Plattdeutsche Nachrichten Plattdüütsche Narichten vun'n 23. Mai 2023

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 23. Mai 2023

  • Twetet Verfahren, Trump ut sien Amt to smieten
  • WHO-Facklüüd kummt in China an
  • Vogt wahrschaut, dat Lüüd ut de Luftfohrt ehr Arbeit verleert
  • Röwekamp warvt för Laschet as CDU-Bunnesvörsitter
  • Holsteen-Anhänger fiert Pokal-Sieg gegen Bayern in Kiel
  • Dat Weer
Bild: Radio Bremen

Informationen zum Audio

Düütschland op’n Kopp stellen: Mehr Rieksbögers fastsett

Berlin: Dat Bunnskriminalamt hett noch dree Lüüd fastsett, vun de se meent, dat sünd Rieksbörgers. De ARD hett to weten kregen: Se kaamt ut Neddersassen un Baden-Württembarg. Vörsmeten warrt jüm, dat se bi en Terror-Koppel mitmaakt. Seggt warrt: Se wullen de Politik in Düütschland umsmieten un dat Düütsche Riek wedder op de Been stellen. De Lüüd, de se fastnahmen hebbt, kaamt nu vör en Ermittlungsrichter vun den Bunnsgerichtshoff. De leggt denn fast, wat de Haftbefehle ok umsett warrt.

EVG un Bahn sitt in Fulda tohoop

Fulda: De Bahn un de Gewarkschap EVG kaamt tohoop. Vunnamiddag steiht de eerstmal letzte Verhandlungs-Törn an. Wenn se bet övermorgen keen Utweg finnt, kunn dat wedder Warnstreiks geven. De Gewarkschap verlangt tominnst 650 Euro mehr oder 12 Perzent för de högeren Gruppen, lopen schall de Kuntrakt 12 Maand. De Bahn will bet 10 Perzent mehr geven un Eenmal-Geld. Se will aver, dat de Kuntrakt veel länger löppt, un mehr Geld schall dat eerst tokamen Johr geven.

Kummt Energie-Gesetz för Hüüs op’t Tapet? Raat vun de Öllsten leggt dat fast

Berlin: Vundaag leggt de Raat vun de Öllsten in den Bunnsdag fast, wat dat Parlament dat Energie-Gesetz för Hüüs noch düsse Week op dat Tapet sett. Na dat Gesetz mööt vun dat tokamen Johr op an all de neen Heizungen beter för de Umwelt ween. Man de FDP bekriddelt den Plaan jümmers noch. De Grönen wohrschaut de FDP, dat se de Parlamentsarbeit nich en P vörsett. FDP-Generalsekretär Dürr hett in dat Morgenmagazin vun ARD un ZDF kloormaakt: Akkraat geiht vör gau.

Bremen: Söken na Partner för Regerung to Enn

Bremen: Fief Stunnen lang hett de SPD güstern dat letzte Mal mit möögliche Partner för en Regerung in’t Land Bremen tohoopseten, dütmal mit de Grönen un de Linken. De Sozialdemokraten wüllt morgen anseggen, mit wat för Parteien se över en Koalitschoon verhanneln wüllt. Root-gröön-root is mööglich, man ok, dat se mit de CDU tosamengahnt.

Ekatarina B: Ehmann mutt sien Leven lang achter Trallen

Bremen: De Ehmann vun Ekatarina B. ut Bremerhaven, de umbrocht worrn is, mutt sien Leven lang achter Trallen. Dat steiht in dat Ordeel vun dat Bremer Landgericht, dat hüüt Vörmiddag rutkamen is. För de Richters steiht fast: de Havenarbeider vun 47 Johr hett sien Fro achtertücksch umbrocht. Weken later hebbt se de Dode in Stücken sneden in en Kuffer in de Werser funnen. Dor achter hett woll steken, dat de Mann den Looppass kregen harr. De Mann harr de ganze Tiet seggt: He hett dat nich maakt. Noch warrt dat Ordeel nich umsett.

Dat Weer

Un woans süht dat mit dat Weer umto ut? Opstunns hebbt wi in Möppen un Kneten 11 Graad, in Bremen un Bremerhaven sünd dat 12 Graad. Vundaag: Eerst meist överall dichte Wulken, hier oder dor kann dat ok wat dröppeln. In de Middagstiet lockert de Wulken vun Westen un vun de Noordsee her op, un denn kummt ok de Sünn mehr un mehr vör Dag. Ornlich wat köhliger as vörher: Dat Thermometer krabbelt op 12 bet 16 Graad. De Wind dorto weiht in Maten bet frisch vun de noordwesten Kant, an de See ok stief. In’t Binnenland mit deegte Böen, de an de See ok störmsch tokehr gaht. Tokamen Nacht: Funkeln Steerns mit blots en poor Wulken dorbi. Pö a pö treckt aver Wulken vun de See un de Elv rin, un dat fangt an to pladdern. Blots noch 10 bet 6 Graad. Morgen: Eerst vele Wulken, un de smiet ok en beten Natts vun baven. Dat kann ok mal een, twee Stunnen lang pladdern. So bilütten dröögt dat vun de See un de Elv her af, un de Sünn kriggt de Bavenhand. Bi 12 bet 18 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Jörn Haarmann.

Bremen Eins Livestream & aktuelle Sendung.

Der Abend
Der Abend
  • Der Abend
  • Davor lief:

  • Um 23:25 Uhr lief: Jamie Cullum You'Re Not The Only One
  • Um 23:19 Uhr lief: U2 I Still Haven't Found What I'm Looking For
  • Um 23:16 Uhr lief: Mr. Big Romeo
  • Um 23:12 Uhr lief: Pet Shop Boys Rent
  • Um 23:09 Uhr lief: Katie Melua Nine Million Bicycles
  • Um 23:05 Uhr lief: Journey Don't Stop Believin'
  • Um 22:56 Uhr lief: Terence Trent D'Arby Sign Your Name
  • Um 22:53 Uhr lief: Barenaked Ladies It's All Been Done
  • Um 22:48 Uhr lief: Herbert Grönemeyer Was Soll Das
  • Um 22:43 Uhr lief: The Eagles I Can't Tell You Why

Der Abend mit Olaf Rathje