Plattdeutsche Nachrichten Plattdüütsche Narichten vun'n 15. September 2023

„Fridays for Future“ röppt to Klimastreik op

Bremen: De Klimaschutz-Akschoons-Koppel „Fridays for Future“ hett för hüüt to en wieteren Klimastreik op de heelen Welt opropen. In Düütschland sünd in mehr as 200 Oorten Akschonen ankünnigt worrn. In Bremen treckt opstünns Demonstranten vun’n Hauptbahnhoff in de Binnenstadt. Ok in Bremerhaben is för Klock 11 en Protesttog plaant.    

CDU stellt sik achter Afstimmen mit AfD

Erfort: Thüringens CDU-Baas Voigt stellt sik dorachter, datt sien Partei in’n Landdag en Gesetz mit de Stimmen vun de AfD dörsett hett. He säe to de ARD, datt de Lüüd keen parteitaktischen Speele wüllt. Se wüllt, datt’n sik üm ehr Sorgen kümmert. De Thüringer AfD ward vun’n Verfatensschutz as rechtsextrem taxeert.

Tall vun Doden na Hoochwater in Libyen stiggt an

Darna: In Libyen is de Tall vun Doden na dat swore Hoochwater op tominnst 11.300 anstegen. Dat hett de Hölpsorganisatschoon „Roder Halfmaand“ vermellt. In de Stadt Darna, de dat besünners böös drapen hett, söökt se na Utkunft vun de Organisatschoon opstünns noch na 10.000 Minschen.

Meist 300.000 Inspröök gegen Grundstüer in Neddersassen

Hannover: Meist 290.000 Lüüd in Neddersassen hebbt Inspruch gegen ehr Grundstüerbescheden inleggt. Dat sünd 7,5 Perzent vun de Stüerverklaren, de afgeven worrn sünd. As de NDR rutfunnen hett, sünd de en ut verfatensrechtliche Grünnen nich seker, de annern gaht vun Fehlers vun dat Finanzamt ut oder wüllt egen Angaven ännern.

Nee’e Saison för Fishtown Pinguins fangt an

Bremerhaben: De Fishtown Pinguins fangt hüüt mit en Speel buten Bremerhaben de nee’e Saison vun de Düütschen Ieshockey-Liga an. Se wüllt dat trecht kriegen, datt se wedder in de Playoffs kaamt as in de verleden acht Speeltieden. De eersten Gegner sünd hüüt Avend de Straubing Tigers.

Dat Weer

Un nu en Blick op dat Weer: In Möppen 10, in Emmen 12, in Bremerhaben 13, un in Bremen un Cuxhaben sünd dat opstünns 14 Graad. Hüüt gifft dat vun fröh bet laat veel Sünnschien un blots’n poor dünne oder lockere Wulken bi 20 bet 23 Graad. In de Nacht is dat meisttiets licht wulkig oder klaar. Hier un dor kann sik Daak billen. De Temperaturen gaht trüch op 16 bet 14 Graad an de Küst un 13 bet 10 Graad in’t Binnenland. Morgen gifft dat eerst’n poor Feller mit Morgendaak, un denn wedder veel Sünnschien un’n poor lockere oder dünne Wulken. De Temperaturen stiggt wieter an op 21 bet 22 Graad op de Eilannen un 24 bet 26 Graad op’t Fastland. Ok Sünndag löst sik de Feller mit Daak op, un dat geiht fründlich mit Sünnschien un lichte Wulken wieter. Dat blifft dröög bi 20 bet 25 Graad. An’n Maandag Sünnschien, dicke Wulken un degte Schuers un Gewidder ut’n Westen bi 21 bet 25 Graad.

Dat weern de Narichten op platt. Tohoopstellt hett se Claudine Bimmermann. Op Platt trechtmaakt un vörleest vun Marc Gelhart.