Plattdeutsche Nachrichten Plattdüütsche Narichten vun'n 24. Januar 2025
Standdatum: 24. Januar 2025.
Plattdüütsche Narichten vun'n 24. Januar 2025
Informationen zum Audio
- Verfügbar bis: 24. Januar 2026 Informationen zur Verweildauer
Dusende Minschen denkt in Aschaffenburg an Dode vun Metzattack
Aschaffenburg – Rund 3-dusend Minschen hebbt an’n Abend in de bayrische Stadt an de Doden vun de Metzattack dacht. Se keemen in een Park tohoop, in den een Mann Middeweken een lüttjet Kind un een Mann dootsteken hett. De Kierl is vun een Richterin in een psychiatrisch Krankenhuus inwiesen worrn. Politisch smiet sik de bayrische Lannesregeern un de Bund gegensiedig vör, dat nich allens doon worrn is.
Tarifverhanneln för Öffentlich Deenst fangt an
Potsdam – Bund un Kommunen fangt hüüt ehr Verhanneln över de Tarife för den Öffentlich Deenst an. De Gewarkschuppen foddert dree tosättlich free’e Daag un 8 Perzent mehr Geld, tominnst 350 Euro tosättlich in’n Maand. Bund un Kommunen wiest dat as toveel trüch.
Pistorius besöökt Ünnernehmen in Bremen
Bremen – Bunnesverdeffenderen-Minister Pistorius besöökt hüüt in Bremen Ünnernehmen un ward sik in’t Gollene Book vun de Stadt indrägen. He ward an’n Middag bi een Bedreevsversammeln vun Airbus Defence and Space darbi ween, üm dar to weten to kregen, woför de Arbeiders bang sünd. Bi de Warft NVL, de Lürssen tohöört, kiekt Pistorius sik buterdem de Projekte in’n Marien-Schippsboo an.
Jaa-Werser-Haben kriegt Direktlinie na China
Wilhelmshaben – In Tokunft verbinnt een Containerschippslinie den Jaa-Werser-Haben in Wilhelmshaben direktemang mit China. An’n Abend is dat erste Containerschipp in de Stadt ankamen. Dat Schipp hett 26 Daag bruukt, üm ahn een Twüschenstopp vun een vun de wichtigst Haben in China na Wilhelmshaben to fohrn. Blots de Jaa-Werser-Haben hett düsse direkte Linie un steiht darüm in’n Vergliek to annern Haben in Nordeuropa goot dar.
Land Bremen fört Demokratie-Dag an all Scholen in
Bremen – An all Scholen in Bremen un Bremerhaben schall dat in Tokunft een Demokratie-Dag geven. Dat hett de Bremische Börgerschupp mit een grode Mehrheit besluten. An den Dag schüllt Scholen Kinnern un jungen Lüüd demokratisch Werte vermiddeln un se schüllt sülfst erleven könen, wat dat bedüüdt.
Dat Weer
Un nu een Blick op dat Weer: in Bremen un Deefholt 7, in Bremerhaben un op Wangerooge sünd dat opstunns 6 Graad. Hüüt hollt sik dicke Wulken, de Sünn kiekt vielleicht mal för een paar Minuten rut, mehr aver ok nich. An’n Vörmiddag kummt vun de Ems her Regen op, de sik den Dag över op dat hele Flach utbreedt. Later an’n Namiddag un Avend ward dat wedder dröög, man de Wulken blifft – bi 7 bit 9 Graad. Tokamen Nacht kummt dat mal natt vun baben, mal is dat dröög, to’n Bispill an de Küst. Dat Thermometer sackt op 6 bit 4 Graad. Morrn gifft dat wieter vele Wulken un vun’t Ollenborger Münsterland her kummt nee’er Regen op. In Oostfreesland, vör allens op de Eilanden, blifft dat meist dröög un dar kiekt viellicht ok mal de Sünn rut, bi 6 bit 8 Graad. Dat weern de Narichten op Platt. Irene Lottes hett se tohoopstellt. Op platt trechtmaakt un vörleest hett se Heidi Jürgens.