Plattdeutsche Nachrichten Plattdüütsche Narichten vun'n 21. Februar 2024

Ein rot-weißer Leuchtturm zwischen Dünen. Dahinter ein blauer Himmel mit ein paar Wolken.

Plattdüütsche Narichten vun'n 21. Februar 2024

  • Gaza-Krieg: Dat Scheten höört nich op
  • Mehr Flüchtlinge in Düütschland angrepen
  • Verhanneln um Assange geiht wieder
  • Städte in Neddersassen: To wenig Geld för grote Opgaven
  • Noordmole schall mit 25 Millionen Euro wedder opboot warrn
  • Dat Weer
Bild: Radio Bremen

Informationen zum Audio

Gaza-Krieg: Dat Scheten höört nich op

Tel Aviv: Wannehr in den Gaza-Krieg dat Scheten ophöört, is nich aftosehn. Israels Ministerpräsident Netanjahu hett noch mal kloormaakt: Sien Regerung fohrt stuur ehren Kurs wieder. Se warrt wieder gegen de Hamas angahn, betdat all Geiseln free sünd un Gaza för Israel nie wedder en Gefohr ween kann. In den Weltsekerheitsraat is en Plaan nich dörkamen, dat se in’t Gazaland stantepe mit’t Scheten ophöört. De USA hebbt dor Nee to seggt.

Mehr Flüchtlinge in Düütschland angrepen

Ossenbrügge: De Polizei hett faststellt: Verleden Johr sünd kloor mehr Flüchtlinge in Düütschland angrepen worrn as een Johr vörher. Dat vermellt de „Ne’e Ossenbrügger Zeitung“, un de hebbt de Tahlen vun dat Bunns-Binnenministerium. Sowat 2400 mal sünd Flüchtlinge ut politische Grünnen angrepen worrn, 300 mal weer Gewalt in’t Speel. Dat weer meist dubbelt so veel as 2022.

Verhanneln um Assange geiht wieder

London: Bi de Fraag, wat Julian Assange, dat is de Mann, de Wikileaks grünnt hett, an de USA utlevert warrt, löppt vundaag de twete Törn. Güstern harrn vör den Londoner High Court Assange siene Avkaten jemehr Punkten vörbrocht. Vundaag is de Gegenpart an de Reeg. Wannehr de Richters sik entscheedt, is nich kloor. För Assange is düt Verhanneln de letzte Schangs, dat he nich na de USA utlevert warrt.

Städte in Neddersassen: To wenig Geld för grote Opgaven

Göttingen: De Stadt-Böversten in Neddersassen hebbt anseggt: Se kriegt för jemehr Opgaven nich noog Geld vun dat Land un den Bund. 18 Oberbörgermesters hebbt in Göttingen to Protokoll geven: Se mööt mehr un mehr övernehmen, man dat Geld langt vörn un achtern nich. So müssen Scholen för den Ganzdags-Bedriev umboot warrn, Flüchtlinge mööt en Dack över’n Kopp kriegen, un ok de Krankenhuus-Reform stünn an.

Noordmole schall mit 25 Millionen Euro wedder opboot warrn

Bremerhaven: Mehr as 25 Millionen Euro sünd dorför inplaant, dat in Bremerhaven de Noordmole wedder opboot warrt. Dat is knapp twee Johr her, dat de scheve Molentoorn tohoopsackt is. In de Deputatschoon för Weertschap un Havens snackt se an’n Namiddag ok doröver, den Fischereehaven uttoboen. Dorför sett dat Land Bremen 20 Millionen Euro an.

Dat Weer

Un woans süht dat mit dat Weer umto ut? Opstunns hebbt wi in Bremen, Frieseythe un Weyerbarg 8 Graad, in Bremerhaven sünd dat 9 Graad. Vundaag: Vele Wulken, de Sunn kriegt wi meist gor nich to sehn. Hier oder dor kann dat ok en beten pladdern. An’n Namiddag un Avend treckt vun Westen her Regen rin, de ok wat länger daalkamen kann. Dat Thermometer krabbelt op warme 9 bet 12 Graad. De Wind dorto weiht flau oder en beten mehr vun de süüdwesten bet süden Kant. An’n Namiddag un Avend kann dat ok düchtig opbriesen, vör allen an de Küst. Tokamen Nacht: Eerst noch natt. Na Middernacht treckt de Regen na de Lümborger Heid af. De Wulken köönt aver jümmers noch den een oder annern Schuer daalsmieten. Bi 9 bet 7 Graad. Morgen: Vele Wulken, wenig Sunnschien. Dat blifft meisttiets dröög. An’n Namiddag kummt vun Westen her mehr Regen. Dat Ganze bi 10 bet 14 Graad. Dat weren de Narichten. Op Platt trechtmaakt un vörleest vun Reinhard Goltz. Tohoopstellt hett jüm Sven Weingärtner.

Bremen Eins Livestream & aktuelle Sendung.

Die Nacht

Die Nacht
Die Nacht
  • Die Nacht