Plattdeutsche Nachrichten Plattdüütsche Narichten vun'n 4. Mai 2023

Selenskyj besöcht de Nedderlannen

Amsterdam: De ukrainsche Präsident Selenskyj is na de Nedderlannen reist. Dat weer vörher nich bekannt ween. Medien vermellt: Güstern Avend is he mit en Fleger vun de nedderlandsche Regerung in Amsterdam ankamen. Vörher harr Seklenskyj in Helsinki mit den finnischen Präsident tohoopseten, un ok mit de Böversten ut Sweden, Norwegen, Däänmark un Island. In Den Haag kummt Selenskyj mit Premierminister Rutte un Verteidigungsministersch Ollongren tohoop. Achteran will he den Internatschonalen Gerichtshoff besöken. Al maandenlang unnersöcht de, wat dat Kriegsverbreken geven hett, wo Russland de Ukraine angrepen hett.

Scholz geiht op sien twete grote Afrika-Tour

Berlin: Bunnskanzler Scholz geiht vundaag op Oost-Afrika-Reis. An’n Namiddag snackt he in Äthiopien mit Ministerpräsident Ahmed. He will weten: Woans steiht dat mit den Freden, wo de Börgerkrieg to Enn is. Morgen geiht de Tuur na Kenia. Scholz will besnacken, wat se dor gröön Watergas maken un an Düütschland levern köönt.

Nix rutkamen bi dat Verhanneln över Tarife in Landengeschäften

Hannover: Bi de eerste Tarifrunn för Ladengeschäften in Neddersassen un Bremen is güstern nix bi rutsuert. Wat de Arbeitgevers as Vörslag op den Disch leggt hebbt, langt de Gewarkschap verdi ganz un gor nich. Vörslaan harrn de Arbeitgevers dree Perzent mehr Geld un noch mal twee Perzent in een Johr, un bavento eenmal 1000 Euro, opdeelt op twee Johr. Verdi verlangt nich weniger as 2 Euro 50 de Stunn mehr.

Seilschipp kentert twüschen Nördernee un Juist

Bremen: Twüschen de Inseln Juist un Nördernee is güstern Avend en Seilschipp kentert. De Gesellschaft för dat Redden vun Lüüd, de Malöör mit’t Schipp hebbt, de hett twee Lüüd bargen kunnt. De ehr Boot weer op en Sandbank oplopen un op de Siet kippt. En Reddungsinsel harr sik in de Dünung losreten. De Reddungslüüd hebbt den Mann un de Fro denn ut dat Water ruthalen kunnt.

Keen Warnstreik mehr bi de BSAG

Bremen: Vunmorgen Klock 3 is de Warnstreik bi de Bremer Stratenbahn AG to Enn gahn. Nu fohrt wedder all de Bussen un Stratenbahnen na Plaan, sä een vun de BSAG. Verdi harr de um un bi 2.400 Mitarbeiders ehrgüstern opropen, se schullen 48 Stunnen lang in Warnstreik gahn. De Gewarkschap verlangt tominnst 600 Euro mehr den Maand. Anfang tokamen Week wüllt se sik wedder an een Disch setten.

Dat Weer

Un woans süht dat mit dat Weer umto ut? Opstunns hebbt wi in Möppen 6 Graad, in Bremen, Bremerhaven un Deefholt sünd dat 9 Graad. Vundaag: Veel Sünnschien, ok wenn vun dat Emsland her dünne Wulken optreckt, de vör allen na de Noordsee to ok wat dichter utseht. Överall hell un dröög. Dat Thermometer krabbelt op 16 bet 20 Graad. De Wind dorto weiht flau, an de See ok en beten mehr un in Böen vun de oosten Kant. Tokamen Nacht: Mal treckt Wulken dör, mal kriegt wi den Maand un de Steerns to sehn. An’n Morgen vun Süüdwesten her pö a pö mehr Wulken, man dat blifft meist överall dröög. Bi 10 bet 7 Graad. Morgen: Eerst noch wat heller, man gau treckt vun Westen dichte Wulken op. An’n Vörmiddag fangt dat an to pladdern. De Schuern kaamt gegen Middag twüschen Werser un Elv an. Mag ween ok mit Blitz un Dunnerslag. Dat Ganze bi 14 bet 18 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Katrin Martens.