ahn Arbeit.     

Kreml: Ukrainsche Attack afwehrt

Moskau: Russland hett na egen Angaven en grode Attack vun dat ukrainsche Militär afwehrt. As dat Ministerium för’t Deffendeern in Moskau vermellt, hett de Ukraine versöcht, ehr Flachen in’n Oosten trüchtogewinnen, de Russland innahmen hett. Dat hett aver nich slumpt, as dat heet. De Ukraine hett betto noch nix to düsse Berichten seggt. De Angaven vun beide Sieden laat sik nich unafhängig prüfen.

CDU lehnt Tosamenarbeit mit AfD düütlich af

Berlin: CDU-Baas Merz hett nochmal düütlich maakt, datt sien Partei ok in Tokunft nich mit de AfD tosamenarbeiden will. Merz säe in’t ZDF, datt sik dor nix an ännern ward, solang he de Vörsitter is. He smiet de AfD vör, datt se utländerfiendlich un antisemitsch is. In Ümfragen staht de AfD opstünns mit meist 18 Perzent op en nee’en hööchsten Wert. Dat liggt na Menen vun Merz besünners an de Politik vun de Ampel-Regeern.

Ordeel gegen opsternaatsche Werder-Fans

Bremen: An’t Landgericht schall dat hüüt dat Ordeel gegen veer Fans vun’n Football-Bunnsligist Werder Bremen geven. Se staht ünner annern wegen besünners sworen Landfredensbruch vör’t Brett. Se hebbt woll vör meist fiefunhalv Johr na dat Speel gegen Mainz en Massenhaueree in’t Bremer Steentoorviddel in Gang bröcht. Dorbi is ok en Weertshuus twei slaan worrn, in dat se rechtsextreme Hooligans annahmen hebbt. Darna sünd de Gruppen op de Straat opnanner losgahn. Dorbi geev dat en groden Schaden an Saken un mehrere Versehrte.      

82-Johriger in Auerk wegen Drogenhannel vör’t Brett

Auerk: En 82-johriger Mann ut Auerk schall in mehrere Fallen mit grode Mengen vun Marihuana hannelt hebben. Dorüm steiht he dor hüüt vör dat Landgericht vör’t Brett. De Staatsanwaltschaft smiet em vör, datt he in dree Fallen zig Gramm vun de Droog verköfft hett, üm sien Rent optobetern. Tollbeamte sünd den Mann tofällig bi en Kontroll von Swattarbeiders an en Kiosk op de Hacken kamen.

Dat Weer

Un nu en Blick op dat Weer: In Nordholt 13, in Bremerhaben, Cuxhaben un Emmen 14, in Deefholt 15, in Bremen 16, in Dörveern 17 un in Achim sünd dat opstünns 18 Graad. Hüüt geiht dat meist överall fründlich oder sünnig un dröög in den Dag. An’n Namiddag un Avend gifft dat överall Sünnschien. Besünners över dat Binnenland kann dat en poor lockere opstiegen Wulken geven. Dat Thermometer kladdert op 21 bet 26 Graad, an de Noordsee hööchstens op 14 bet 20 Graad mit Wind, de vun de See kummt. In de Nacht is dat locker oder licht wulkig. Later gifft dat an de Noordsee to’n Deel Daak oder hogen Daak, un dat blifft dröög bi 12 bet 8 Graad. Morgen is dat in’t Binnenland eerst sünnig oder licht wulkig, an de Noordsee to’n Deel mit hogen Daak. Över Dag gifft dat meisttiets en fründlichen un drögen Wessel ut veel Sünnschien un wenige lockere opstiegen Wulken. In en Striepen vun Oostfreesland bet to dat Oole Land blifft de Heben sogaar heel un deel blau. Dorto 19 bet 25 Graad in’t Binnenland, an de Waterkant 14 bet 18 Graad.

Dat weern de Narichten op platt. Tohoopstellt hett se Michael Kück. Op Platt trechtmaakt un vörleest vun Marc Gelhart.