Plattdeutsche Nachrichten Plattdüütsche Narichten vun'n 08. Mai 2023

Bunnsgerichtshoff ward över Instahn vun Autoboers bi Dieselschandaal entscheden

Karlsroh: De Bunnsgerichtshoff steiht dorvör, bi den Dieselschandaal wichtige Entschedens op de Spoor to bringen. Utlöser is en Ordeel vun’n Europääschen Gerichtshoff ut’n März. Dor hebbt de Luxemborger Richters de Grenzen för den Utgliek för Schaden düütlich deeper ansett as de düütschen Kollegen betto. In Karlsroh geiht dat nu dorüm, wo de Autoboers nu dorför instahn mööt.     

Striet üm dat Ünnerbringen vun Flüchtlingen ward leger

Berlin: Twee Daag vör dat Flüchtlings-Top-Drapen vun Bund un Länner ward de Ton wieterhen strenger. De Bunnslänner smiet dat Kanzleramt vör, datt se falsch rekent hebbt. In en Papeer vun de Landsfinanzministers steiht, datt de Bund sien Stöhn in de verleden Johren daalsett hett, ofschoons de Tall vun Flüchtlingen wieter hoochgahn is.  

Besinnen an Dode vun’n Tweten Weltkrieg

Berlin: Mit Gedenkveranstalten un Demonstratschonen ward hüüt an veele Oorten in Düütschland an dat Enn vun’n Tweten Weltkrieg in Europa in’t Johr 1945 mahnt. In Bremen hebbt Börgerschaftspräsident Imhoff un Börgermeistersche Schaefer en Kranz an’n Bunker Valentin in Farge daalleggt. In Berlin stellt sik de Polizei dorop in, datt dat an sowjetsche Denkmalen kribbelig warrn kann.

Börgerpark-Tombola bringt mehr as een Million Euro för Bremer Parks

Bremen: Bi de Bremer Börgerpark-Tombola sünd in dütt Johr mehr as 1,1 Millionen Euro tosamenkamen. Na Utkunft vun de Initiatoren is dat en Towass vun meist 16 Perzent in’n Vergliek to dat Vörjahr. Vun dat Geld schüllt blangen den Börgerpark-Vereen ok de Rhododendron Park, de Park links de Werser un de Knoops Park in Lesum wat afkriegen.       

Füer in Vereensheem op den Stadtwerder

Bremen: Op den Stadtwerder is an’n fröhen Morgen en Füer in en Vereenshuus vun en Schrebergoornkolonie utbroken. De Füerwehr weer mit 65 Hölpslüüd dor, üm dat Füer in’n Griff to kriegen. Minschen weern nich in dat Huus. Woso dat brennt hett, is betto noch nich klaar. De Beergoorn an’t Vereenshuus weer güstern aver woll noch apen.    

Dat Weer

Un nu en Blick op dat Weer: In Nordholt 9, in Bremen, Bremerhaben un Cuxhaben 10, in Deefholt un Bremführ 11, in Emmen 12 un in Leer sünd dat opstünns 13 Graad. Hüüt is dat recht sünnig bet licht wulkig, un meisttiets blifft dat dröög. Later an’n Dag billt sik fakener opstiegen Wulken, de besünners in’t Emsland un Oostfreesland enkelte Schuers oder ok korte Gewidder bringen köönt. De Temperaturen stiggt op 16 bet 17 Graad op de Eilannen un 20 bet 21 Graad op’t Fastland. In de Nacht is de Heben Westen de Werser meisttiets dicht wulkig. Vun’t Emsland un Oostfreesland her breedt sik na Oosten hen Regenschuers mit enkelte Gewidder ut, de in de fröhen Stünnen ok in Bremen un Bremerhaben ankaamt. An Elv un Aller blifft dat bet to’n fröhen Morgen noch dröög bi 13 bet 9 Graad. Morgen ward de Wulken twüschen Werser un Elv dichter. Vun’t Werser-Ems-Flach breedt sik Regenschuers för längere Tiet na Oosten hen ut. Hier un dor kann dat ok Gewidder geven. Ok an’n Namiddag blifft dat meisttiets dicht wulkig, un af un an fallt Regen bi 16 bet 21 Graad.

Dat weern de Narichten op platt. Tohoopstellt hett se Irene Lottes. Op Platt trechtmaakt un vörleest vun Marc Gelhart.