Plattdeutsche Nachrichten Plattdüütsche Narichten vun'n 3. Mai 2023

Freeheit för de Press- Düütschland wedder schlechter

Berlin: Düütschland is in de List för de Freeheit för de Press in´t drütte Johr nananner afstegen. Achtergrund sünd de Attacken gegen Lüüd de mit de Medien arbeidt. Dor hett dat so vele as noch nie nich dorför geven. De Organisation för Minschenrechte Reporter ohn Grenzen seggt, dat de Bunnsrepublik op Platz 21 is. Achter Länner wie de Slowakei un Samoa. De Organisation betreckt sik op dat Johr 2021. Dor harr dat 80 Angriffen geven, in´t Johr dorför sünd dat 65 wesen. Meist harrn de Attacken wat to doon mit verswörungsideologische, antisemitische or extreme rechte Achtergrünn, so de Reporter ohn Grenzen.

Dialog um Klima: Scholz snackt bi Petersberger Drepen

Berlin: In de Hauptstadt geiht dat hütt mit den Petersberger Dialog um dat Klima wieter. To´n Afsluss vun dat Drepen, wat denn twee Dage stattfunnen hett, will sik Bunnskanzler Scholz in eene Reed an de Delegierten ut rund 40 Länner wennen. De Organisation för denn Klimaschutz geiht dorvun ut, dat de Kanzler sik düütlich to den Utstieg vun de fossilen Energien bekennt. Un ok dat he nee`e Klimahölp för arme Länner ankünnigt. De Veranstalten in´t Buten-Amt bereidt de kamen Weltklimakunferenz in Dubei vör. Butenminister`sche Baerbock will hütt Nomdag kund dahn, wat dorbi rutsuert is.

Streik- Ok hütt keene Busse un Bahnen in Bremen

Bremen: Ok hütt striekt de Gewarkschaft Verdi bi de BSAG. Den ganzen Dag föhrt dorüm keene Busse un Stratenbahnen. Verdi hett för hütt Vomdag to eenen Opmarsch vör den Bremer Hauptbahnhoff opropen. De Polizei in Bremen gifft den Raatslag mit dat Auto nich in de Binnenstadt to föhren. De Striek is siet gistern in Gang un schall noch bit hütt Nacht Klock 3 duern. Mit de Aktion will de Gewarkschaft den Druck op de BSAG bi dat Verhanneln um de Tarife starker maken.

Akten-Kuddelmuddel- Probleme in Sozialstation Thema in Bremer Depu

Bremen: Nadem man dusende vun Akten, in een Bremer Sozialzentrum funnen hett, de man nich bearbeidt hett, is de Schaden för de Stadt düütlich grötter as man erst annahmen harr. Dat seggt de Bremer CDU. De will dat höört hebben vun den internen Kontrollöör vun de Sozialbehöörd. Dorna hett man an de 70 wietere Breven funnen, de noch nich bearbeidt sünd. Dorüm geiht dat ok bi een Extra-Drepen an´t Nomdag vun de Sozialdeputation. De Papieren hett man in´t Februar in een Sozialzentrum in de Bremer Vahr dör een Tofall funnen. As dat schient is dat Akten-Chaos tostann kamen, wie se nich noog Mitarbeiders harrn.

DFB-Pokal- Leipzig in´t Endspeel

Freeborg: Football- Bunnsligist RB Leipzig steiht wedder in´t Endspeel vun´t DFB-Pokal. De Winner vun´t letzt Mol konn sik an´t Avend in´t Speel vun de letzten Veer bi den SC Freeborg düütlich mit 5:1 dörsetten. Keen de Gegner för de Leipziger in´t Endspeel is, hangt vun dat Speel hütt Avend af. Dat tweete Speel vun de letzten Veer finnt twischen den VfB Stuttgart un de Eentracht Frankfurt statt.

Dat Weer

Un nu een Blick op dat Weer: in Bremen 6, in Cuxhaben, in Bremerhaven un op Borkum sünd dat opstünns 8 Graad. Hütt wesselt sik de Sünn un de Wulken af. In´t Bremer Süden lacht us de Sünn ok mal länger an. To´n Avend hen lockert de Wulken denn meist op, bi 11 bit 14 Graad. Tokamen Nacht funkelt de Sterns för us un dor sünd nich vele Wulken an´t Heven, bi 6 bit 1 Graad. Morrn geiht dat eerst fründlich los, man denn kummt vun´t Emsland her mehr un mehr Wulken op. To´n Avend hen kummt denn de Sünn wedder dör un dat blifft dröge. De Temperaturen liggt bi 13 bit 18 Graad. Freedag hebbt wi vele dichte Wulken, de Sünn kriegt wi nich veel to sehn. Vun`t Südwesten her kummt Schuers op, bi 14 bit 18 Graad. Dat weren de Narichten op Platt. Tohoopstellt hett se Peter Behrendt. Trechtmaakt un vörleest hett se Antje Kruppa.