Plattdeutsche Nachrichten Plattdüütsche Narichten vun'n 18. September 2023

Bunnsbinnenministerin Faeser is kunsequent gegen böverste Grenz för Flüchtlings, de na Düütschland kummt

Berlin: Bunnsbinnenministerin Faeser is kunsequent gegen eene böverste Grenz för Flüchtlings, de na Düütschland kummt. Faeser seggt in de ARD, dat man dat kamen na un blieven in Düütschland op Duer blots op europä`sche Ebene lenken kann. Se hett dormit CDU-Boss Merz un CSU-Boss Söder weddersproken. Beide harrn dorför eene Höchstgrenz verlangt. Faeser hett ankünnigt de Butengrenz vun de Europä`sche Union in Mittelmeerruum mehr unner de Ogen hollen to laten. Op dat italiensche Eiland Lampedusa sünd tolest jeden Dag wedder hunnerte vun Towannerer ut Afrika ankomen.

Nee`e Corona-Impfsaison geiht los

Berlin: Vun hütt an kann man dat nee´e Corona-Impfmiddel, för de nee`en Varianten vun´t Virus, kriegen. Luut Bunnsgesundheitsministerium schüllt all tohoop 14 Millionen Stück to Verfügung stahn. Dat Middel is vun de Firma Biontech. De Faste Impfkommission gifft den Raat, dat de Lüüd, för de dat afsünnerlich gefährlich is, ehre Impfung opfrischt. Dorto tell op jeden Fall Minschen, de mit anners wat krank sünd un ok de, de över 60 Johre old sünd.

Staus in de Summerferien wedder op Vör-Corona-Niveau

München: Op de düütschen Autobahnen hett dat in de Summerferien wedder düütlich mehr Staus geven. De ADAC seggt, dat dat 123.000 wesen sünd. Dat sünd in den Vergliek mit dat Johr dorför, to de glieke Tiet, 15 Perzent mehr. De Staus op de Autobahnen sünd ok düütlich länger wesen un hebbt sik nich so flink oplööst. Luut ADAC is dat Stau-Niveau wedder op den Level, as wie vör de Corona-Kniep.

Kuntrollen vun Bio-Tünnen op Inhalt

Berlin: Bunnswiet will man in de kamen twee Weeken hier un dor Proven vun den Inhalt vun de Bio- Tünnen nehmen. Bi de Aktion sünd ok ut Neddersassen een paar Gemenen mit vun de Partie, so ok Cuxhaven. Man will sehn, wat de Tünnen ok mit de richtigen Saken vull sünd. Wenn dat nich richtig is, denn backt de Kontrolleure dor eenen roten Upklever op un de Tünner warrd nich mehr leert. Vör Johren hebbt se, bi so eene glieke Aktion, veel Plastikmüll un ok Glas, wat dor nich rin höört, in de Bio-Tünnen funnen.

Football-Bunnsliga: Drütte Daalslag för Werder in de Saison

Heidenheim: Football-Bunnsligist Werder Bremen hett in´t veerte Speel to´n drütten Mal een op de Mütz kregen.  Bi den Opstieger Heidenheim hett Werder mit 2 to 4 verloren. De Bremer sünd nu op den 12 Platz vun de Tabelle. In´t tweete Speel hebbt Darmstadt un Mönchengladbach 3 to 3 speelt.

Dat Weer

Un nu een Blick op dat Weer: in Emm 18, in Bremerhaven, in Bremen un Defhold sünd dat opstünns 19 Graad. Hütt hebbt wi Sünn un dicke Wulken, de vun Westen her hütt Vomdag un hütt Middag Schuers mit sik bringt. Hier un dor kann dat ok Blitz un Dunnerslag geven. An´t Nomdag un to´n Avend hen maakt de Regen denn ok af un an mal eene Pause, bi 22 bit 25 Graad. Tokamen Nacht treckt wedder vun´t Emsland her Schuers mit Gewidder dör . Af un an lockert dat mal op. To´n Morrn hen treckt sik de Schuers to de Küst torügg, bi 15 bit 12 Graad. Morrn sünd vele Schuers unnerwegens. In´t Binnenland is dat nich ganz so natt un wi kriegt de Sünn ok hier un dor mal to sehn. De Temperaturen liggt bi 18 bit 20 Graad. Middeweeken gifft dat eenen Mix ut Sünn un Wulken un dat blifft meist dröge, bi 21 bit 24 Graad. Dat weren de Narichten op Platt. Tohoopstellt hett se Michael Kück. Trechtmaakt un vörleest vun Antje Kruppa.