Plattdeutsche Nachrichten Plattdüütsche Narichten vun'n 29. Juli 2024

Israels Sekerheitskabinett nickt militäärsche Reakschoon gegen Hisbollah af

Tel Aviv: Na de tödlichen Raketenattacken ut den Libanon stellt sik Israel op en militäärsche Reakschoon in. De Liddmaten vun dat Sekerheitskabinett hebbt Regerungsbaas Netanjahu de Verlööf dorför geven. In en Naricht heet dat, Netanjahu un sien Minister för’t Verdeffendeern dröfft de Oort un Wies un Tiet vun de Reakschoon gegen de Hisbollah-Miliz fastleggen. En Rakeet, de ut’n Libanon keem, is an’t Weekenenn op en Footballplatz daalgahn. Tominnst twölf Kinner un junge Lüüd sünd dorbi dootbleven.

Erdogan drauht Israel mit militäärsch Rinmengeleern

Ankara: De törksche Präsident Erdogan hett Israel dormit drauht, de he de Palästinenser militäärsch Stütt geven ward. Dat hett he bi en Veranstalten vun sien Regerungspartei AKP düütlich maakt. Wo düsse Bistand utsehen würr, hett Erdogan in sien Reed nich seggt. De israeelsche Butenminister Katz hett den törkschen Präsident wohrschaut, datt he sik beter nich rinmengeleern schall. Anners kunn dat mit em jüst so to Enn gahn as mit den iraakschen Diktator Saddam Hussein.

Maduro as Präsident in Venezuela wedderwählt

Caracas: De Staatspräsident vun Venezuela Maduro is na offiziellen Angaven wedderwählt worrn. De autoritäre Staatsbaas hett meist 51 Perzent vun de Stimmen kregen. Sien Wedderpart González hett 44 Perzent kregen. Tovör is de in mehreren Ümfragen as Winner vörutsehn worrn. Opseher sünd aver nich vun en free’e un gerechte Wahl utgahn. De Oppositschoon hett middewiel künnigmaakt, datt se de Wahl nich anerkennen will.

Eerstes Boostück för nee’e Freesenbrüch schall levert warrn

Weener: För den Bo vun de nee’en Freesenbrüch över de Ems schall hüüt en eerstes Boostück anlevert warrn. En Swümmkraan schall dat vun’n Papenborger Haben bet to de Bosteed in Weener in’n Kreis Leer bringen. Darna ward dat 300 Tonnen swore un meist 30 Meter lange Deel inboet. De annern dree Delen schüllt bet Sünnavend nakamen. Nadat en Frachtschipp bi en Kollischoon de oole Freesenbrüch 2015 tweimaakt hett, is de Bahnverkehr op de Streek ünnerbraken.

Bremens Soziaalsenatersche bekiekt sik Krisenutrüstung

Bremen: Soziaalsenatersche Schilling will sik an’n Vörmiddag en Bild vun de nee’en Katastrofenschutz-Utrüstung maken. Dat Düütsche Rode Krüüz hett dat Material för meist 1,3 Millionen Euro in’n Opdrag vun dat Bremer Soziaalressort köfft. De Utrüstung schall för Nootfallen in de Stadt Bremen praatstahn. Dorto höört na Utkunft vun’t Amt en Lüttlaster, Noottelten, Betten un Deken för erwassen Lüüd un Kinner. Dat Geld för de Utrüstung kummt ut en 500 Millionen Euro sworen Krisen-Fonds.

Dat Weer

Un nu en Blick op dat Weer: In Möppen un Bremführ 16, in Bremen, Bremerhaben un Leer 17, in Cuxhaben 18, un in Demhorst sünd dat opstünns 20 Graad. Hüüt schient den heelen Dag de Sünn. Över Dag bildt sik‘n poor lockere opstiegen Wulken, ok dünne Wulken sünd dorbi. Dat blifft dör de Bank dröög bi 23 bet 26 Graad, an de Küst bi 21 bet 22 Graad. In de Nacht is de Heben licht wulkig bet klaar, Regen is nich in Sicht. To’n Morgen hen bildt sik hier un dor Daak. De Temperaturen gaht trüch op 17 bet 16 Graad op de Eilannen un an de See, in’t Binnenland op 13 bet 10 Graad. Morgen schient ok wedder faken de Sünn bi wenig Wulken. Feller mit Daak löst sik gau op. An’n Middag un Namiddag sünd ok mal mehr lockere opstiegen Wulken to sehn. Liekers blifft dat fründlich un dröög bi 25 bet 29 Graad, an de Küst un op de Eilannen bi 22 bet 24 Graad.

Dat weern de Narichten op platt. Tohoopstellt hett se Anja Guse. Op Platt trechtmaakt un vörleest vun Marc Gelhart.