Plattdeutsche Nachrichten Plattdüütsche Narichten vun'n 31. Mai 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 31. Mai 2023

  • Bunnsanwaltschaft lett IS-Hölpslüüd ok in Bremen fastnehmen
  • Meist 10 Millionen Düütschlandticket-Kunnen
  • Koalitschoonsverhanneln in Bremen hebbt anfungen
Bild: Radio Bremen

Informationen zum Audio

Bunnsanwaltschaft lett IS-Hölpslüüd fastnehmen – ok in Bremen

Bremen: De Bunnsstaatsanwaltschaft hett an’n Morgen söben Lüüd fastnahmen, vun de se glöövt, datt se den Islaamschen Staat Stöhn gifft. Dat hannelt sik üm veer Froens- un dree Mannslüüd. Een Person is in Bremen fastnahmen worrn. Ok mehrere Hüüs ward hier dörsöcht. Alltohoop löppt de Akschoon in mehrere Bunnslänner. Meist 1.000 Beamte vun Bund un Länner sünd in’n Insatz. Se smiet de Anklaagten vör, datt se Spennen för den IS sammelt un dormit Terroraktivitäten in Syrien finanzeert hebbt. Dat geiht üm tominnst 65.000 Euro.     

Bi de Bahn drauht wedder nee’e Streiks

Berlin: De Tarifstriet twüschen de Düütschen Bahn un de Iesenbahn- un Verkehrsgewarkschaft EVG geiht in en wietere Runn. Dormit ward nee’e Streiks wohrschienlicher. De EVG hett an’n Avend ’n beter Angebott vun de Düütschen Bahn as unsoziaal aflehnt un de Arbeitgevers för hüüt to nee’e Verhanneln opropen. De Bahn lehnt dat aver vöreerst af, wieter to verhanneln. Se hett toletzt twüschen acht un twölf Perzent mehr Lohn un en Extra-Geld to’n Utgliek vun de Inflatschoon anboden. De EVG dorgegen will en fasten Bedrag vun 650 Euro mehr per Maand oder tominnst twölf Perzent mehr Lohn.

Meist 10 Millionen Düütschlandticket-Kunnen

Berlin: Een Maand na den Start vun dat Düütschlandticket hebbt meist teihn Millionen Minschen so en Abo afslaten. Dat mellt dat Redakschoonsnetwark Düütschland un weet dat vun de nee’en Tallen vun’n Verband Düütscher Verkehrsünnernehmen. Dorna hett jeder twete Düütschlandticket-Kunn tovör en Abo hatt un nu to dat 49-Euro-Billjet wesselt. De Rest vun de Kunnen hett vörher enkelte Tickets oder Monatskoorten ahn Abo hatt. Meist 700.000 Fohrgäst sünd nee’e Kunnen.

Koalitschoonsverhanneln in Bremen hebbt anfungen

Bremen: SPD, Gröne un Linke hebbt mit de Koalitschoonsverhanneln anfungen. De Afordnung vun de dree Parteien kaamt to dat eerste Drapen tosamen, üm över en nee’e Oplaag vun de root-gröön-rode Landsregeern to snacken. Toeerst güng dat üm organisatoorsche Saken as den wieteren Fohrplaan, un wokeen in de Arbeitsgruppen to de verschedenen Themen mitmaken schall. De Koalitschoonsverhanneln schüllt üm un bi een Maand duern. Anfang Juli schall de nee’e Koalitschoonsverdrag fardig ween. Bet dat sowiet is, wüllt de Parteien nix över de Verhanneln verraden.        

Bremerhabener SPD will mit CDU un FDP över Koalitschoon verhanneln

Bremerhaben: In de Seestadt will de SPD för de nee’e Stadtregeern mit Koalitschoonsverhanneln mit CDU un FDP anfangen. Dat hett de Bremerhabener SPD-Vörstand an’n Avend fastleggt. Noch in düsse Week schall dat Verhanneln losgahn. Enn Juni schall de nee’e Stadtregeern för Bremerhaben praatstahn.

Dat Weer

Un nu en Blick op dat Weer: In Cuxhaben 13, in Nordholt 15, in Emmen 16, in Bremen un Leer 17, in Brinkum 18 un in Achim sünd dat opstünns 20 Graad. Na dat sik de Daak oplöst hett, schient hüüt meisttiets de Sünn, un dat gifft blots noch’n poor dünne Wulken. To’n Avend hen kann dat an de Noordseeküst ’n beten wulkiger warrn, aver Regen gifft dat nich. Dat Thermometer kladdert op de Eilannen op 15 Graad un op dat Fastland op 18 bet 23 Graad. In de Nacht gifft dat wedder deepe Wulken vun de Noordsee her, de sik na Süden hen utbreedt. Tovör is dat meisttiets klaar bi 11 bet 8 Graad. Morgen hollt sik eerst noch de deepen Wulken, de aver later oplockert. Bet to’n Namiddag ward dat wedder fründlich mit veel Sünnschien blangen en poor Wulken bi 13 bet 18 Graad.

Dat weern de Narichten op platt. Tohoopstellt hett se Gabriele Intemann. Op Platt trechtmaakt un vörleest vun Marc Gelhart.

Bremen Eins Livestream & aktuelle Sendung.

Der Samstagabend mit Norbert Kuntze

Der Samstagabend

Jetzt läuft:

Robert Palmer Every Kinda People
  • Jetzt läuft:

    Robert Palmer Every Kinda People