Plattdeutsche Nachrichten Plattdüütsche Narichten vun'n 1. Juni 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 1. Juni 2023

  • Opstand in Bremen na Oordeel gegen Linksextremistin, de se för eene Terroristin hoolt
  • Knapp 50 europä`sche Staatsbosse kummt bi Top-Drepen in Moldau tosamen
  • Ukraine vermellt dree Dode bi Luftattack op de Hauptstadt Kiew
  • US-Repräsentantenhuus seggt Ja to sik enig warrn in Schuldenstriet
  • Kamphund bitt in Oldenborg üm sik
  • Dat Weer
Bild: Radio Bremen

Informationen zum Audio

Opstand in Bremen na Oordeel gegen Linksextremistin, de se för eene Terroristin hoolt

Bremen: Na dat Oordeel gegen de Linksextremistin Lina E., de se för eene Terroristin hoolt, hett dat an´t Avend Opstände in mehrere Städte geven, ok in Bremen. In`t Steentorviddel sünd rund 350 Minschen, de sik wat vör´t Gesicht bunnen hebbt, tosamen kamen. Se hebbt op de Polizei un Sekerheitslüüd mit Flaschen, Stehen un Böllern smeten. To Schaden kamen is nümms. De Polizei hett 70 Lüüd, vun de se meent, dat se dor wat mit do doon hebbt, fastsett. Dat hett ok grummelt in Berlin, Hamborg, Dresden un Leipzig. Dat Oberlannesgericht in Dresden harr de Studentin Lina E. gistern, vunwegen en Reeg vun Angrepen op Rechtsextreme, to 5 Jahren achter Trallen verurdeelt.

Knapp 50 europä`sche Staatsbosse kummt bi Top-Drepen in Moldau tosamen

Chisinau: De Staats- un Regerungsbosse ut knapp 50 europä`sche Länner kummt hütt bi een Top-Drepen in de Republik Moldau tosamen. Vun dat Top-Drepen, in dat Naverland vun de Ukraine, schall na Angaven vun de EU-Vertreder een Signaal vun tohoop stahn gegen Russland utgahn. In de Hauptsaak vun de so nömmte “Europä`sche Politische Gemenschaft” geiht dat üm strategische Fragen, un ok üm Versögen mit Energie un de Arbeit för dat Klima. Vör dat Drepen hett de EU-Komission een Hölppaket, dat millionendick is, för Moldau ankünnigt.Ukraine vermellt dree Dode bi Luftattack op de Hauptstadt Kiew

Ukraine vermellt dree Dode bi Luftattack op de Hauptstadt Kiew

Kiew: Russland hett de ukrain`sche Hauptstadt Kiew in de Nacht wedder mit een Luftattack angrepen. As de Verwaltung in Kiew seggt, sünd bi de Attack tominnst dree Minschen to dode kamen, dorünner twee Kinner. Buterdem gifft dat zig Minschen de to Schaden kamen sünd. De Raketenafwehr hett de Raket woll afschoten, man de Trümmerstücken hebbt denn, bi´t daal kamen, Minschen un Hüüs dropen. All in de verleden Daag harr Russland Kiew jümmers wedder mit Raketen angrepen.

US-Repräsentantenhuus seggt Ja to sik enig warrn in Schuldenstriet

Washington: Dat US-Repräsentantenhuus hett Ja seggt, to dat sik enig warrn, in den Schuldenstriet. Dat weer de letzte grote Hürd üm den Bankrott vun de Vereenigten Staaten aftowennen. Se willt nu in dat Gesetz de böverste Grenz för Schulden bit 2025 utsetten un staatliche Utgaven in Schranken setten. Düsse Week mutt de Senat noch dorto Ja seggen. Wenn de USA keen Geld mehr utbetahlen kann, denn kunn dat Haveree för de Weltwirtschaft geven.

Kamphund bitt in Oldenborg üm sik

Oldenborg: Een Kamphund hett in Oldenborg sechs Minschen verletzt. De Pittbull is gistern Avend ut een Wohnung vun de 63-jöhrige Fro, to de de Hund höört, weg lopen. Op een Parkplatz hett de Hund een 2-jöhriges Kind in den Arm beten un de Oma dorvun in´t Gesicht. Ok de Mudder, de dorto kamen is, twee Bekannte vun un de Besitzerin un de Fro sülven hett he ok angrepen. De Polizei hett den Kamphund an´t Enn dot schaten. Gegen de Fro vun den Hund gaht se nu vör.

Dat Weer

Un nu een Blick op dat Weer: In Emm, Rotenborg un Bremen 11 un in Bremerhaven sünd dat opstünns 12 Graad. Hütt hebbt wie eerst noch vele dichte Wulken an´t Heven, de later oplockert. De Sünn kummt denn an´t Nomdag mehr un mehr dör, bi 13 bit 18 Graad. Tokamen Nacht treckt denn vun de Nordsee her Wulken op, de sik to den Süden hen schuuvt. Man dat blifft dröge, bi 10 bit 7 Graad. Morrn fangt de Dag gries an, man later gifft dat eenen fründlichen Mix ut Sünn un Wulken. De Wulken künnt denn ok mal dichter sien. Man dor kummt nix vun baven rünner. De Temperaturen liggt bi 16 bit 22 Graad. Sünnavend wedder veel Sünnenschien un blots een paar Wulken, bi 17 bit 24 Graad. Dat weren de Narichten op Platt. Tohoopstellt hett se Anja Guse. Trechtmaakt un vörleest hett se Antje Kruppa.

Bremen Eins Livestream & aktuelle Sendung.

Der Samstagmorgen mit Britta Uphoff

Der Samstagmorgen

Jetzt läuft:

Jesse Tellem Final Wish
  • Jetzt läuft:

    Jesse Tellem Final Wish